اخر الاخبار لهذا اليوم

#أخبار_عالريق 206
✅يكتبها/سعيد الطويل
■اليوم أول يوم بفصل الصيف بشكل رسمي ،وعد ع ايدك خمسة وتسعين يوم شوب ورا بعض.
■اليوم كمان بيكون أطول يوم بالسنة عشان يكون بعلمك كمعلومة بالمرة.
■اليوم عنا وعندك الخير برضه آخر يوم بشوال وبكرة أول يوم بشهر ذو القعدة الهجري.
■ضل حاجة كمان اليوم مهم تعرفها انه حيصير عنا كسوف جزئي للشمس من الساعة سبعة ونص للتمنية ونص الصبح يعني كمان شوية.
■شايف اليوم طلع مليان حاجات جديدة ،ويارب يكمل ونسمع فيه حاجات تبسطكم.
■المهم بيقلك في جهود حكومية عشان يصرفوا 40% من رواتب الموظفين الأسبوع الجاي.
■مبارح كان أكبر عدد ناس صابتهم الكوورنا بفلسطين من أول ما اكتشفوا الفايروس يعني كان العدد فوق ال108 ،وربنا يستر.
■سكروا مدينة الخليل ونابلس بالكامل .
■شرطة البلديات بغزة كمان سكرت أكم من جامع عشان فش التزام من المُصلين بإجراءات الوقاية.
■محمد اشتية طلع قرار انه ممنوع أي حد يشتعل في المستعمرات بالمرة.
■وزارة الداخلية اللي غزة بتقلكم انهم مكملين في تطبيق القانون على الجميع وفش أي استثناء لحد .
■وزارة الخارجية صرحت انهم حيبدأو بإجلاء الناس الفلسطينية من تركيا اللي بدها تروح في 28 و 29 من هذا الشهر.
■هذا بيقلك في 140 عضو في الكونغرس الأمريكي وقعوا على وثيقة بتعارض ضم أجزاء من الضفة.
■لقيوا جندي "اسرائيلي" مقتول برصاصة براسه ،كان ضايع اله يومين بالضفة وبيدورا عليه .الله لا يقيمك يا بعيد.
■في حيستقبلوا اليوم مسافرين حيوصلوا الضفة وحيحجروهم لمدة أسبوعين.
■محافظ الخليل بيقول انه فش سيطرة عالناس اللي طالعة واللي نازلة من الخليل عشان الاحتلا.ل .
■الجمعيات ودفع المصاري وقفت كلها هالأيام عشان فش لا رواتب ولا مصاري العمادي.
■ملك الأردن عبد الله بيقول للرئيس أبو مازن : احنا وانتوا في خندق واحد ومعركة واحدة ضد الضم.
■فش عروض جديدة في البلد هالأيام ولا حتى عالجرابين ،راايقة...واذا حد عنده عرض يكسب أجر ويحطه بالتعليق 😊
■الأعراس بدت تتنشط شوية بعد توجيهي ،بس برضه مش زي موسم السنة اللي فاتت.

#صباح_الخير لأهلنا بالضفة وخص نص حبايبنا الخلايلية ،والله يكون بعونكم .
#صباح_الخير للشباب المغتربين اللي وضعهم صعب بتركيا وبيعدوا الساعات عشان يروحوا ع غزة الأسبوع الجاي.
#صباح_الخير للناس اللي صامت الستة البيض وكسبت أجرهم قبل ما يخلص شهر شوال .
#صباح_الخير للناس اللي منامتش من كثرة التفكير ومخها مطفاش والضغط وهموم الحياة مسيطرة عليهم ،يارب تفرجها من عندك على عبيدك يا الله.

وقولوا يااارب 🌹