اخبار اليوم الخميس موجز الاخبار

#أخبار_عالريق 223
✅يكتبها/سعيد الطويل
■زي متوقعنا كل الفصائل نزلت بيانات شجب واستنكار بعد استشها.د الأسير سعدي الغرابلي ومحدش قصر بواجب العزا كمان ..البقية بحياتكم..
■زي اليوم سنة ال2014 كان الحرب على غزة تخبط وترقع بأول أيامها الفعلية ،قصف من كل فج ومين ،ضلينا 51يوم واجا علينا رمضان وعيدنا وراحت الاجازة واحنا بين الدم والدمار...تنذكر يارب ما تنعاد.
■قبل شوية توفت حالة جديدة، وصار عدد حالات الوفاة بالكورونا بالضفة 25حالة ،ولسة في حالات للأسف خطيرة ،وربنا يشفيهم.
■وزارة التنمية ، بتقول فش لسة موعد محدد لصرف شيكات الشؤون ،طيب عالأقل فرحوا الناس قبل العيد .
■اليهود شانيين حملة اعتقالات مسعورة بالضفة والقدس طالت كمان قيادات بفتح و7ماس.
■مبارح طلع من سجن اليهود الأ.سير علاء بكر أبو نصيرة من خانيونس بعد ما خلص فترة 16 شهرا.
■سلطات الاحتلا.ل حطوا حكم إضافي 20 شهر على الأ.سير احمد ابو جزر والأ.سير فتحي حميد مع العلم انهم محكومين 17 سنة قبل هيك.
■مبارح شب بغزة اتشعبط فوق وزارة العمل وكانه بده ينتحر ولحقوه بآخر لحظة.
■جبريل الرجوب صرح انه مشروع شـهــ،.ادة وتكُلف بمهمة وطنية وحينفذها وما بيبحث عن مجد شخصي.
■وزيرة الصحة قالت انه احنا لسة مسيطرين عال (كورونا) والأمور تمام، وغزة بحاجة لكل دكتور عندها مش عنا.
■بحس حالي كل يوم بنشر خبر فيه ملايين زي هذا ...الاتحاد الأوروبي بده يصرف 22 مليون يورو مساعدات لفلسطين.
■عشر اصابات بحادث بين تكتوكين بخانيونس .
■فلكيا يوم الخميس 30من هذا الشهر حتكون وقفة عرفة والجمعة العيد ،لمين يعيش.
■الأسير محمد زيتاوي الله رزقه بولدين توأم زي القمر ، عن طريق "النطف المهربة" سماهم (تيم وعميد).
■ادارة الفيسبوك بدها تدمج "الماسنجر" مع "واتسآب" شكله بده يسيطر ع كل حاجة هالمنكوب.
■بكرة اللي عندها توجيهي ومتوقع نتيجته عالية حتبلش تعزل وتنظف وتكتك وتشطف بالدار ،عشان السبت تستقبل الناس اللي بدها تهنيها.
■سعر سدر البقلاوة صاير ب80 شيكل هذه السنة ،شكله الموسم حيكون فيه منافسة قوية .
■ع قولة هبة اللي قدمت امتحان التوظيف لثامن سنة ، بتقول بنكسب كل سنة شوفة صحباتنا اللي من أيام الجامعة ،وبنطلع بنطش وبنروح لجيزانا وأولادنا .
■مبارح اشتريت بكسة شمام للعصير بخمسة شيكل .

#صباح_الخير للناس اللي خميسها زي تلاتها ،ومن قلة الشغل قاعدة بين أربع حيطان طول اليوم ونفسها يكون عندها شغل يكون فيه نهاية وبداية للأسبوع ،الله يفرحهم ويرزقهم.

#صباح_الخير للناس اللي قدمت امتحانات التوظيف وعملت اللي عليها ومقصرتش بتقديمها ،وحطت كل اللي براسها ،ان شاء الله يكون الهم نصيب.

#صباح_الخير لحبايبنا الخلايلية اللي بينا وبينهم عمق الروح وميلاج الأمل وعنادة الموقف ،الله يثبتهم ويقويهم ويبعد عنا وعنهم شر الوباء والبلاء.

#صباح_الخير لكل مريض المرض هد حيله ونهش بدنه ،والدنيا بتضيق عليه ؛والمعابر للعلاج مسكرة بوجه ،تذكر انه هذا ابتلاء من رب البرية وحتفرج ان شاء الله .

وهلا بالخميس .🌹

شكرا الامير ع الاخبار وع المتابعه
عوافي ع جهودك

مشكور ع المتابعة '

يسلموو لنقل والمتابعه

اخبار مؤلمة وصادمة
شكرا الامير

يسسلمموو الامميرر
وردهه

يعطيك العافية لادراجك ..

	السلام عليكم ورحمة الله وبركاته يسلموووووا ع الخبريات المنوعة والمتابعة يعطيك الف عافية بانتظار جديدك دائما تحيتي

يعطيك الف عافية