أخبار_عالريق 503 يوم

#أخبار_عالريق 503 يوم
✅يكتبها/سعيد الطويل
■الجو اليوم حيكون أشوب من مبارح ،يعني يا دوب المروحة تجاوب معك حتى لو قعدت ملزق فيها تلزيق .
■بالنسبة لشيكات الشؤون ،الوزارة بتقلكم لسة الأمور مش واضحة ،انها حتنصرف قبل عيد الاضحى .
■المنحة القطرية حتبين هاليومين شو نظامها ،بس شكلها حتكون الأسبوع الجاي بالبريد.
■عموما مبارح دخل البترول تبع قطر ومن اليوم حيصير جدول الكهربة تمنية بتمنية 8*8 ع قولة الشركة..
■صحيح لو فاكرين، زي اليوم قبل خمسطعشر سنة تقريبا اليهو د بلشوا بخطة قطع الكهرب عنا بعد ما انخطف شاليط بكم يوم.
■عيلة بنات بالخليل بتحمل الحكومة والأجهزة مسؤولية مقتل ابنها وبتطالب بلجنة تحقيق من الأمم المتحدة.
■وزير العمل قدم استقالته من الحكومة ومقبلوهاش.
■انتخبوا الرفاق أحمد مجدلاني كمان مرة أمين عام لجبهة النضال
■مبارح افرجوا عن الشيخ خضر عدنان من بعد فك اضرابه وانتصر.
■الغضنفر أبو عطوان صارله فوق ال55 يوم من غير أكل ولا شرب ومضرب عن الطعام بالسجن وقضيته محدش متطلع الها للأسف .
■اليوم أول يوم حيفتح فيه الأسواق الشعبية بغزة بعد ما تحررت آخر معاقل الكو رونا
■في 800 ألف لقاح خربانات اسرائيل بتدور على حدا يشتريهم من أي دولة.
■ إسبانيا طلعت ع ربع نهائي أمم أوروبا بعد فوزها الفاقد على كرواتيا بخمسة قوان مقابل تلاتة .
■اشتية بيقول أي حد بتثبت علاقته بقضية نزار حنحوله عالقضاء على طول
■عباس زكي حكا انه احنا تفاجئنا بجريمة مقتل نزار بنات، وحق العيلة عنا حنرجعه زي ما بدهم.
■واحد طابش مرته بالمتكة عشانهم متقاتلين ،مين ياخذ المروحة أم البطارية جنبه.
■امتحان الحساب ضلوا منكد عطلاب التوجيهي وجايبلهم مغص لآخر النهار

ما علينا خذلك #هالنصحية لوجه الله تطلعش من غير ما تحط ريكسونا ولا أي مزيل عرق ،أو حتى تمسح حالك بورق معطر ،لإنك لو معملتش هيك حتاكل مسبات لما ينهري وبرك ..

#صباح_الخير لأم العبد اللي حتقوم اليوم تفطر جوزها شوية مناقيش بزعتر ع طنجرة الكهرب مع شوية زتون وكاسة شاي حلوة بالنعنع

#صباح_الخير للحجة أم آلاء ،الأم إللي ضلت قاعدة ع باب المدرسة تدعي لبنتها وهيا بتقدم امتحاناتها ،ربنا لا يضيعلك تعب لا إلك ولا لبنتك يا حجة

#صباح_الخير للحج أبو ناهض الراجل الطيب إللي بيقوم من الصبح بيتسوق لكنياينه طبخة اليوم وبيجيب لأولاد ابنه الفاكهة إللي بيحبوها ..

#صباح_الخير لكل ولد صغير نام وهو بيتمردغ عالبلاط من شدة الشوب ونام وعرقه بيصب صب عشان قاطعة الكهربا..

#صباح_الرزق وراحة البال 🌹
الثلاثاء 29 -6-2021