أخبار_عالريق

#أخبار_عالريق 325
✅يكتبها /سعيد الطويل
■ يا جماعة الخير الاستهتار قاعد بيزيد والوضع كمان برضه بيزيد سوء عنا بغزة وحالات الكورونا يوم عن يوم صارت أكثر من اللي قبله .
■وزارة الصحة بتقول انه زيادة عدد الاصابات بالكورونا بغزة بتطمنش خالص وممكن تخلينا نسكر البلد من أول وجديد.
■لغوا الحجر الصحي للمسافرين اللي جايين ع غزة ,وحيحجروهم بالدار وانت وأمانتك يا خال.
■الصحة العالمية بتحكي انه زيادة أعداد الكورونا بغزة متفجئناش منه خالص ومتوقعين كمان عدد أكبر من هيك كمان.
■اليهود دخلوا مبارح مصاري قطر ع غزة عشان تتوزع من بكرة.
■شب عمره خمسة وعشرين سنة طعن اثنين فرنسين مبارح واعتقلوه.
■السعودية ومصر وتلت ترباع العالم أستنكروا هذا الحادث.
■الامن السعودي اعتقل شب حاول يعتدي على واحد من تبعون أمن القنصلية الفرنسية بجدة.
■الاردن وضعه صعب صاير بالكوورنا مبارح بس 40حالة وفاة و3500اصابة جديدة.
■عنا تسجل مبارح 8حالات وفاة وستمية و تلاتين اصابة.
■توفى مبارح شبين صغار بالعمر بحادث سير بين الخليل وترقوميا.
■في شب كمان اسمه محمد نصاصرة وقع ببركة ببيت فوريك ومات بمكانه الله يرحمه.
■ اشتية بيقول انه الشهر الجاي حنرفع فيه نسبة صرف الرواتب وطلبنا من البنوك متخصمش أي دفعات عالموظفين الوضع ماكل هوا.
■ع وجه الفجر وصل للمستشفى 3اصابات لشباب من جنين برصاص الاحتلا.ل،اصابة منهم خطيرة.
■مسكوا بخانيونس تقريبا 32 تنكة زيت مغشوشة ومخلوطة بزيت سيرج.
■الهدنة بغزة بآخر أيامها مع اليهود ،يا بتتجدد الأمور يا إما حندخل جولة تصعيد جديدة.
■البندورة لسة ماسكة سعرها وبكسة البتنجان بأربعة شيكل.
■الزنانة الها خاطر تنزل تشتغل عنا عالخط من قربها.
■بيقلك الآيفون الأزرق حينزل ع غزة الأسبوع الجاي .
■الأوقاف سكرت أربع جوامع بالشمال والوسطى عشان لقيوا في ناس بتصلي فيهم معاهم كوورنا.
■موقع طقس فلسطين كاتب انه في موجة منخض قوية الأسبوعين الجايات .
■فش فتح لصالات الأفراح الفترة،اللي بده ياخذ ويتجوز يتوكل ع الله ،أسهل اله وأريح ...وانت اللي بتصنع الفرحة.

#صباح_الخير للأهل اللي بتدعم أولادها وبتشجعهم انهم يحفظوا القرآن ،ويستغلوا فترة الحجر وقلة الطلعة والنزلة ،
ما شاء الله كل يوم صرنا نشوف صورهم منورة الفيس بوك .

#صباح_الخير للعيلة اللي بتحب اللمة والجمعة والروقان والهدوء وراحة البال وبتحبش الدوشة والزعاق والزق والنق وبترضى بنصيبها عالحلوة والمرة وبتصنع من أصعب الظروف سعادة.

#صباح_الخير للناس اللي ناموا ونفسيتهم تعبانة والتفكير دبحهم دبح ،وصحيوا كلهم أمل بالله انه يفرج كربهم ويريح بالهم.

#يسعد_صباحكم #جمعة_مباركة 🌸
30/10/2020