#أخبار_عالريق 425 يوم

#أخبار_عالريق 425 يوم
✅يكتبها/سعيد الطويل
■صحينا مبارح على خبر است.شهاد تلت صياديين بنص البحر وهما سارحين على رزقتهم.
■شهد..اء لقمة العيش اللي انقصفت حسكتهم ،هما اتنين اخوة اسماءهم محمد وزكريا والتالت ابن عمهم اسمه يحيى اللحام .
■الداخلية طلعت بيان انها بتحقق بموضوع الانفجار وحيعرفوا انه من اليهو..د ولا شغلة تانية.
■نقابة الصياديين سكروا البحر ومش حينزلوا عالصيد من هان ليوم التلات الجاي تضامنا مع دار اللحام.
■بتوقع انه اليوم تتوضح أمور جديدة بخصوص الصياديين التلاتة ،والقصة حتكون فيها ايد للاحتلا..ل.
■الزنانات متوقفتش من مبارح لليوم ولا دقيقة خاصة برفح وخانيونس.
■كل البلد اليوم معطلة عشان يوم المرأة إلا طلاب الوكالة تبعون المجموعة الأولى راحوا ع مدارسهم.
■الوكالة لغت كمان اجازة الإسراء والمعراج تبعت يوم الخميس الجاي.
■الجامعة الاسلامية اليوم مسكرة أبوابها ومعطلة عشان يوم المرأة.
■أعلى نسبة للنسوان سجلوا للانتخابات في رفح.
■القضاء الشرعي طلع قرار انه لو تطلقت للبنت وهيا لسة مخطوبة قبل الدخلة والخلوة مش حتتسجل مطلقة.
■يوم 26/3 حيرجع التوقيت للصيفي وتعود المية لمجاريها والحياة لطبيعتها.
■الصحة برام الله بتقول انه احنا لسة بنراهن على وعي المواطن ...وانتوا عارفين قصة الوعي 🙂.
■في قرض ب2000 دولار فش عليه زيادة للشباب اللي ناويين يتجوزوا ومعهمش مصاري وكل شهر حيسدوا 50 دولار بس.
■حسين الشيخ بيقول انه فتح حتروح بقائمة وحدة عالانتخابات ومش حتتكرر قصة ال2006.
■اللي بده يسجل للسفر في أبو خضرة يروح بكرة ،لانه اليوم برضه عطلة ،بلاش يخبط مشوار عالفاضي.
■اطنشعر حالة وفاة وفوق الألفين حالة كوو.رنا من مبارح لليوم بالضفة.
■الجو حيكون هاليومين متقلب ومش راسي ع بر ،بكرة وبعده شوب والخميس بالليل بيقلك جاي منخفض.
■مُكافحة المُخدرات مسكت فوق ال 35 ألف حبة بخانيونس.
■ابو اسماعين العمادي ونائبه الحردان وصلوا مبارح لغزة.
■بشكل رسمي حطوا خوان لابورتا رئيس لنادي برشلونة.
■عيادات الوكالة اليوم فاتحات ،عشان اللي عندها مشوار تطلعوا بالمرة بس متنساش علاج الولد .
■اليوم حنلاقي تلت ترباع صفحات الشباب بتخبط كلام للمرأة خبط من اللي يحبه قلبك .
■محدش يزعل القوارير اليوم وراضوهم ودللوهم هذا يومهم وبدناش حد يقصر معهم ،وزي ما قال رسولنا الكريم خيركم خير لأهله.

#صباح_الخير اليوم خص نص لكل أم وأخت وزوجة وخالة وعمة وأي حد من رحمك ..ولزميلتك ولصديقتك ولمرتك التانية وللممرضة والحكيمة وللأ.سير.ة وللجر..يحة وللبنات الجدعات اللي اشتغلوا بتركيب الطاقة الشمسية ،وللمختارة اللي بتشغل عالسيارة اللي عالخط ول ليلي غنام محافظ رام الله اللي قد حالها ..

#صباح_الخير لأمي وأمك اللي ضحت وربت وكبرت ولبست وتعبت وسهرت وتوجعت وولدت ونزلت وغسلت وشطفت وطبخت واشتغلت وخافت وعيطت وضحكت وفقدت أبنها وضلت حاملة هم بناتها وانبسطت وزعلت ومعمرهاش كشرت ..ربنا يديمهم ويحفظن ..

#صباح_الخير_جدا 🌹
الاثنين 8/3