أخبار_عالريق

#أخبار_عالريق 530 يوم
✅يكتبها/سعيد الطويل
■مبارح بلش بأخبار قصف وانفجارات بلبنان وانتهى كمان بقصف وانفجارات بغزة ،يعني يوم جمعة كان مش زي أي جمعة ،كان في شوية أحداث وتصريحات وشوية أكشن .
■المهم مبارح صحينا على صوا ريخ طالعة من لبنان وصوا ريخ نازلة عليهم من اليهو د
■حز ب الله أعلن مسؤوليته هذه المرة ومخافش و حـ.ـסــاس و الجـהــاد باركولهم.
■ما علينا المهم بعد نص الليل أبصر مين فجر عبوة صغيرة جنب منتجع بيكانتو الجديد اللي فتحوه بشمال غزة ،وربك ستر ما صار اصابات.
■فش فرق كبير بالوقت ،صار بعد هيك قصف من طيارات اليهو د برضه بالشمال على موقع وبعدها نزلوا البيان على وجه الفجر انه ردوا ع قصة البلاليين.
■استشهد مبارح راجل غلبان من بيتا بنابلس عنده أربع تنفار اسمه عماد علي دويكات وعمره تقريبا (37 سنة)
■توفى برضه بالشجاعية شب مش كبير بالعمر اسمه هاني شاكر المغني بشكل مفاجئ.
■المهم مبارح كانت لجة الصبح ع قصة الاولاد إللي نسيوهم أهلهم بشطنة السيارة ولقيتهم الشرطة ورجعتهم ،ديروا بالكم أولادكم يا جماعة الخير .
■ع كلام مجدلاني بيقول انه المنحة القطرية حتنصرف هذا الأسبوع.
■لسة فش أخبار رسمية عن رواتب السلطة وهاليومين حتكثر الاشاعات كمان ،واللعب بأعصاب الناس.
■الجاج صحيح رخص و الكيلو صار بتمنية شيكل .
■المانجا كمان تبعت العصير مبارح شريتها الأربعة كيلو بمية .
■مصطفى البرغوثي بيقلك بنفعش الوضع يضل هيك ،لازم نعمل انتخابات.
■الأسبوع الجاي حتصير الجامعات تنعف نعف طلاب للتسجيل أشكال وألوان ربنا يوفقهم.
■موجة الحر هذه لسة مشرفانا ومنورانا لنص الشهر تقريبا بس في استراحة كم يوم حيكون الجو يترخرخ شوية.

#صباح_الخير لكل حد صحي من الفجر عشان ينزل يسترزق بسوق السبت الشعبي..
للبياعين ،وأصحاب البسطات ولتبع الخروب الزاكي ، للي بينادي عالجرابين أم الجوز بشيكل ، وللراجل اللي بيجي من غزة يبيع مخلل فخم عند المفترق، واللي فارد بسطة طويلة عريضة لأواعي المواليد ،وللراجل اللي بينبح صوته وهو بيقول فرحي جوزك بعشرة شيكل ،ولتبع بسطة الأدوات المنزلية اللي سعره ع قد الحال ...
وتصبيحة كمان للزلمة اللي بينشف ريقه وهو بيزعق سم للعرس والفيران ودوا للصراصير ، ولتبعون الرابش اللي بآخر السوق ،وللنسوان الطيبات اللي بيبيعوا بسوق المصريين اللي جوا .
الله يرزقكم ويوسع عليكم ..ونهاركم سعيد

#صباحكم_سعادة 🌹
السبت 7-8-2021

تسلم ع الخبر وحسن المتابعه

ربي يعطيك الصحه والعافيه

وصباحك سعادة دائمه وراحه بال

كل الشكر والتقدير

مسا القلوب الجميله

يسلمو ع متابعه الامير

يسلمو الامير ع المتابعه
وعوافي ع جهودك

السلام عليكم ورحمة الله وبركاته



يسلمووووا ع النشرة الاخبارية المنوعة



يعطيك الف عافية



بانتظار جديدك دائما







تحيتي

ممتابعةة ممييزهةة
وردهة

تسلم لنقل والمتابعه امير