الاخبار الصباحيه

يكتبها/سعيد الطويل
■الجو زي مقلنالكم ربيعي ،بس تخففوش بالأواعي وبعدين تفلوزوا لا سمح الله وتقعدوا تعطسوا والناس تشك فيكم والأمور مش ناقصة يعني .

■الأخبار المتداولة عن فتح معبر رفح بكرة بشكل استثنائي لمغادرة طاقم جمعية الفلاح لإيطاليا مجرد اشاعة🙂.

■شركة الاتصالات بتقلك انه انسرقت كوابلها وأغراضها واتعلم عليها للمرة الرابعه بجحر الديك بنص القطاع.

■بمصر توفى مبارح اللواء رقم أربعة خلال يومين وهو حسن الشافعي بفيروس كورونا
وقبله سبقه الألوية خالد شلتوت و شفيع داوود ومحمود شاهين.

■الوكالة سكرت عيادات الأسنان المختبرات الي داخل مراكزها.

■كمان يومين زيادة الكم بالدار

وحتلاقوا جورج قرداحي متصل عليكوا

ببرنامجه المسامح كريم .

■كمية الاستهلاك الفعلي للأكل الي صاروه ياكلوه الأولاد بالدار قد الأكل الي قدحوه من أول السنة ..صحة ي عم.

■سكرت وزارة الصحة مركز الفلاح الي فحص الكورونا عالبسطة مبارح.

■فوزي برهوم بيطالب بتصريح اله مبارح حكومة اشتيه برفع العقوبات خاصة الخاصة برواتب الشهد.اء والجرحى والأسرى.

■كان مبارح في اجتماع طارئ لهيئة مسيرا.ت العودة عشان مسيرة يوم30 ثلاثة ،بس ما عرفت شو القرارات طلعوا فيها لسة.

■انتهى الحجر المنزلي لعدد 740 واحد اجوا من المعابر واليوم أول يوم الهم بالتحرر ..عقبال الباقي ..برضه الزم بيتك .

■الشرطة اعطت اجازة مفتوحة لأكثر من 400موقوف بالسجن واستدعت 14واحد بيروجوا اشاعات.

■شباب الفيس بوك شغالين رقابة زي اللوز ع كل واحد بيتسغل الناس بالأسعار وبيزبطوه.

■سعر الدولار طلع من أول وجديد وصار اكثر من 3.71.

■وازرة الاقتصاد بتحذر أكثر من 40محل تلاعب بالأسعار ورفعها انهم حيسكروه لو عملها ثاني.

■موجة شوب خمسانية جاية آخر الأسبوع حتخليكم تشغلوا المراوح.

■موضة تصوير العرسان بالكمامات بجلسات التصوير داحلة هاليومين ،وفش وراهم حاجة لا عرس ولا حنة عالسكت حاجة.

■بمنع صالات الأفراح ،وقفت 90%من مشاكل الصالات بين النسوان ع الأغاني والفقرات والرقصات والدبكات واللبس والألوان والي طلع القرار عمل معروف ورجع الحب والألفة بقلوبهن من أول وجديد 🙂.

#صباح_الخير للناس الي مش متعودة ع قعدة الدار وفرفطت روحها من حيطانها.
-صباح الخير للناس الي بتعمل أندومي وبتصوره كل ما يلاقوا حالهم فاضيين .
-صباح الخير لجماعتنا بالحجر الصحي الي في منهم ناس قعدوا بالحجر أكثر من قعدتهم بمصر وبيستنوا بترويحتهم ع أحر من الجمر.
-صباح الخير لكل واحد بيحس بالناس وبيحاول يقدم الي بيقدر عليه بهذه الظروف الصعبة ..وسامح تؤجر
-وفش ولا صباح لكل واحد بيحكتر الناس وبيستغل ظروفهم الصعبة.