عزيزي الشب لما تدلل البنت بتصير شحرور ولما تقاهرها بتصير دبور

"بجد نرفزني وعصبني واستفزني
لكن انا بقلو اليوم ع الساعة ستة رح يجيني خطّابة وخايفة أهلي يضغطوا عليي ..
بقوم بقلي : تركيها للنصيب.. اذا انتي خلقتني من ضلعو ليش لاء
من ضلعو قلتلي؟؟!!!
انشالله بيمشي عليك متوازي الأضلاع والمكعب الجذري ومابخلي فيك ضلع بمكانه
قصدي قوم تلحلح لاقي حل .. إلنا 3 سنين أنا وأنتا مع بعض .. بدك هيك الحب يطير بالهوا ..
_ طب حبيبتي انا ما بقدر وقف بنصيبك ..
÷ طب حارب مشاني وانا ما طالبة منك شي
_ انا هلق ما خرج يادوب عمري25 سنة .وعم اهرب من الخدمة الاحتياطية.. مطوّل لزبّط أموري
÷ يعني شو؟؟ مابدك تخطبني ؟؟ خلص جكر فيك رح وافق .. بكفي أنه صاحب دين وأخلاق وفات من الباب .. مو متلك من الاساطيح
...................
حملت حالي ورحت .. سحبني من أيدي وقلي : هلق هيك كبيتي 3 سنين بالزبالة . هاتي جوالك بدي امحي رقمي من عندك
عطيته ياه وقلتلو اي احسن امحيه .. ضل ساعة يحذف كل أرقامه من الواتس والفيبر والايمو وبقية الشلة
مسحه ورجعلي جوالي وعيونه فيها دمعة خفيفة فيها كبرياء وقلي: يعني خلص رح تتركيني هيك ببساطة؟ ؟؟
قلتلو : ابدا"" مو بهالبساطة .. بس انتا ما عم تتحرك كرمالي .. واليوم خلص الساعة ستة رح يجوا الجماعة يخطبوني
قلي : الله يخترلك الخير وراااااح
............ .............
والله حزّت بقلبي دمعته ونظرته. بس يله الدنيا قسمة ونصيب ..
صارت الساعة ستة وأجوا الجماعة
العريس يما العريس شل أملي
اجيت ضيّف القهوة وقربت لعندو وضيفتو وقعدت بأدب وخجل وأمي حدي
فجأة !!!!!!!
برن جوالي !!!!!!!
بتطلع غنية سارية السواس
(( حجي ماباخد حجي بيعيرني بصلاته .. بدي واحد سكرجي والبطحة تحت باطه ... ووين مبارح سهرانة يابنت الكلب))
انا فكرت الصوت من عند الجيران لانو ماعندي هيك نغمة ابدا""
بيركض أخي الصغير الله يصلحه على هالعملة وقلي : ثوثو عم يرن موبايلك خدي ردي
وكل ما افصله يرجع يرن على نفس الرنة وصاحب الرقم هوي ناصر
أمه وجها خنّق وعبّق
انا دبت بأواعيي من الخجل ماعاد اعرف وين بدي روح بوجهي
امي رح تاكل حالا
والعريس وام العريس فورا"" قاموا من مكانهم وتحججو انهم تأخروا وماعاد اتصلوا فينا
...............................
اكيد هوي مافي غيرو (( ناصر )) غيرلي نغمة الرنين ..
يابييييه بيتنفس ندالة هالزلمة والله لأحرق دمه متل ما عمل فيني وخجلني قدام اهلي والجماعة
دقيتلو بعد اسبوع وقلتلو : حبيبي بدي شوفك
اشتقتلك
قلي : وهوي عم يضحك بدك تعزميني عالخطبة
قلتلو : لا حبيبي قلعته.. بدي انتا بس
اتفقنا نلتقي بالصالحية وقعدنا نحكي ..
قلتلو هات جوالك بدي رجع رقمي لعندك
عطاني جواله الغبي وبعدين رجعتله ياه .. بس بعد ما غيرت شغلة تجيب أجله متل ما عمل فيني
ركبنا ع السرفيس بالكرسي المعاكس قعدنا وهوي من جهة الشباك ..
صاحب السيرفيس قال جهزو الهويات الله يرضى عليكم ..
بس وصلنا عالحاجز .. وفتح العسكري الباب وطلب الهويات ..
انا فورا"" عملت رنة على جواله .كنت حاطتلو نغمة لغنية وائل كفوري

(( انا رايح بكرة ع الجيش أتجند بين رفاقي .. بعرف يا روحي قديش مافيكي تطيقي فراقي .. انا راااااايح بكرة انا رااااايح بكرةع الجيش ))
بس سمعا أنشل أمله فصل الجوال ..
رجعت دقيت ...
الضابط يلي قاعد بالمحرس قال :
جوال مين ما يرن ؟؟؟!!
قلتلو : جوال صديقي يا سيدي وأشرت عليه
قلو : عيني ربك يا حبيب . بدك تتطوع ع الجيش ياغالي .
قرررد ليش من بكرة من هلق واااا عيني !!
شو قلتي اسمك يا حبيب ؟؟
رد وهو وجه اصفر وقلو: ناصر ياسيدي
قله الضابط : الله ينصرك على اعداءك
يا بطل هنت
يا مغوار هنت
لشجاعتك هي بدي حطك بالفيلق يا حبيب
آفيني فرّط فيك واااا قلبي
أنزل .. أنزل ياغالي .. أنزل يا حامي الديار
............................
مد راسو من الشباك وقال تعلموا من هالشب البطل احسن ماهنتوا ماتأجلوا ... بعدين سكر الباب وقلو للشوفير روووووح .
ياعمري نزل وهوي عيونه عم تطلع عليي بصدمة وانا عم حركلو حواجبي جكر
..............
انقطعت اخبارو عني لحتى دريت من جماعة انه كان مفروز على طريق خناصر .. ونقلوه بعد فترة يقعد على حاجز بشارع بغداد ..
ويلي اسمعتوا اكتر انو عم يدقق على كل الهويات ليحاول يلقطني لانو بيتي بمر من عند الحاجز تبعو
مع عرفان انو غيرت طريقي وصرت اركب دوار شمالي
والله ما يمسكني ليعمل من جلدي مماسح للهواوين
ومن عضامي قاعدة صوارخ


ههههه تصفيق لسوسو