أخبار_عالريق

#أخبار_عالريق 504 يوم
✅يكتبها /سعيد الطويل
■عموما اليوم الجو حيكون أشوب من مبارح وأوله كمان ،ومن قصيرها خذوا الأولاد واطلعوا عالبحر بعد العصر لانه حتى المراوح صار هواها يطلع سخن ..
■لسة بيقلك يوم الأحد الجاي حتوصل درجة الحرارة للأربعينات يا معلم.
■وزارة الزراعة بتذكر تبعون مزارع الجاج ديروا بالكم يوم الجمعة الجو حريقة خذوا احتياطاتكم منيح وبدناش خساير والله يجبر عنكم.
■بصراحة حسيت انه في فرق بجدول الكهربا بعد ما أجا البترول القطري ،صارت تيجي أربع ساعات بدل ستة .
■أصحاب مواتير الكهرب ،قاعدين بيتناقشوا مع سلطة الطاقة كيف بدهم يرفعوا سعر كيلو الكهرب الأيام الجاية.
■مصاري العمادي ع قولة ابن أم خالد حماة وليد ابن أم صهيب ،بيعدوا فيهم بالشنط وحيدخلوهم بكرة آخر النهار .
■سلمت مبارح اللجنة التقرير النهائي لمقتل نزار بنات للحكومة.
■وزارة العدل بتقول انه في دكتور من العيلة حضر التشريح ،وحيتحول كل المتهمين عالقضاء.
■اليوم سوق الأربع حيلعلع بخانيونس تعلعلع والكوورنا حتتفعفل من الضحك.
■المهم في كم خبر مهمات بدنا ندوشكم فيهم ،الأ سير الغضفنر أبو عطوان صحته تعبانة عالآخر ،إله 57 يوم ما أكل ولا شرب ومضرب عن الطعام عشان حريته.
■وفي بحي البستان مبارح اليهو د اقتحموا المنطقة وهدوا محل أقدم من عمر دولتهم ،وهيهم بدهم يكملوا هدم لباقي البيوت.
■الأمم المتحدة والأردن ،بيطالبوا اليهو د انهم يوقفوا هدم في القدس
■فاجعة بتوجع القلب ،توفى الدكتور الفلسطيني المغترب منذر إبراهيم قعدان وزوجته نسرين شلهوب وأولاده أمير وإمام جراء تسرب غاز جوا شقتهم بدولة المجر .
■طالعلك طقم نشيطات عالانستا ،حيدمروا الدمامير ع قولة عدولة ،حاذفين كلمة محتوى من قاموسهم خالص الله وكيلك.
■للناس إللي ما تابعت البطيخة تبعت الناشطة المشهورة حمرا ولا بيضا تابعوا البث المباشر الها يوم الجمعة بعد المغرب عشان تكسبوا أجر .
■الوكالة بلشت توزع مصاري بدل ايجار وشغلات ثانية عالمتضررين
■اليوم أبطال التوجيهي حيقدموا الورقة الثانية من الرياضيات ، والثقافة العلمية لجماعة الأدبي الله يكون إلهم معين .
■السنطروزة اتنين كيلو ونص بعشر شواكل
■أوكرانيا غلبت السويد بقونين نظاف ، وطلعت ع الربع النهائي بكأس أمم أوروبا.

المهم خذلك #هالنصحية بهيك جو ،،
الله يرضى عليكوا محدش لما يجيه ضيف يعمله لا شاي ولا نسكافيه جيبلك كم علبة كولا كلوب وخبيهم بالفريزر منيح عشان تبيض وجهك قدامهم ..

#صباح_الخير للناس اللي بتحمل بوجها الخير بتقاسيم ضحكتها وابتسامتها حتى لو ما معها ولا شيكل بجيبتها ،ومفلسة وضاوية وماكلة هوا ،بس هذه الناس بتلاقي ضحكتها دايما مفرودة وحاضرة وبيحملوكلاش جميلة فيها،ببلاش هيك يعني،الله يكثر منهم ويعطيهم لما يرضيهم ..

إذا وصلتكم نشرتنا اليوم صبحوا علينا مش حتخسروا حاجة يعني ..

#صباح_النشاط #صباح_الرزق 🌹
الأربعاء 30-6-2021

مشكور أمير ع المتابعة

شكراً لك ع المتابعة

تانككيوهة أممييرر "))

مشكور للمتابعة و النقل امير
تقديري

■فاجعة بتوجع القلب ،توفى الدكتور الفلسطيني المغترب منذر إبراهيم قعدان وزوجته نسرين شلهوب وأولاده أمير وإمام جراء تسرب غاز جوا شقتهم بدولة المجر .
هاد الراجل بعرفو معرفة شخصية الف رحمة ونور تنزل على روحه الطاهرة
يعطيك العافية ع المتابعه

السلام عليكم ورحمة الله وبركاته



يسلمووووا ع النشرة الاخبارية المنوعة والمتابعة



يعطيك الف عافية


بانتظار جديدك دائما



تحيتي