أخبار_عالريق

#أخبار_عالريق 658 يوم
✅يكتبها/ #سعيد_الطويل

الأخبار اليوم مش شد ايدك ،مع الفضاوة والناس وهيا قاعدة بالدور زهقانة ولابدة تحت الحرامات عشان المنخفض ،صارت تطلع اشاعات وخراريف كلها كذب ويفتشوا بالدفاتر القديمة على نكتة ولا قصة هان ولا هناك ..زي قصص #حدث_في_غزة اللي عالجروبات ومعظمها معط وهشت زي معطات #أبو_فؤاد وهو قاعد عند نسايبه ..

المهم عشان ما ندوشش روسكم عالصبح بالنسبة للجو اليوم سقعة بزيادة وتطلعوش إلا للضرورة ودفوا حالكم منيح ،وتغسلوش عشان الغسيل بده اسبوع لما ينشف ،والأيام الجاية المنخفص حيشد حيله كمان شوية ، والأرصاد بتوصي انه المدارس الأيام الجاية يصير دوامها عالساعة تسعة فترة المنخفض.

السياسين والمسؤلين مصرحوش مبارح ولا حاجة مفيدة ،فش غير شوية خراف عن طشتهم الجديدة لحوار الفصا،ئل بالجزائر

فش جديد بموضوع الاعمار ولا بشيكات الشؤون،، وعشان الناس إللي سألوا ..
بنت أم تيسير لسة حردانة وأبوها بدوش يرجعها إلا لما يرجع جوزها الذهب تبعها والذهب انباع وجاب فيه سيارة عالخط والسيارة قديمة وفرط ماتورها ..والأمور تعقدت

وبالنسبة لأبو حازم الميكانيكي ناوي يتجوز الثانية بالمصاري إللي أخذهم دين من عديله أبو يسري، والدنيا عنده مولعة بالدار ..

المهم اليوم فش حاجة مفيدة بكل أخبار البلد إلا انه كسبنا نصبح عليكم عالريق ونقلكم #يسعد_صباحكم 🌹

السبت 15-1-2022