أخبار ما بتنفع تكون عالريق

#أخبار_عالريق
✅يكتبها/سعيد الطويل
■أخبار اليوم بعيد عنكم نصها كئيبة للأسف وفش حاجها فيها تسر العين الا رحمة الله .
■ولد صغير اسمه منتصر لولح حرقوه شباب بيخافوش الله بمدينة جنين بطوشة عائلية.
■في كمان ولد صغير ثاني مات وهو مشنوق عن طريق الغلط بغزة .
■برضه بنت صغيرة من خانيونس اسمها ملك أبو موسى وعمرها سنتين وقع ع راسها تلفزيون وماتت عالمطرح .
■توفى شب بعز شبابه اسمه أحمد صالحة متأثر بحريق النصيرات وهو الرقم 24 .
■توفت بعده بكم ساعة المعلمة فاتن معلا وهي برضه كانت متصاوبة بحريق النصيرات وصار عدد الضحايا 25.
■بعد العشا توفت فجأة بسكتة قلبية زمليتنا المصورة أسماء نيروخ من القدس.
■لحتى الآن كل نتايج فحص الكورونا اليي بعزة سلبية.
■فش تراجع عن قصة ال3أسابيع والتمديد بالحجر للكل بدون استثناء .
■مبارح انحجروا مجموعة جديدة من المرضى وصلوا من ايرز.
■الرواتب حتنصرف كاملة للضفة و70لغزة لأنه بدون علوات ..زي ما حكت المصادر.
■الرواتب حيصرفوها ع سبع أيام حتبلش بالناس الي بتشتغل بالصحة وتنتهي عند كبار الدولة والوزرا.
■رسموا خطوط حمر وصور لرجلين عالأرض بالبريد وقدامه عشان الناس تصف طابور عليهم وميصيرش زحمة.
■لسة ال100تبعت العمادي فيها شوية ترتيبات عشان هيك منزلش الرابط.
■كابونة الوكالة حتوصلك لعند دارك ومدفوع كمان أجار التكتك عنك بس خليك بالبيت.
■جامعة الأزهر والأقصى لغوا الامتحانات النصفية وحيعملوا آلية طارئة للامتحانات للنهائية وتعلن عنها الأيام الجاية.
■بمصر قررت الوزارة انها تطلب أبحاث من الطلبة بدل الامتحانات وتحسب علاماتهم.
■اشتيه بيطالب بتوفير 120 مليون دولار لنقدر نواجه أزمة كورونا.
■زي اليوم قبل سنتين انطلقت مسيرا.ت العودة ونصبنا الخيام عالحدود والناس بالآلاف راحت هناك واستشهد فوق ال300 واحد واتصاوبوا الآلاف واتقطعت رجلين بالكبشات والحمد لله انها توقفت .
■زي اليوم كانت ذكرى يوم الأرض الي قامت فيها الدنيا بأراضي ال48 قبل حوالي 44سنة.
■الاقتصاد حطت تسعيرة للخضرة (البندورة ،والخيار والبصل والبطاطا )لازم يكونوا أكثر من خمسة بمية ينباعوا والكوسا أغلى شوية وبس ،والفليفلة خارج الحسبة.
■مبارح مسكوا 18تاجر بغزة بيعلبوا بالأسعار ومضوهم ع تعهدات.
■السلطة وظفت51 دكتور جديد بعد ما ناشدتهم النقابة.
■صار عندنا بالضفة وغزة 109 حالات كورونا وهذه آخر احصائية.
■للأسف لحتى فش علاج اكتشفوه للكورونا والعدد بالعالم بيزيد.
■��تنويه ..تقرير منظمة الصحة العالمية يعلن خروج قطاع غزة من مرحلة الخطر ✋بالنسبة لهذا الخبر الي لف كل جروبات النسوان اشاعة والي كتبه بده يلم لايكات .
■العراس بالحارات كترانة وكنبة أم نضال الي لونها توتي لفتت كل دور المخيم عشان ينصمدن عليها العرايس .
■الجو صار شوب لدرجة انه تغطيت بحرام واحد خفيف الليلة الي فاتت .
■الدولار اليوم بالبلد ب3.59.

#صباح_الخير للناس الي بتصحى متأخر كل يوم وبصراحة القصة مش مقنعة وهيني جربتها.
-صباح الخير للناس اليي تأخرنا عليهم بالنشرة وبنعتذرلكم ي عمي.
-صباح الخير لأم عصام الي عاملة فطير بسبانخ وبدها توصله ع بناتها لعند الدار.
-صباح الخير للناس الي افطرت وصارت النشرة بالنسبالهم بايخة ومش عالريق.
-صباح الخير للشباب الليي رجليهم تقطعوا بمسيرا.ت العودة قبل سنتين ..الله يصبركم.
-صباح الخير لكل إم تذكرت ابنها بهذا اليوم..الله يرحم روحه.
-صباح الخير لكل إم قامت عملت شاي وقرشلة فطرت أولادها وشطفت الدار عالبدري.

#يسعد_صباحكم بكل الخير ��