08-28-2020
|
|
#أخبار_عالريق 269
#أخبار_عالريق 269
✅يكتبها/سعيد الطويل
■خمسة وخمسين حالة اللي أعلنت عنهم الصحة بغزة هذا مبارح بس ،هذا غير عدد الحالات اللي قبل .
■هذه الحالات للأسف خالطت وتخالطت وأخذت وأعطت وهيهم بيتعاملوا الطواقم مع الموضوع ،الله يعطيهم العافية .
■على وجه الفجر اليهود قصفوا شوية أهداف بغزة بالدبابات والطيارات بشكل مرعب.
■بعد الفجر بشوية طلع من عنا خمس صو.اريخ عاليهود رد سريع عالقصف.
■ع قولة أبو زكريا مبارح تحمص الغلاف تحميص ،فوق الخمسين حريقة ولعت من بلاللين الشباب.
■العمادي صارله أربع تيام عنا مرابط بغزة ،شكلها الأمور مش سالكة لسة والشباب معندين معه.
■حسب بيان نزل عالنت مبارح حيشغلوا وحدة قص السلك ووحدة الارباك اليوم وبكرة.
■رفح وخانيونس الحمد لله لسة موصلتش عندهم الكورونا ،ويارب ما تصل ويتعافى باقي المناطق بالضفة وغزة والعاصمة .
■الشرطة برفح بالذات حتشد حيلها شوية باجراءاتها ،عشان في ناس تراخت وبطلت فارقة معها وبتطلع وبتنزل بالشوارع.
■بالقدس مبارح اكشتفوا مية وخمسين حالة كورونا جديدة ،الله يكونلهم معين.
■انصرفت مبارح رواتب الوكالة ،وبصراحة مكانش أي اجراءات سلامة ولا تباعد عالدور عند الصرافات.
■عزلوا شمال غزة عن غزة بالمكعبات الباطون الكبيرة وجبال رمل عملتها جراف البلدية.
■احتمال يبلشوا توزيع كابونات الوكالة الفترة الجاية بنفس طريقة التوصيل اللي كان قبل للبيوت بالتكاتك.
■الجامعة الاسلامية حتبلش امتحاناتها اللي عالنت بعد بكرة.
■اذا ضل الوضع زي هيك الوكالة حتكمل تدريس أولاد المدارس عن بعد.
■وفد وزاري حيبعته اشتية لقطاع غزة عشان يشوف شو لازم للقطاع شغلات مستعجلة ومساعدات وأدوية.
■ الشؤون الاجتماعية قالت انها حتوصل لخمسين ألف عيلة بغزة وتقدم الها مساعدات.
■الرئيس أبو مازن اصدر تعليماته انهم يقدمه كل حاجة لازمة لغزة عالسريع عشان الوضع ميزيدش .
■كيلو الجاج بتسعة شيكل وفي شوية محلات حتفتح اليوم عشان الجمعة.
■سمحوا للمزارعين كل يوم من الساعة خمسة للتمنية الصبح يروحوا عالمزراع يلقطوا الخضرة عشان تنزل تنباع بالسوق.
■بالنسبة للناس اللي بتطلب كنافة عليها قطر خفيف ، اعملي يختي شعرية بسكر وسلكي حالك ،أو تعلمي الطريقة عن النت ،احنا بحجر مش برحلة تحملي معلش.
■الخضرة الحمد لله متوفرة بكذا منطقة بكل مدينة وقريبة من الكل تقريبا .
■الجوافة نزلت الأربعة بمية وفي نظيفة حتلاقوها أغلى شوية بالسعر.
■اليهود قلصوا نسبة الكهرب اللي داخلة للقطاع من خط 9 لثلث الكمية تقريبا ،بدون أي سبب وبهيك حيصير أزمة جديدة.
■الصحة العالمية بتقول انها مش متفاجئة بظهور كورونا في غزة وقاعدين بيستنوا يوصل 40 جهاز تنفس صناعي للقطاع.
■الدولار نازل سعره وماكل هوا ،للناس اللي حابة تطلع حاجة من المتخبي.
■الناس اللي كانوا شغالين يومية وقعدوا هلحين عن الشغل ، ظروفهم المادية والحياتية بدها منقذ سريع الصراحة.
#صباح_الخير للعجايز وكبار السن تاج روسنا ،اللي المفروض نحافظ عليهم ونخدمهم بعيونا ،بس ما نخليهم يحتكوا ولا يتخالطوا بحد عشان مناعتهم ع قدهم ،ربنا يحفظهم.
#صباح_الخير اليوم وكل يوم للدكاترة والممرضين والشرطة وعمال البلدية وتعون الاقتصاد والصحفيين والناس اللي بترد عتلفونات الوزارة والدكاترة الأكابر اللي كشفوا حالة هبة بالمطلع ، ولحبايبنا بالضفة اللي بيطمئنوا عالوضع أول بأول وعمال المخابز اللي بيواصلوا شغلهم بعز الشوب وهالظروف الصعبة.
#صباح_الخير لكل أم وأخت شغالة زي المكوك من الصبح لعند ما يخلص آخر صحن بدور الجلي.
#صباح_الخير للناس اللي بتتفقد جيرانها وبتسأل عنهم وبتشوف شو ناقصهم بهيك وضع وبهيك ظروف وبتحاول تقدم الهم الواجب .
#يسعد_صباحكم
جمعتكم مباركة وصلوا على حبيبنا النبي صلى الله عليه وسلم 🌹
اليوم الرابع للحجر الجماعي
2020/8/28
|