أخبار_عالريق

#أخبار_عالريق 806 يوم
✅يكتبها / #سعيد_الطويل

■الله وكيلك.. تقول الأربعينية رجعت من أول وجديد ،الجو بيشفشف تشفشف من السقعة.

■حسب ما قريت ع صفحات الأرصاد انه بكرة كمان جايينا موجة سقعة جديدة ومعاها مطرة.

■المهم في 2000 تصريح جديد جاهزات منهم 1000 للعمال إللي سجلوا عرابط وزارة العمل بغزة.

■اليوم ان شاء الله حيتسهل أول فوج من معتمرين من غزة عن طريق معبر رفح.

■المعبر حيكون اليوم وبكرة فاتح للمعتمرين..لكن المروحين ع غزة عادي شغال فش فيه مشكلة.

■الوكالة بتقول انه فش عندها طحين بمخازنها إلا ع قد هذه الدورة تبعت الكابونات وبعد هيك إلنا الله..

■بالضفة أعفوا المخابز وأصحاب المطاحن من ضريبة الطحين والخبز لمدة 3 شهور.

■كيس الطحين أبو 50 كيلو حقه 102شيكل بغزة.

■بيقلك 35% بس من سكان قطاع غزة بيشربوا مية حلوة والباقي بيسلكوا حالهم .

■ كوخافي الهامل بيقلك إللي عملناه سنة 2002 بالضفة ممكن انه نعمله في 2022 بغزة ،أصلا غزة والضفة علموا عليك .

■3 مليون بيضة بيستهلكها أهل غزة كل شهر

■موسم اللوز المسروق خلص ،وبلش موسم اللوز أبو الوقية بعشر شواكل.

■لازم وزارة الاقتصاد تعمل جولة حلوة على مخازن المخللات قبل رمضان عشان شفت شوفة عاطلة بطريقة كبسهم.

#صباح_الخير للناس اللي بنحب نتصبح فيهم وبنشبعش منهم ولا من صباحهم ،إللي بنحس انهم قراب من روحك أكثر من أي حد ثاني ..

#صباح_الخير للبنت البكرية النشيطة إللي بتسد مكان أمها الصبحيات قبل ما تطلع على شغلها وبتريح أمها من تلت ترباع شغل الدار

#صباح_الخير لكل ابن جدع بيقف مع أبوه بمحله وشغله بقلب ورب ..

#صباح_الخير للناس إللي بتستنى بشهر رمضان عشان تفتح مصلحة تسترزق منها حتى تحسن أحوالها . ربنا يرزق الجميع ..

الاثنين 14-3-2022 🌹
كيف اليوم النشرة فش فيها مقت ونشاف ريق صح ؟

-الصورة من غزة ..

الله يفرجها يا رب

مشكور على الإدارج و المتابعة

السلام عليكم ورحمة الله وبركاته



يسلمووووا ع الاخبارة المنوعة والمتابعة



يعطيك الف عافية


بانتظار جديدك دائما



تحيتي

يعطيك العافيه مشكور أخي

كل الشكر والتقدير

الله يفرجهاا يارب
يسلموو ع الأخبار المنوعة
والمتابعة الجيدة أخي
ربي يسعدك ويحفظك
طابت مساءاتك

ييسسلمموو الاممييرر
+ وردهه