أخبار_عالريق 227

أخبار_عالريق 227

■انقتل مبارح العميد والأسير المحرر جبر القيق برفح بعد ما طخوا عليه مباشرة بعدين انطعن بالسكينة ،قدام مرته وأولاده.
■عيلة الصوفي التابعة "للترابين" أعلنت انه القصة ثأر قديم عمره أكثر من تلاتين سنة وأخذوه واللي قتل جبر ابنهم شادي.
■الجبهة الشعبية أدانت جريمة قتل رفيقهم وتوعدت اللي طخوه وطلبت القصاص.
■الداخلية وزعت أسماء وصور اللي نفذوا عملية القتل عشان يسلموا حالهم ومستجابوش.
■الفصائل كلها والقوى بغزة وزعت بيان بتدعوا فيه انه محدش ينجر ورا هذه الملفات وفتحها.
■توفى مبارح الشب الغلبان الجدع محمد وليد الهمص من رفح ،اللي ضربته الكهرب قبل أسبوعين تقريبا وهو بيصلح السلوك بشغله..الله يرحم روحه.
■عيلة ضهير أعلنت عن ا.ستشهاد بنتهم أسين ضهير برضه برفح؛ متأثرة بإصابتها بحرب ال 2014م.
■بالضفة سكروا الحركة خالص بكل المدن من التمنية بالليل للست الصبح.
■منعوا برضه كل الأعراس والحفلات والبرز .
■الأمور بالضفة صارت صعبة بزيادة بالنسبة للكورونا والسيطرة قاعدة بتفلت شوية شوية خاصة بالخليل.
■الرئيس أبو مازن تكفل بيدفع تكاليف القراية لسبع تواءم بالضفة وغزة بشكل كامل طول فترة الجامعة.
■السنة هذه لسة مقابلتش ولا حد ساقط بالتوجيهي بتحس انه كل البلد ما شاء الله نجحت.
■الضغط لسة شغال على صدور الحلويات والككسة لتعون التوجيهي .
■أربيعن حالة وفاة صارت عنا من الكورونا معظمهم من الخليل المنكوبة.
■ع ذمة اللي نقل القصة واحد حالف طلاق على مرته انه يجيب فدعوس عشان يزف ابنه اللي سقط بالتوجيهي بغزة.
■بيقلك غزة باليومين اللي فاتوا اشتروا ب2مليون شيكل حلويات.
■الجمعة هذه حيكون الناس عالبحر أفواج أفواج ..طشة النجاح هذه .
■اليوم حتعلن الحكومة عن موعد بداية الفصل الدراسي الجديد.
■السنافر يحضروا حالهم لشرية أواعي التجميس والنظارات الشمسية عشان يروحزا يسجلوا بالجامعة.
■بتحس انه النسوان الهم يومين ملخومات بالتوجيهي وبطلوا يطبخوا لأولادهم ولا حاجة بيمشوها مقالي وسندوتشات.
■امتحانات التوظيف قاعدة بتشطب ،والله يوفق عالشباب ويريح بالهم.

يسلموو لنقل الاخبار مؤمن
ماننحرم مجهودك

سنين النا بنسمع أخبار على الريق

نفسنا نسمع شي خببر حلوو

الله المستعان

مشكور على الادراج مؤمن

الله يعين الناس
عوافى الك

الله يعين الناس
عوافى الك

كل الشكر و التقدير

اخبار تألم القلب
واقع نتعايشه
شكرا مومن

لا حول ولا قوة إلا بالله
شكرا مؤمن

يسسلمموو مسسيوو ممؤمنن
وردهه

الاخبار نصها بتغم وشكله كاينية هاليومين نكبة رفح الجديدة
الله يرحم الجميع
يعطيك العافية لادراجك ..