أخبار_عالريق 272 ✅يكتبها/سعيد الطويل

#أخبار_عالريق 272
✅يكتبها/سعيد الطويل
■الحمد لله خلصنا شهر تمنية بخيره وشره وبطوله وبعرضه وبكل حاجة حلوة ومش حلوة شفناها فيه ويارب اللي جاي يكون أحسن.
■اتفاق عملته 7.ماس مع العمادي مبارح بالليل بعد روحة وجية وروح وتعال ، المهم بيرجعوا فيه الكهرب وبيرجع فيه الوضع زي أول.
■حيتعدل جدول الكهرب ويرجع زي قبل تمنية بتمنية.
■مبارح تسعة وستين حالة أعلنوا عنهم الصبحيات وطلعوا بعدها ببيانات خضرا وصفرا وحمرا وبآخر الليل انحسدت البريج واعلنوا فيها ست اصابات .
■أربعة فلسطينية من طولكرم ،ثلاثة منهم من عيلة وحدة وبنت صغيرة ، دهسهم مستوطن حاقد بباص واستشهد.وا بمكانهم.
■اليوم حتنصرف رواتب السلطة ورواتب 7.ماس كل واحد حسب فئته وراتبه.
■ال100دولار تبعت العمادي قرب صرفها ،احتمال كبير الأسبوع الجاي ينزل الرابط.
■بلشوا من اليوم الصبح يضخوا سولار وبنزين لغزة من معبر كرم أبو سالم.
■اصابتين لبنتنين صغار من جسم مشبوه بخزاعة ،وبنت ثالثة اندهست بالشيخ رضوان.
■لسكان غزة والشمال الحظر حيظل عندكم الحظر حتى اشعار آخر.
■أما تعون الوسطى وخانيونس ورفح بس مددوه الهم بس ل 48 ساعة.
■ويا بختهم جماعة المنطقة الخضرا برفح تل السلطان والحي السعودي والبريج اللي حسدوه ،فش مشكلة اتحركوا زي ما بدكم بس معكم للساعة تمنية.
■بالضفة أعلنوا عن سبع حالات وفاة جديدة و875 إصابة جديدة بالكورونا، والحمد لله في فوق الألف واحد تعافوا في الاربعة وعشرين ساعة اللي راحت .
■حيرجعوا أولاد المدارس بالضفة من صف أول لرابع يوم الأحد الجاي وبعده بأسبوعين الصفوف الثانية الأساسية.
■لبنان اعتذرت انها تستقبل الفصائل عشان يعملوا الاجتماع عندها.
■بيقلك البلاللين اللي نفخوهم لليهود وضلوا ،حيطيروهم بالمينا لما تخلص الكورونا من عنا.
■الدولار سعره ماكل هوا ،صرفوه ب3.34شيكل.
■الخضرة سعرها ونظافتها مش زي أول بالبلد.
■الجو حيكون اليومين الجايات أحسن من الأيام اللي راحت .

#صباح_الخير لأهل المنطقة الصفرا والحمرا ،أما تبعون المنطقة الخضرا فالمفروض هما يصبحوا علينا ويسألوا فينا لأنه أمورهم داحلة.

#صباح_الخير للمحجورين بشكل كامل بالبيوت وبيطلعوش ولا بنزلوا وشايفيين الديك أرنب .

#صباح_الخير للزلمة الطيب اللي كتب منشور عالفيس انه يشعر بالسعادة ،عشان مرته انحجرت عند أهلها لانهم خالطوا جيرانهم اللي لقيوا معاهم كورونا.

#صباح_الخير لأهل الخير والطيبة اللي بتغارش وبتحقدش ع حد وبتحب تشوف غيرها بأحسن حال .

#يسعد_صباحكم ويارب يوسع عليكم الرزق ويبعد عنكم شر كل حاسد.🌷