أخبار عالريق المعتادة يومياً

#أخبار_عالريق 102
✅يكتبها /سعيد الطويل
■اليوم حتصير انتخابات اليهود للمرة الثالثة بأقل من سنة ،واحنا الولد الصغير الي منتخبش بآخر انتخابات صارت عنا هيو تزوج وخلف.
■صاروخ مرجع طلع مبارح بالليل من غزة ولف ورجع ثاني.
■ضايل أسبوعين وشوية وتخلص هالشتوية ،يازلمة بدها دبحة خروف من بعده.
■الريال فاز عالبرشا بقونين الصراحة نظاف ورجع يتصدر الدوري بس بنقطة وحدة.
■ بيقلك فوق ال40% من الرجال الي بغزة ماخذين قروض بأسماء نسوانهم.
■اليوم في لقاء خاص عالفضائية بعد العصر مع الشيخ الي فك النحس عن الزمالك وريال مدريد.
■مصر ضوت معالمها التاريخية مبارح بلون العلم الصيني عشان تتضامن معهم ،واكتشفوا عندهم حالة جديدة للكورونا لواحد أجنبي.
■اليهود صار عدد المصابين عندهم بالكورونا عشرة ،وربك يستر .
■حاجز ايرز مفتوح اليوم للمرضى بس من الساعة سبعة للعشرة وبعدين حيسكر عشان انتخابات اليهود.
■البزر التركي الي بالبلد غشوه وطلعوا بيخلطوه مع بزر دير البلح ي معلم.
■الدولار سعره طلع من اول وجديد وصار ب3.45.
■هنية والنخا.لة حيتلاقوا بعد كم يوم عند الدب الروسي.
■أبو مازن بيقول انه : اضرابات الدكاترة بهذا الوقت موقف مش أخلاقي ومش مسؤول.
■البرشلونية بيأكدوا انه الكلاسيكو ملهاة إستعمارية للتغطية ع صفقة القرن😊.
■اليوم الجو حترتفع درجة حرارته شوية وحتكون الأمور أحسن من مبارح .
■الخضرة اليي بالسوق تقريبا كلها رخيصة الا بالبتنجان عامل حاله زي الكيوي.
■كيلو فخاد الحبش ب8شيكل الله وكيلك من سنتين مصارش سعره زي هيك.
■احتمال تنزل رواتب السلطة العصريات عالصراف ،اذا ربك سهل.

#صباح_الخير للجالية الأسبانية الي عايشة بغزة وضلت تحتفل للصبح وتنشر عالفيس بفوز الريال.
-صباح الخير للولد الصغير الي راح عمدرسته بدون مصروف وأمه حشتله خبزة زعتر.
-صباح الخير لكل أستاذ بيخليش الأولاد ينسخوا القطعة عشر مرات واجب بالدار .
-صباح الخير لأم حسين الي عندها اليوم دور لغسيل كلى ،الله يشفيها ويعافينا.
-صباح الخير لأبو العبد الي قاعد بيجري اله شهر عشان تحويلته المرضية تطلع عشان يتعالج.
-صباح الخير للناس الي عليها أجار البيت ومطلوب منها تدفعه بكرة ومش عارفه تدبره ،الله يعينها.
-صباح الخير لأم فريد الي صحيت تعجن من الصبح وتعمل مناقيش عطنجرة الكهرب .
-صباح الخير للسواق الي صافف سيارة عالدور بستنى برزقته من الفجر .

#يسعد_صباحكم_بكل_الخير 🌹
يكتبها لكم الصحفي المتميز أ. #سعيد_الطويل أبو رضوان

بدق في برشلونة
ايه مش مصدقين حالهم


سلمتي

شكرا علي الاخبار ملاك
الله يسعد صباحك وصباح الجميع

تسلمي قلبي عالنقل
اسلوبها سلسل وبيعجبني
يارب يكون بعون الجميع ويخفف عنهم متاعب الدنيا
يعطيك العافيه

يعطيك العافيه ع النقل
ويسعد صباحك

أخلى أخبار اليوم الأخبار الرياضية فخمة
مشكورة ع المتابعة ملاك
ماننحرم

هالمرة بتنفع الاخبار ع الريق
خاصة انه فش فيهاا اخبار بتنكد او بتسد النفس
يعطيك العافية لادراجك

مسا القلوب الجميله❥
اُسلوب حلو و الله يعطيكٍ العافيه ملوكه❥
الله يبعتلك ايام حلوة
و
سنين احلى

يعطيك العافيةة

اشكركم عالمرور
وانشالله تكون كل الاخبار حلوة ع طول