أخبار_عالريق

#أخبار_عالريق 617 بوم
✅يكتبها/ #سعيد_الطويل

■الله يصبحكم بالخير والسعادة قبل أي حاجة ،وبكل الأحوال شكله الأسبوع الجاي حيكون في أخبار حلوة وشوية بحبحة للناس مصاري ع تصاريح ع رواتب .

■العمادي وأولاده ونائبه الحردان وصلوا مبارح بعد العشا ع غزة وحيقعدولهم كم يوم يزبطوا الوضع ويتسهلوا.

■بدهم يصرفوا يوم الثلاث الجاي ل5000 اسم جديد مساعدة مبادرة عيلة وحدة

■احتمال كبير اليــ ـهود يوافقوا على 500 تصريح جديد للمسيحية اللي بغزة عشان يروحوا يحضروا احتفالات راس السنة بالضفة.

■الوكالة رفعت التجميد تبع العلاوات للسنة الجاية ،يعني حيزبطوا الموظفين بالزيادات.

■لكن في خبر ثاني بيحكوا فيه ع جروبات الوكالة انهم ناويين يوقفوا رواتب الموظفين بال3 تشهر تبعت الاجازة. ان شاء الله يطلع مش صح.

■توفى راجل عنده برقبته عيلة بعد ما وقع وهو بشغله من العمارة.

■توفى شب ثاني بحادث سير بالضفة وفي كمان أربع اصابات

■هشام أبو هواش صارله 99 يوم مضرب عن الطعام ومعه اسير ثاني اسمه لؤي الأشقر دخل بيومه ال46

■اليوم حتكون الجلسة الأولى بمحاكمة المجرم إللي اغتصب بنت أخوه برفح

■يائير بيطالب انهم يسكروا مكاتب 7.ما,س في تركيا.

■محكمة العدل الأوروبية بتأيد انه 7.ما,س تضلها ع قائمة الارهاب

■الصحة العالمية بتحذر من احتمال تسجيل 700 ألف حالة موت جديدة
بـكو رونا" في أوروبا الفترة الجاية

■بس بيوم واحد فوق ال100 حالة وفاة وأكثر من 10 آلاف اصابة كور ونا جديدة بإيطاليا واحنا بنفكر القصة خلصت.

■وصلوا الشحنيات تبعات المستشفى الاماراتي مبارح من معبر رفح.

■اليوم حيكون اضراب في معظم مؤسسات الوكالة هان وبالضفة والاردن ولبنان كمان

وع قولة صاحبنا #أبو_فؤاد السوق بيزق حاله زق ،والحركة يادوب ممشية حالها ،فش ولا حاجة ماشي سوقها إلا الجرابين ومكياجات النسوان ،والسواقين تبعون الخط طفرانين حالهم وصايرين شوية منهم ينسوا يرجعوا باقي الأجار للركاب ، وأصحاب البسطات مع جو الشتا والسقعة الله يكون بعونكم البيع مرمطة بس لقمة العيش مرة ، والروضات كل شوية بتبعت بدها باقي الرسوم ، والجامعات بتسكر الصفحات عالطلاب ،والمحاكم مليانة قضايا طلاق والفليفلة بخمسة شيكل الكيلو ومش راضية ترخص والعدس صاير ملازم بيوت المخيمات، وشواحن الجوالات الأصلية بطلت تكمل معاك الشهر ،ولليوم عجزوا العلماء عن سر ضياع فردة الجرابين الثانية ..

عموما #صباح_الخير_والزرق 🌹
والله ينولك إللي ببالكم

الأربعاء 24-11-2021

يعطيك العافية علي المتابعه
تحياتي

شكرا الامير
عناوين لها بعذ كبير

ييسسلموو الأممييرر
وردهة

السلام عليكم ورحمة الله وبركاته



يسلموووا ع النشرة الاخبارية المنوعة


يعطيك الف عافية


بانتظار جديدك دائما







تحيتي

متابعة جيدة أخي
يعطيك ألف عافيه
ربي يسعدك