أخبار_عالريق 292

#أخبار_عالريق 292
✅يكتبها/سعيد الطويل
■اليوم اذا الله أراد بيبلش فصل الخريف وبنودع شوب وحر واليوم الطويل بفصل الصيف وبكل أسف رغم كل الي عملوا فينا حنشتاقله .
■تلت ترباع الصيف هذا الموسم ضرب بالأعراس والحفلات والتخرج والبحر والطشات والملاهي والسفر والجامعات.
■‏ملادينوف بيقول انه الصحة العالمية سلمت لغزة 20 ألف مسحة جديدة عشان فحص (كورونا).
■توفى مبارح تسع حالات جديدة بالكوورنا وفي كمان ستمية حالة اكتشفوها.
■بالنسبة للمشروع الجديد تبع السبعميت شيكل من البنك الدولي ،حيكون بس للضفة مش لأغنياء غزة.
■وفد من فتح فيه روحي فتوح والرجوب وصل تركيا عشان يقابلوا هنية ويزبطوا الأمور مع بعض.
■الرئيس أبو مازن اتصل بأوردغان وقله الشباب جايين عندك يقعدوا و يتفاهموا عالوضع دير بالك عليهم وحطوا بصورة الوضع.
■وزارعة الزراعة بدها تبطل تستورد البلح الأصفر من الأسبوع الجاي .
■الجوافة صارت الرطل بخمسين للعصير والفجم للأولاد الصغار 🙂 .
■الرطب النص رطل بخمسة وعرانيس الذرة مملية السوق والتسعة بخمس شواكل.
■الحية بيأكد انه احنا أعطينا اليهود مهلة بس شهرين لرفع الحصار.
■الشباب رجعوا ينفخوا بلاليين ويطيروهم بس لسة فش كميات زي قبل .
■ماتياس شمالي طابب يتصور مرة وهو بيوزع كابونات ومرة وهو بيلم الزبالة "الله يعزكم" شكلوا الزلمة ناوي ينزل انتخابات عن قريب.
■سلامة معروف بيقول انه فش لحتى الآن قرار بفرض رسوم لفحص الكورونا قبل السفر .
■قصة رسوم فحص الكورونا لو صارت حتعمل ضجة بالبلد .
■لسة فش قرار لا بفتح الجوامع ولا المدارس لهلحين ،كل القصة انه أم حسين كل شوية تنكد ع أولادها وتذكرهم بقصة المدارس.
■زيارات البنات لأهاليهم صارت سداح مداح ؛وفي مطالب لتشديد الحظر من اول وجديد عشان يرجعوا يشتاقلوهم زي قبل.
■الكويت بتقول انه فلسطين قضيتنا المركزية والأولى للعرب والمسلمين.
■فوق ال300أ.سير بسجن عوفر حيبلشوا اضراب عن الطعام الأسبوع الجاي.
■اللي صار مبارح بالمغراقة مناورة وواحد لقطها وسمعها من المخشير ونشرها ،وفش الحمد لله لا اصابات ولا شهد.اء .
■المحللين بيقولوا يا اما حيكون في صفقة تبادل الفترة الجاية يا اما اليهود حيغدورا فينا بحرب.
■حالات الكورونا الها كم يوم بتنقص عنا ما بتزيد، ان شاء الله تختفي ونرتاح.
■فش حاجة اسمها تعويض للناس اللي بتموت من الكورونا ،هذا كلام فاضي بيكتبوا واحد زهقان عالجروبات.
■سمك السريدة صار أرخص من طبخة البزيلا المجمدة .

#صباح_الخير للناس اللي مدندنة معاهم ومقبضوش لا من العمادي ولا من الشؤون ولا من وقفة عز ولا من المتضررين ولا من وزارة العمل ولا حتى طلع اسمهم بالملحق ،وصاروا شاكين بحالهم انهم مسلجين بكشف الوفيات..راجعوا يا جماعة الخير ويارب يكون عندكم مشكلة صغيرة وتنحل.

#صباح_الخير للعرسان الجداد اللي وفروا تكاليف العرس واشتروا فيها حاجات وأجهزة للدار وعبوا تلاجتهم شوكلاتات وعصير وحبشكتنات وركبوا ستاير جديدة.

#صباح_الخير للناس اللي بستنوا بكابونة الوكالة تصلهم من شهر وجاي ومضلش حدا الا وشحدوا من طحين والدكانة وقفت عليهم الدين وخلص الزيت والرز من عندهم ولسة الدور موصلهمش.

#صباح_الخير لعمال المخابز وعمال النظافة اللي مقعدوش ولا يوم عن شغلهم من يوم ما بدت عنا الكوورنا وشغالين على نفس واحد ،الله يعطيهم ألف عافية.

#صباح_الخير خص نص لأهل الثقة ،الناس اللي بنحبها وبيحبونا بدون سبب ولا مصلحة ،الناس اللي لا بتبرم بظهرك ولا بتخلي حد يحكي عليك .

#يسعد_صباحكم_بالرزق_والسعادة⚘
الثلاثاء 22/9/2020