أخبار_عالريق

#أخبار_عالريق 304
✅يكتبها/سعيد الطويل
■أهم موضوع لازم نركز عليه موضوع تأخير شيكات الشؤون للناس الغلابا اللي فش وراهم ولا قدامهم ،لحتى الآن محدش طلع بتصريح يبل ريقهم ويحدد موعد الصرف.
■ خففوا شوية اجراءات ورفعوا مكعبات الباطون و جبال الرمل خاصة بالشجاعية وسهلوا الحركة بين المحافظات وفتحوا الجوامع بنص مناطق القطاع ، والتوجيهي حيداموا السبت ،بس بالنسبة لموضوع فتح صالات الأفراح هذه اشاعة من جروبات النسوان.
■تلت ترباع الناس بيشكوا من فاتورة المواتير هذا الشهر جياهم ضعف وضعفين.
■من بعد مؤتمر الصحة تبع مبارح الصبح في خمسين حالة جديدة بغزة واربعة بخانيونس وستة برفح.
■بيقلك جاية كتلة هوا سخنة اليوم عنا وحتضل مشرفانا ليوم الجمعة الجاية ..لكن برضه بيضل أحسن من الشتا.
■توفت بنت صغيرة اسمها نسمة معتز قاسم عمرها 10 سنين بعد ما بلعت جسم غريب علق بالقصبة الهوائية ،الله يرحمها ..ديروا بالكم على صغاركم يا جماعة الخير.
■اليهود مبارح أفرجوا عن الأ.سير كمال محمد عيسى عمره 48 سنة من سكان غزة ،قضى منهم خمسطعشر سنة بالسجن.
■ألف وستمية واحد من اللي وصلوا من السفر ع غزة ،روحوا من الحجر ع دورهم وأمورهم تمام التمام وفش معهم كوورنا.
■اليوم وفد من فتح بده يروح ع سوريا عشان يتحاوروا مع الفصائل اللي هناك بخصوص الحوارات اللي صارت بقطر وتركيا ومصر .
■مرتضى منصور ممنوع يزاول أي نشاط رياضي لمدة أربع سنين ودفعوه كمان 100ألف جنيه.
■برشلونة تعادل مع اشبيلية واحد واحد بمباراة حضرها نص شباب غزة من الزهق.
■بكرة الجها..د الاسلا...مي بدهم يعملوا انطلاقتهم عالنت الساعة أربعة ونص ،عشان الكورونا.
■بمصر أعدموا مبارح خمسطعشر شب متهمين بقضايا أجناد ومكتبة الاسكندرية.
■الملك عبد الله قبل مبارح استقالة حكومة الرزاز.
■بيقلك لبنان أكثر دولة بتشرب قهوة بالعالم.
■دراسة عملها راجل فهمان بيقلك انه 90% من الزلام بيضلوا حادين على نسوانهم لما تموت وبيتجوزش طول عمرهم من بعدها.
■واحد صيني حرق طليقته عشان كتبت فيه منشور عالنت .
■صائب عريقات بيقول انه مش كاتب مأجور ،لكنه جندي فلسطيني بيدافع عن وطنه.
■كمان مرة أنا اشتريت قنو البلح بخمسة شيكل ومش خربان ونظيف وما شاء الله عنه.
■معظم المانجا اللي بالبلد غالية وملهاش طعم.
■بدنا أسبوعين لمين يعيش عشان نضب أواعي الصيف وننزل أواعي الشتا ونبلش نغسل الحرامات أم السبعة كيلو.
■مبارح أتلفوا سبعة طن فوول خربان مرة وحدة.

#صباح_الخير للكادحين والمشحططين والمفلسين والضاويين والمسخمطين والعيانين والمكبوتين والمتأزمين واليأسانين والسرحانين والزهقانين واللي مقفلة الدنيا بوجوهم واللي بيستنوا بمنحة العمادي واللي عايشين على أمل واللي مصاحبين عمر ،واللي صحيوا لقيوا بطارية جوالهم فاضية وناسيين يشحنوها واللي خربت بطارية اللدات عندهم ومعهمش يصلحوها واللي صحيوا مش عارفين شو حيعملوا بيومهم ولا كيف حيكلملوه ..
وكلها لربك مش ..بينساش حد يخوي

و #صباحكم خير وسعادة ان شاء الله 🌸
الأحد 5/10/2020