أخبار_عالريق

#أخبار_عالريق 591 يوم
✅يكتبها/سعيد الطويل
■أول ما تفتحوا عينيكم بس تذكروا انه احنا بنعمة وغيرنا قاعد بيصارع الموت بس عشان حقه بالحياة والحرية ،7 أسـ ـرى مضربين عن الأكل والشرب لأكثر من 100 يوم ،منهم #كايد_الفسوس و #مقداد_القواسمي و #علاء_الأعرج دخلوا مرحلة صحية صعبة عالاخر بالمستشفى ،،بس ادعولهم لأنه الكل خذلهم ..وممكن يستشـהــدوا بأي لحظة ..

■توفى ولد زي الوردة اسمه جود عيد أبو ركن عمره "10 سنين " من المغازي بعد ما دهسته سيارة فلوكس مبارح قدام دارهم.

■توفى شب صغير غلبان من رفح عمره "18 عاماً" متأثر باصابته بعد ما ولع بحاله بنزين قبل كم يوم ..الله يغفرله ..

■الجو اليوم خريفي ومرتب عالآخر وفش شوب بالمرة ،ودرجة الحرارة أقل من الأسبوع إللي راح.

■قصة الأسعار اللي غليت مرة وحدة بالبلد زي السكر والعدس بصراحة صارت حديث السواقين ونسوان الحارة حتى الناس المروحة من الجوامع ،أكثر من أي موضوع ثاني بيحكوا فيه قيادات البلد

■وزارة الاقتصاد ع كلامها حبست تلت تجار عشان غلوا سعر السكر والبقوليات من روسهم

■وزارة الزراعة بتقول انه غزة بتحتاج فوق ال2.5 مليون جاجة في الشهر

■المرور حبسوا تسعطعشر سواق معهمش رخصة سواقة بغزة.

■الاتحاد الأوروبي تبرع ب 90 مليون يورو للوكالة ،عشان مضلهاش تقول فش مصاري .

■جيش الاحـتـ لال شكل وحدة جديدة بالضفة اسمها الاشباح 888 ،ان شاء الله شباب جنين بيعلموا عليها

■الجـהــاد بيقول انه النخـ،ـالة حسم معركة الأسـ ـرى بدون ما يروح لحرب عشان
اليــ ـهود بيعرفوا صدق أبو طارق

■مجدلاني صرح مبارح انه ممكن يكون في مشكلة بصرف رواتب الموظفين الأشهر الجاية عشان العجز المالي

■ البطل محمود العار ضة وضعه صعب ومحجوز بزنزانة فش فيها ولا حاجة بتنفع للبني آدمين

■بيقولوا انه فيه تخفيض ع أسعار ترخيص السيارات والرخص بغزة لنسبة بتوصل ل50بالمية واليوم في مؤتمر عشان يعلنوا

■العمادي بيقول حنشتغل بقلب ورب وننجز شوية مشاريع عالسريع قبل الشتا.

👈️وبنختم النشرة ببيت شعر ل #أبو_فؤاد بيقول ..يا حمص يا فول ..يا فطوري على طول ..يا بيض يا مقلي يا مطيري عقلي
ياعدس يا حبيبي يا منشفلي ريقي ..يا جاج يا غالي يا طالع بالعلالي.. ويا فستق يا حلبي يا بعيد عن طلبي ..

#صباح_الخير وربنا يهدي البال ويشفي الحجة أم محمد ويارب يطيب أبو خالد وان شاء الله بيشتغل عبد الله أبو بتطلعله بطالة عشان تخطبله أمه ..

#وقولوا يارب يتغير هالحال للأحسن
ولو دخلت النشرة راسك بدناش منك إلا لايك صغير ويخلف عليك ..✌

الأحد 24-10-2021 🌹

اسال الله يغيرر الاحوال
شكرآ لك علي الطرح

السلام عليكم ورحمة الله وبركاته



يسلمووووا ع النشرة الاخبارية المنوعة



يعطيك الف عافية



بانتظار جديدك دائما







تحيتي

تشكر ع الأخبار المنوعه
والمتابعة الجيدة
ربي يسعدك ويحفظك من كل شر

يعطيك الف عافية الامير

ييسسلمموو امميرر
+ ممتابعةة بتججننن ممنكك
وردهةة

متابعه جميله امير
شكرا لك