أخبار_عالريق

#أخبار_عالريق 662 يوم
✅يكتبها/ #سعيد_الطويل

■سقعة وتجمد ودرجة حرارة قربت عنا من الصفر، ومنخفض قوي عالآخر وصلنا الليلة وحيضل زي مبيقولوا لآخر هذا اليوم.

■الموجة الجديدة إللي وصلتنا بيقلك نوعها
سيبيرية قطبية ،يعني بتطرق طرق يا معلم

■المهم الحردان نائب العمادي وصل غزة مبارح وشكله معاه الدراهم والأمور تمام .

■العمادي شكله أجل زيارته اليوم عشان الجو سقعة والأمور مش زابطة معاه.

■راجل كبير بالعمر من دار صافي مات هو مرته بعد ما انخنقوا من دفاية غاز بالجلزون برام الله ،ديروا بالكم ع حالكم.

■لقيوا شب صغير بالعمر مقتول ومرمي جنب وادي بجنين .

■مركزية فتح جددت الثقة لأبو مازن يضل رئيس لمنظمة التحرير ، وسليم الزعنون استقال من المجلس الوطني وحطوا أبو وسام فتوح بدل منه.

■المهم جددت المركزية كمان الثقة بعزام الأحمد لعضوية التنفيذية وضافوا حسين الشيخ عالكوم.

■الرئيس منح نوط القدس لشيخ الأرض البطل سليمان الهذالين .

■أواعي #أبو_فؤاد الهم أسبوع منشورات عالحبل ومنشفوش والزلمة بده يطلع بالبنطلون البيج عاشهار نسايبه ويشخص فيه ومش عارف يدبر حاله والطوش قايمة من أول مبارح عالموضوع.

■في ضغط من الأهالي انه يضل الدوام في الشتا للمدارس من الساعة 8 الصبح.

■أبو فلة خش موسوعة جينتس بدخوله أطول ساعات بث وأكثر مبلغ جمع للفقراء ،بعد ما جمع عالهوا 11 مليون دولار.

■سلطة النقد عندها قروض متعثرة في فلسطين قربت عال 500 مليون دولار

■نص مليون اصابة كور ونا بيوم واحد بأمريكا .

■كيس الطحين ،الله وكيلك صار ميكملش ال3 أيام والتلاجة فضيت والشعيرية خلصت مع جو الشتا والمنخفض "وحدة كاتبة لجارتها عالجروب عالعام"

■دراسة جديدة بتأكد انه حالات الطلاق بتقل نسبتها بالشتاء .

#صباح_الخير للعمال اللي بيصحوا من الصبح ينقلوا خضار وجاج ولحمة عالسوق من النجمة وبعز السقعة

#صباح_الخير لعمال مطاعم الفلافل الشقيانين من قبل الفجر بالفرم والطبخ والتجهيز قبل طلعة العمال وأولاد المدارس.

#صباح_الخير لكل أم بتشتغل معلمة مدرسة، بترتب وبتلبس وبتفطر وبتطبخ وبتعطي المصروف قبل ما تطلع عالستة ونص ع مدرستها

#يسعد_صباحكم 🌹
الأربعاء 19-1-2022

كيف الشتا معكم بصراحة ؟