أخبار_عالريق

#أخبار_عالريق 786 يوم
✅يكتبها/ #سعيد_الطويل

■جارنا الشب الطيب محمد عابد الملقب #جعفر بالعشرينات من عمره استــ ـشهد مبارح وهو بشغله بنفق في رفح.

■بدهم يبعتوا عشر آلاف واحد فلسطيني يشتغلوا في ليبيا الفترة الجاية.

■مكافحة خانيونس مسكت 74 فرش حشيش ،شكلهم كانوا مجهزات لسهرة الخميس وانضربت .

■المباحث مسكت شب ناصب على واحد سعودي بسبع آلاف دولار برضه بخانيونس

■مسكوا 27 مشطاح شوكولاطة خربانة بمعبر كرم أبو سالم ،كانت حتخش ع غزة ،كان إللي خاطبين جداد راحوا فيها.

■الشرطة برام الله حررت زلمة كان مخطوف من ناس بدهم منه مصاري.

■ 300 شرطي نزلوا عالخليل عشان يفرضوا الأمن فيها ،ويحلوا مشاكلها ،الله يهدي البال.

■لقيوا صحفي إسرائيلي بيشتغل بالقناة 12 العبرية مقتول في أحراش القدس ومحدش عارف السبب.

■الأسبوع الجاي الوكالة حتدفع تعويضات ل300 عيلة تضررت بالحرب بغزة.

■حكومة غزة حتدفع 2000 شيكل لكل موظف تضرر بالحرب عشان يدفع ايجار وتنخصم من المستحقات.

■20 حالة وفاة من الكو رونا مبارح بفلسطين.

■الجو حيضل مرتب هاليومين وحتيجي شوية مطرة أول الأسبوع الجاي والله أعلم.

■بنك فلسطين ربح ب2021 بس 56 مليون دولار.

■قطر حتتبرع بكمية كابونات جديدة لقطاع غزة الفترة الجاية.

■فش موعد لرواتب الشؤون والمنحة القطرية حتبين أمورها الأسبوع الجاي .

#صباح_الخير حتى لو متأخرين شوية
و #هلا_بالخميس حتى لو شبه يوم الأحد

17-2-2022🌹