أخبار_عالريق 303 ✅يكتبها/سعيد الطويل

#أخبار_عالريق 303
✅يكتبها/سعيد الطويل
■اليوم الفجر فتحوا الجوامع بوسط وجنوب القطاع وضلت غزة والشمال لسة مسكرة.
■ الصبحيات عملوا تجربة عملية ومحاكاة لطلاب توجيهي عشان يرجعوا عالمدارس السبت الجاي، بس مظنيتش تزبط ويلتزموا الأولاد زي الصور ما انتشرت.
■الشباب عاملين ترامب نكشة راس بصوره بالحجر الصحي وطابين يبعتوا رسايل لبنته عالواتس أب عشان يديروا بالهم عليها بغياب أبوها وأمها.
■قسموا قطاع غزة 250 مربع عشان يقدروا يخففوا ويزبطوا الحركة زي ما بدهم ويشتغلوا شغل نظيف.
■شددوا الاجراءات بالشجاعية وبيت حانون وجباليا والباقي تقول فش عندهم كورونا.
■موسم عصر زيت الزتون الصافي بلش ثغ معلم.
■7.ـــمـاس كلفت العاروري انه يرأس الحوار مع الفصائل
■ النونو بيقول انه التفاهمات هذه المرة بتختلف عن كل مرة ،بالكم ليش ؟!
■تقريبا 700نفر من المسافرين اللي أجوا من المعبر خلصوا مبارح من الحجر الصحي وروحوا بسلام.
■ عدد اللي ماتوا من الكوورنا لحتى الآن أكثر من مليون و33 ألف بني آدم.
■ بيقلك في 43 واحد انقتل بجرايم قتل من أول السنة بالضفة والقدس .
■ هذا يا معلم الوكالة اليهودية قاعدة بتخطط تجيب ربع مليون واحد عبلادنا واحنا قاعدين بنهاجر منها.
■السعودية مبارح استقلبت أول فوج للعمرة بعد تسع تشهر من التسكير.
■اذا ملحقتوش الأ.سير ماهر الأخرس حيصير خبر عاجل ..الراجل اله تسعة وستين يوم مضرب عن الطعام ومبارح فقد وعييه.
■اليهود شاننين حملة اعتقالات عاطلة ضد الشباب بالضفة والقدس
■شباب فتح والسلطة عاملين حملة مرتبة عشان حقوق غزة وضد التمييز الجغرافي من الحكومة .
■الأمور مولعة بين أصحاب المواتير والناس لانه غالبيتهم بيشكوا من قيمة الفاتورة العالية.
■وزارة الصحة بيقلك عملت لجنة تحقيق بقضية وفاة الصبية دينا الحايك نتيجة الاهمال الطبي زي ماحكت عيلتها.
■مصر قلط عدد سكانها مبارح ال101 مليون ونص .
■الوكالة بدها تكمل توزيع الكابونات من المدارس عشان تخلص الها شهر وشهرية بتوزع زهقت وزهقت الناس.
■شكلهم حينفذوا أحكام اعدام الفترة القريبة الجاية بالقطاع لانه الضغط من عائلات الضحايا مش طبيعي.
■لسة الأمور فش فيها تسريبات ولا تصريحات بخصوص صفقة التبادل .
■حنرجع هذا الأسبوع لطنطنة المنحة القطرية وجية العمادي وهي الشباب بيحضروا البلاليين وجرات الهوا.
■الأمن بتل أبيب اعتقل مبارح تمنية وتلاتين واحد من النشطاء عشانهم مشاركين بمسيرات بالبلد.
■لسة محدش صرح بموعد للشؤون الاجتماعية والناس أكلت هوا يا ناس اتداينولهم من روابي وبعدين سدوهم بس يصلوا مصاري أوروبا.
■سلطة الطاقة بتقلك انه احتمال كبير تنزل تسعيرة كهربت المواتير عن اتنين شيكل ونص كمان شوية.
■قنو البلح كله صار بخمسة شيكل ورطل الرطب برضه بخمسة شيكل.
■اليوم في صيد سردية الحمد لله بزيادة للناس وحتنباع بعشرة وبتمنية شيكل الكيلو.
■بلشنا نطفي المرواح ع وجه الفجر صار الجو يرخي سقعة شوية ولا شو رايكم؟
■معلش دايما صرنا نكسل معظم أيام السبت نكتب النشرة عشان هيك مبارح ما كتبتها الكم.

#صباح_الخير لكل واحد عنده أمنية نفسه يحققها وبيدعي ربنا ليل نهار انه يستجيب اله ،تيأسش يا نوارة.. ربنا أعطيه اللي بده اياه حيعطيك فوق اللي بدك إياه صدقني يخوي ويختي حتيجيكي مسهلة لعندك وتضلك تعيطي من كثر الفرحة بس قولي يارب.

#صباح_الخير لكل مريض ومريضة نهش المرض جسمههم نهش وهد حيلهم ونفسهم يرتاحوا من الابر والغزغزة والمحاليل والفحص والعينات والتحويلات.. برضه قولي يارب وهو أعلم بالحال وان شاء الله حتتشافوا وتتعافوا وتكون ذكرى وراحت.

#صباح_الخير لكل راجل عزيزة عليه نفسه مفلس وضاوي ومعوش ولا شيكل وعنده التزامات وديون ومصاريف خير الله بحياته ومش قادر يغطيها ولا يسد منها حاجة
برضه قول يارب وان شاء الله حيستجيب الرزاق النا والك ويريح بالك .

#يسعد_صباحكم وربنا يوسع علينا وعليكم وقولوا يارب 🙏🌸
الأحد 4/10/2020

يسسلموو الاممير
+ ممتابعةة ممييزهه منكك
وردهه

الله يفرجها

مع انه الاخبار مش ولا بد
بس ببتسم لا ارادي وانا اقرا بالنشرة
بخلي الواحد هيك يقرا بستمتاع
يسعد صباحه ومساه وكل اوقاته ل سعيد الطويل
وعوافي الامير