أخبار_عالريق

#أخبار_عالريق 289
✅يكتبها/سعيد الطويل
■مبارح كان يوم حافل بقصة مواتير الكهرب من الصبح لبعد العصريات .
■أصحاب المواتير وقفوا ضح الكهرب مبارح واحتجوا ورفضوا قرار الطاقة ،الشرطة راحت استدعتهم واجبرتهم عالتشغيل.
■الأمور لسة منحلتش بس شكلوا لجنة ومعهم عشر تيام عشان يحسموا الأمور ويتفقوا.
■دخل عالخط اتحاد المقاولين وبيقولوا انهم جاهزين يجيبوا مواتير جديدة ويبيعوا الكيلو بتسعيرة الطاقة الجديدة..بيزنس يا معلم.
■كل التنظيمات من كبيرها لصغيرها حتى المخاتير طالبوا أصحاب المواتير بالالتزام بالتسعيرة الجديدة.
■مبارح بتقرير الصحة كان في حالتين وفاة وتقريبا ألف اصابة بالضفة وغزة.
■اليوم في عدد حالات مش بسيط حيعلنوا عنه بغزة وفي كمان حالتين وفاة جداد حتى الآن وبالمجمل احنا قلطنا الألفين حالة بالقطاع.
■ابن الكلب فريدمان شبك الدنيا بتصريحاته انهم بدهم دحلان رئيس وانه فش عندهم مشكلة بهيك قصة .
■فتح بتقلك انه دحلان مفصول من الحركة من زمان وعليه قضايا واحنا بنقبلش بواحد أداة يكون رئيس علينا.
■دحلان بيقول انه المفروض الهامل فريدمان موقعناش ببعض وانا مع الانتخابات اللي بتمثل الكل.
■نبيل شعث بيقول انه دحلان بيلعب دور خياني وهو اللي بيخطط لتطبيع الإمارات والبحرين مع اليهود.
■بجريمة بشعة بيت لحم، أربع مسلحين وقفوا سيارة وقتلوا بنتين وشب وشردوا.
■شب اسمه محمد حمدان شرد من حجر المستشفى الأندونيسي مبارح بعد ما طلعت نتيجته ايجابية ،وطلع معاه كوورنا .. وين بده يروح؟
■رجعوا فتحوا المولات الكبيرة بغزة بشرط انه الكل يلبس كمامة ويتعقم ويسجلوا اسماءهم بالدفتر عالباب.
■بالنسبة للصيدليات سمحوا كمان الهم يفتحوا طول اليوم وملهمش بوقت الحظر.
■اللي معه تأمين صحي ومخلص فش مشكلة يروح يتعالج عليه لما الله يفرجها ،وزارة الصحة طلعت قرار بهذا الاشي.
■الصحفي المغترب محمد الشيخ يوسف توفى بسكتة قلبية مبارح بقطر .
■احتمال السلطة تاخذ من قطر قرض عشان تدفع فيه رواتب السلطة وقطر فش عندها مشكلة بالموضوع.
■في خمس تلاف اسم جداد حينزلوهم يوم الاثنين الجاي من الناس اللي مخدوش 100دولار وتضرروا الكوورنا.
■حيبلشوا بالتوقيت الشتوي هذه السنة بآخر يوم بشهر عشرة الجاي.
■اليوم أول أيام شهر صفر بالتاريخ الهجري.
■كيلو الجاج اليوم بعشرة شيكل .
■بيقلك طيران الإمارات بده يصير يعمل وجبات أكل تناسب الشريعة ليهودية ،بالسم الهاري ان شاء الله.
■عدد اصابات الكورونا بالعالم بتزيد عن التلاتين مليون ،في منهم عشرين مليون الله شفاهم .
■مليون الا نتفة صغيرة عدد اللي ماتوا من الكوورنا حتى الآن.
■بلشوا يوزعوا الكتب عطلاب الثانوية بالمدارس بغزة بنظام معين .
■اليهود اعتقلوا صبية مقدسية بتهمة انها بتتعامل مع حز...ب الله وعيلتها بتنفي .
■الجو اليوم نازل تلت درجات عن مبارح والدولار طلع شيكل عن مبارح.

#صباح_الخير لبياعين سوق فراس وبسطات الرابش وسواقين التكاتك وأصحاب الكارات اللي اشتاقوا لرزقتهم وشغلهم.

#صباح_الخير للأبو اللي صحي من الصبح ،صلى وقرا سورة الكهف وسقى قواوير المية وقعد يصلح طنجرة الكهرب وكروسة ابن ابنه الصغير ولسة محدش صحي من الدار.

#صباح_الخير لمحمد الشب اللي شرد من المستشفى مبارح بعد ما طلع معه كورونا ،يخوي والله القصة مش مستاهلة كلها كم يوم ويترجع زي الحصان ليش تبهدل غيرك معك ،ارجع وقضي المدة وربنا يشفيك .

#يسعد_صباحكم جمعتكم مباركة
وصلوا على حبيبنا النبي صلى الله عليه وسلم 🌺
الجمعة 18سبتمبر 2020

يسسلمموو الامميير
+ مممتااابعة مميييييزهه
+وردهه

يعطيك العافيه علي طرحك الاخباري
تقديري لك

يسلمو لنقل المتابعه

يعطيك الف عافية

ييعطيكك العافيةة
وردهه