أخبار_عالريق

#أخبار_عالريق 469 يوم
بعد السحور ✅يكتبها/سعيد الطويل
■خلص فش انتخابات ،الانتخابات تأجلت عشان اليهو د مش راضيين يعملوها بالقدس .
■كل الدنيا انقلبت وكل الفصائل رفضت التأجيل إلا أبو مازن و مجدلاني وكم حزب من الصغار حضروا الفطرة والاجتماع.
■تلاتة وتلاتين قائمة نزلوا بيانات رفض واستنكار للقرار ،وقالوا عالأقل خلينا نحاول وخليها تيجي من اليهو د مش منا قصة التأجيل .
■المهم لجنة الانتخابات ما صدقت وطلعت قرار وقفت فيه الانتخابات .
■و ع قولة ابن أم عطية إللي كان متأمل خير بالانتخابات ،شكلنا حنستنى خمسطعشر سنة جديدة.
■المهم اشيتة حيقدم استقالته وحيشكل أبو مازن حكومة جديدة.
■بيقلك سلام فياض ممكن يرجعوه ثاني رئيس وزراء من أول وجديد.. عشان مقطوع وصفه.
■ فوق الأربعين قتيل وميات الاصابات من المستو.طنين بعد ما انهار فيهم جسر حديد بجبل الجرمق.
■مصاري منحة العمادي حتوصل الأسبوع الجاي،والتوزيع قبل العيد اذا مصارش جديد .
■شيكات الشؤون موعدها بعلم ربنا .
■الصيد رجع لل15 ميل ببحر غزة ،وان شاء الله السمك يكون اليوم حبطرش.
■اليهو د اعتقلوا مبارح أربع شباب من شرق خانيونس ورجعوهم ثاني بعد كم ساعة.
■الأوقاف عملت آلية جديد للاعتكاف برمضان في الجوامع.
■ الصحة بالضفة بتقول صار عنا طفرات بريطانية وجنوب إفريقية وبرازيلية وان شاء الله متوصلناش الهندية لإنها حتدمر الدنيا .
■اليوم وبكرة ممنوع السيارات تتحرك طول اليوم بالشوارع.
■كيلو الجاج بتسعة شيكل .

#صباح_الخير للناس إللي تأملت خير بإنه تصير الانتخابات ويتغير هالحال ،وبالآخر كل آمالها راحت ع فشوش وربنا يعلم هالحال حيضل لوكتيش لسة.

#صباح_الخير للقدس وأهلها إللي محدش بيقصر فيها ولا بيتنازل عنها ،ولا عن أصغر حجر ولا حتى رغيف كعك فيها.

#صباح_الخير لأم نسيم إللي جوزها قبض راتب التقاعد مبارح وجابت كل نسايبها عندها وبناتها تلت تيام الحجر فطرتهم الخميس ولسة حيكملوا عندها الجمعةو السبت و ويتسهلوا الأحد الصبح ،والله يعنيها.

#جمعة_مباركة 🌹
وصلوا عالنبي محمد صلى الله عليه وسلم
18_رمضان ..آخر يوم بشهر 4