أخبار_عالريق

#أخبار_عالريق 515 يوم
✅يكتبها/سعيد الطويل
■المعابر فاتحة سداح مداح لكل حاجة إلا أغراض البنا ،وبهيك بيكون عرس ابن أم خليل حيتأجل عشان متشطبتش شقته لسة
■حريقة صارت مبارح بالقسم الوبائي في المستشفى الأوروبي ،وربك ستر سيطروا عليه وفش اصابات.
■الشخرة بيقلك جايالنا موجة كوو رنا رابعة ،فش فيها مسخرة.
■إللي بده سلفة مصاري مستردة بتزيدش عن 300 شيكل من موظفين غزة ،بيقدر يروح عالبنك ياخذها بس حتنخصم طبعا من راتبه.
■الله يخلف عليها وزارة الصحة إللي بالضفة بعتولنا فوق ال100 ألف جرعة تطيعم روسية ع غزة.
■مبارح خشت غزة أول نقلة أواعي وترنقات وشوالات وبكسرات ،يعني كلها كم يوم والعروض حترجع تشتغل من أول وجديد.
■ع كلام الاعلام العبري بيقلك أبو مازن حيتقابل مع هرتسوغ الرئيس تبعهم بعد العيد.
■الامارات فتحت سفارتها بتل أبيت باحتفال من إللي يحبه قلبك .
■المهم الفصا ئل بغزة نزلت بيان أدانت فيه الموضوع .
■العمادي روح من غزة العصريات ورجع ثاني بعد العشا،وع ذمة بياع الذرة راح يكوي جلبياته ويرجع.
■7 ماس بتحذر اليهو د من المساس بالمسجد الأقصي،خاصة بمسيرة المستو طنين إللي بعد كم يوم.
■أبو نادر وأبو عادل تقالتلوا عالضحية وأبو نادر سحب نسيبه من الشراكة ، وزعل من أبو عادل ،المهم عجلهم صار ناقص حصتين لو حد بده بعطيكم الرقم.
■كهرباء غزة بتقلكم انه نسبة 57% عجز في الطاقة،سبحان الله نفس معدل التوجيهي تبع مراد ابن أم وليد
■ 50 حالة جديدة مصابة بمتحور دلتا "الطفرة الهندية" بالضفة ،الله يستر ما توصلنا.
■لحتى الآن ضايل خمس تيام للعيد وفش أي أخبار رسمية عن شيكات الشؤون والمنحة القطرية.
■اتحاد الكرة قرر بشكل رسمي انه يقيد اللاعب عماد فحجان في صفوف شباب رفح
■لو خشت المراوح اليومين الجايات حتصير أم المية و أربعين بتسعين شيكل ،إللي بده يشتري يستنى كم يوم.
■وع قولة إللي قالتها بنفعش يختي تنزلي عالفيس سامحوني يوم عرفة وتجمتعي تالت يوم العيد عند أهلك تشلي عرض سلفاتك.
■معظم الكعك إللي بتشوفوه منشور عالصفحات والستوريات شرية يا معلم ؛مش لهل الدرجة صارن كل بالبنات معدلات مرة وحدة.
■المهم الجاج لسة سعره زي مهوا والخضرة بتلاتنين شيكل بتعبي ثلاجتك ماشي حالها .

👈وبآخر الاسبوع خذلك هالنصيحة يخوي
خليك زي شركة الكهربا بالضبط آخر همها كلام الناس ...

صباح الخير متأخر شوووية ..
و #هلا_بالخميس 🌹
الخميس 15-7-2021