نفاق مجتمعي بحت بطريقة فكاهية

چروبات الواتساب قصة ، قصة نفاق اجتماعي مش طبيعي ، بكون فيها اقل اشي عشرين واحد عباره عن اخبث عشرين بالعالم!
وفش مجال للهروب من الجروب ابدا ، فش مجال حتى تمرض ، فش مجال ما تفتح كل الرسائل!

و يا حبيبي لما يكون الجروب ستاتي ، ويكون اسمو ( بنات العم ) او ( كناين ام مجدي ) او ( صبايا العيلة ) أو ( امهات مدرسة الياسمين ) أو ( سلَفات و عدايل ) أو ( نمرودات ابوهم ) أو مثلا ( حيايا بس طيبين ) ،،،

و يا حبيبي اذا وحده طلعت من الجروب ، يا حبيبي عالوقعة اللي بتوقعها ، يا حبيبي يا حبيبي !

- سماح غادرت المجموعة!

نسمة : منيح انها طلعت !
هبه : انا اصلا مش طايقيتها !
عبير : اصلا لو ما غادرت كنت انا بدي اغادر!
نسمة : لا حبيبتي منيح انها غادرت !
هبه : عبير تحكيش هيك انا اصلا بحب هالجروب عشانك!
عبير : شكرا حبيباتي !
فرح : سماح غادرت؟ واخيرااا 💃💃💃
هبه : اه غادرت إن شاء الله تروح وما ترجع!
نسمة : عنجد انها زنخه!

نسرين : يا جماعة ، سماح بعتتلي بتقول رجعوني عالجروب لانها طلعت بالغلط!

- تم اضافة سماح على الجروب !

نسمة : نورتي حبيبتي 😘
هبه : اشتقنالك سموووحة
عبير : اذا ما رجعتي كنت بدي ارجعك خاوة 😍
نسمة : سماح الجروب بدونك بخزي
فرح : انا بعشق الجروب مشانك سماح ❤
سماح : شكرا حبيباتي

اما جروبات الشباب 😂
بكون اسمو مسبة ( شباب ***** ) او ( شلة ال ***** )
واذا ابراهيم غادر !
رجعووووه هالكلب رجعوووه
وبس يرجع !
بمسحو فيه الارض ،
شوووو وين طالع ولا؟! مين خلتك تطلع؟! حبيبتك مانعيتك؟!
وبضلو يعلقو عليه سنة ، و بغيرو اسم الجروب
( ابراهيم الرخيص )

#نفاق_مجتمعي_بحت