أخبار_عالريق 331

#أخبار_عالريق 331
✅يكتبها/سعيد الطويل
■رجعنا للتسكير والتشديد والمناطق الحمرا من أول وجديد في قطاع غزة.
■قرارات جديدة لنج طلعتها الداخلية مبارح بالليل عشان الكورونا ،طبعا غير الاتفاق تبع المخاتير اللي كان قبل يومين.
■سكروا كل الجوامع بالشمال والتركمان والتفاح والدرج وشوية من النصر والنصيرات وكمان حي الأمل بخانيونس.
■بيقلك ممنوع تعملوا أعراس وأفراح لا بالشارع ولا بالبيوت ،وأي فرح حتشوفه الداخلية حتحبس العريس 14 يوم.
■كمان وقفوا تجمعات بيوت العزا وخذوا العزا بالمقبرة وربنا يرحم أمواتنا وأمواتكم.
■اللي بيطلع من داره وبيتحرك برة وهو محجور حينحبس تلت تشهر.
■رفح فش فيها ولا نقطة حمرا ،ولا منطقة مسكرة ،أمورها لوز حتى الآن.
■اليوم العدد اللي حتعلن عنه الصحة فوق ال250 حالة جديدة بقطاع غزة،وربك يستر.
■وزارة الصحة بتأكد انه عنا عشرين حالة صعبة جدا منها تسع حالات محطوطة ع أجهزة التنفس وهذه حاجة خطيرة .
■سلطة النقد بتقلك انه رصدنا تحسن ملموس على الاقتصاد الفلسطيني ،يمكن قصدهم عالأندومي.
■غانتس بيقلك انه فش ولا مشروع حينعمل بغزة ولا نزبط الوضع عندهم الا لما نلم السلاح ويسلموا الجنود تبعوهم .
■يا جماعة الخير اليوم البطل ماهر الأخرس اله 100 وكمان تلت تيام ورا بعض وهو مضرب ،ادعوله لأنه الأمل بس بوجه الله انه يتحرر وهو عايش.
■بانتخابات أمريكا لسة بايدن فايز على ترامب بعدد أصوات "المجمع الانتخابي" بـ253 صوت مقابل 213 صوت.
■بلدية رفح أعدمت تسعين جاجة عيانة بالسوق المركزي.
■مبارح مطرت عنا شويتين غرقت نص شوارع البلد.
■ ببريطانيا وهولندا أعدموا آلاف الطيور بعد ما اكتشفوا بؤر لانفلونزا الطيور،مش ناقصة القصة .
■تحرر الأ.سير عبد الرؤوف قعدان من رفح،بعد سبعطعشر سنة من الظلم عن اليهود.
■حكمت المحكمة مبارح غيابياً بالإعدام شنقاً عالزلمة اللي قتل موسى أبو نار بدير البلح قبل احدعشر سنة.
■ الاتحاد الأوروبي قال مبارح بتصريح انه بيبذلوا كل الجهود عشان يحولوا مصاري الشؤون لسة الشهر الجاي 🙄 .
■البندورة والخيار الكيلو بأربعة شيكل والقمبا بسبعة الكيلو ،الله وكيلك ،يعني صحن السلطة بيكلفك قد نص كيلو صدر حبش يخوي .
■الجاج اليوم باطنعشر شيكل ونص الكيلو بالسوق.
■عاملين عرض على الشيبسي تبع الحجم عائلي ابو التلاتة شيكل بيادي عليه بشيكل بس مشفتش تاريخه وكتيش بيخلص.

#صباح_الخير للبياعين عالكرات والتكاتك اللي بيلفلفوا من الصبح ع رزقتهم ورزقة وأولادهم عشان يروحوا بحق أكلة الجمعة.

#صباح_الخير للشب اللي مخلص علوم وقاعد بيبيع كلور وسائل ومعجون جلي وبيزعق بالمكرفون ،ولمهندس الكمبيوترات اللي أبوه باع اللي قدامه واللي وراه عشان يعلمه ،وبالآخر داقت فيه الظروف واشتغل عسيارة عالخط .

#صباح_الخير للبنت الجدعة اللي خلصت معلم صف وملقيتش شغل وعملت مشروع حلويات ومعجنات صغير ع قدها من دارها عشان تساعد أبوها المريض .

#صباح_الخير لأمي تاج راسنا اللي عاملة مفتول وعازمة أولادها وبناتها بقرارات من أبوية .

😑والله لا يصبحهم بالخير الناس اللي بتحسد غيرها ع رزقها وحياتها وبتتطوع تكتب التقارير بالعباد عشان يقطعوا أرزاقهم.

#جمعة_مباركة
واكسبوا معنا الصلاة عالنبي🌸🙏
اللهم صل وبارك على سيدنا محمد
6/11/2020

متابعه مميزه لااخبار
ماننحرم

ههههه آخبار بتفرح
نشرة سعيد الطويل بحب آقرأها
شكرا ع المتآبعة

	السلام عليكم ورحمة الله وبركاته يسلموووا ع النشرة الاخبارية المنوعة يعطيك الف عافية بانتظار جديدك دائما تحيتي