أخبار_عالريق

#أخبار_عالريق 821 يوم
✅يكتبها / #سعيد_الطويل

■الجمعة الأخيرة قبل ما نستقبل رمضان الكريم ،الشهر المليان بركة وخير وان شاء الله يكون فيه راحة بال للجميع.

■اليوم أول يوم بشهر 4 أربعة ، ربنا يجعله فاتحة خير ورزق لكل متضايق ومحروم .

■يعني اليوم ممكن نلاقي تلت ترباع إللي عالفيس ناشرين منشورات كذب عشان اليوم كذبة نيسان ، ع أساس انه طول السنة فش كذب يعني .

■مبارح شيعنا عريسين جداد من مخيم جنين (سند ويزيد) بعد ما قتلو.هم اليــ ـهود لما حاولوا يقتحموا المخيم.

■شب ثالث جدع اسمه نضال جعافرة من بيت لحم خش ع محطة باصات للمستوطنين وطعن أربعة منهم واستــ ـشهد بمكانه

■طوشة بين عيلتين في رفح انقتل فيها راجل عمره اربعين سنة اسمه موسى بن حسن.

■عيلة الدباري نزلت بيان تبرت فيه من ابنها إللي قتل بن حسن.

■لقيوا كمان شب مقتول بالداخل المـ ـحتل اسمه ايمن بيادسة وهو مربط وايديه مقطعة.

■اليوم المغرب بالكثير بتبين إذا بكرة رمضان ولا لأ، بس فلكياً بيحكوا انه الأحد

■طوشة جامعة الأزهر بين الطلبة ببعض تجدد والأمور مش طيبة ،وبدها تدخل ناس حكيمة.

■أسعار البنزين والسولار غليت كمان مرة وكله ع ظهر المواطن الغلبان.

■المهم في عرس عاملينه اليوم ورمضان ممكن يكون بكرة كيف بفهمش.. ما علينا الله يهنيك يا نادر

■بيقلك فرح ابنك بخمسين شيكل ،فانوس عاملين عليه عرض بتحط صورة ابنك عليه ،يعني لو عندك 3 أولاد صغار بدك خمسين دولار تزبط الأمور.

■الأحد حتنصرف رواتب السلطة ان شاء الله

■غلابا الشؤون حيستقبلوا رمضان بحسرة وفلس وأمنيات كثيرة ،عشان المجدلاني والمسؤولين.

■بصراحة البضاعة كلها غالية السنة بشكل مش طبيعي

■أكثر الفتاوي والاشاعات بموعد الحرب بتسمعها وانت طالع بالسيارة وعند الحلاقين

#صباح_الخير للنفوس الطيبة إللي بتسعد لاستقبال احلى أيام السنة وأجمل طقوسها ،أيام الخير والبركة والأمنيات الحلوة واللمة الأحلى ،الله يبلغنا رمضان احنا واياكم وانتوا مجبورين الخواطر ولا فاقدين حدا عزيز ولا مفقودين من رحمات هذا الشهر الكريم

#جمعة_مباركة
واكسبوا بأول نهاركم الصلاة على النبي محمد صلى الله عليه وسلم 🌹

1-4-2022

عليه افضل الصلاه والسلام
يعطيك العافية

مشكور للمتابعة
تحياتي لك

يسلموو ع الأخبار المنوعة
والمتابعة الجيدة أخي
ربي يسعدك ويحفظك
طابت صباحاتك

اللهم صلِ على سيدنا محمد
يسلمو على المتابعة
عوافي

عليه أفضل الصلا و السلام
يعطيك العافيه ~♡

كل الشكر والتقدير

يعطيك العافية امير
يسلمو ع المتابعة

السلام عليكم ورحمة الله وبركاته



عليه افضل الصلاة والتسليم يسلموووووا ع النشرة الاخبارية المنوعة



يعطيك الف عافية



بانتظار جديدك دائما