أخبار عالريق 95

#أخبار_عالريق 95
✅يكتبها /سعيد الطويل
■أخبار اليوم بتنشف الريق وبتوجع القلب تحملونا فيها بعينكم الله .
■محمد الناعم شب جنتل وجدع مبارح الصبح أعدموه وصلبوه ونكله فيه قدام عنينا .
■الناس بصراحة ملدنت معها وصارت بدها رد من المقاو.مة بأي ثمن وقلبوا الدنيا عالفيس .
■اليهود خبطلونا المواقع الليلة الي فاتت بأكثر من 25غارة هزت الدنيا هز وكسرت نص شبابيك البلد .
■الشباب ما قصروا ودكوا مستوطنات الغلاف ب30صاروخ وكم حبة هاون من الي بيحبهم قلبك.
■أربع شباب تصاوبوا من قصف اليهود علينا.
■بآخر الليل نعت حر.كة الج هاد شهيدين من أولادها بالخارج هما سليم سليم وزياد منصور اعمارهم بالعشرينات واستشه.دوا بقصف اليهود لسوريا.
■المدارس بغلاف غزة كلها تعطلت وعندنا أولادنا زعلوا عشان اليوم في دوام للمدارس بشكل طبيعي.
■راجل موقوف من دار السعافين توفى بعد ما تدهورت حسب بيان الشرطة وأهله بيتهموا الحكومة بتعذيبه.
■الكورونا مخربة ديار العالم وبتنتشر بزيادة والأمور شكلها خارج السيطرة،ربك يستر.
■كل الفصائل تقريبا نزلت بيانات مبارح عشان جريمة اعدام محمد الناعم.
■صوت الزنانات مسكتش من مبارح ولا دقيقة الله وكيلك .
■بكرة أول يوم بشهر رجب وبهيك بيضل اقل من شهرين لرمضان..الله يجيبه ع خير.
■القمبوطة الراس بشيكل واحد وفي شوية سمك نزل عالسوق بس لسة غالي .
■شباب رفح تعادل مع شباب جباليا بقون بكل واحد منهم .
■وغزة الرياضي للأسف قرب يهبط بشكل كبير من الدرجة الممتازة بعد ما انغلب من الشاطئ.
■خدمات رفح انغلب لأول مرة من اتحاد خانيونس من أكثر من 435 يوم مداقش طعم للهزيمة، بس بيضله الخدمات بطل الدوري.
■الوضع اليوم حيضل متقلقل شوي لأنه والتوقعات انه في جولة للتصعيد لو محدش اخذ عليها وجه .

#صباح_الخير لأم الشهي.د محمد الناعم الي ملت بقلوبنا حسرة وألم.
-صباح الخير للشبين الجدعان الي حاولوا يسحبوا جثمان محمد الناعم وتصاوبوا من قناصة اليهود قدام عنينا.
-صباح الخير للأولاد الصغار الي راحو عالمدرسة اليوم غصب عنهم .
-صباح الخير للناس الي بيوتهم اسبست وشردوا الليلة الي فاتت عند دار جيرانهم عشان القصف .
-صباح الخير لكل صحفي ضل سهران يغطي بمصداقية وينقل الأخبار
-صباح الخير لكل دكتور وممرض ضل مداوم للصبح طوارئ .
-صباح الخير لرجال الدفاع المدني الي ضلهم مداومين بعز السقعة بالشارع عشان الاخلاء.
-للناس الي تكسرت شبابيكها والي خافت أولادها من القصف والي تصاوبوا والي انخرعوا واليي هلعوا..
حمد لله ع سلامتكم و #صباح_الخير 🌹

ربنا يعين اهل غزة ويحميكم
صحيح اخباره بطريقة حلوة بسردها
لحتى توصل المعلومة بلهجتنا احنا

شكرا مؤمن
ربنا يكون معكم
ويرحم الشهداء

ربي يرحم الشهداء ويصبر اهلهم مو هينه يفقدونهم بغمضة عين بس هذا المكتوب
ربي يتغمدهم برحمته الواسعه
ويارب يحميكم من اسرائيل وشرها ربي يسلط عليهم عذاب من عنده يهز اركانهم
...

شكرا لنقل الاخبار خيي الطيب

الله المستعان

مشكور ع المتابعة مؤمن
وردي

معه حق والله الاخبار هالمره بتوجع القلب
الله المستعان
كل الشكر للنقل مؤمن

كان الله بعون العباد
تسلم لمتابعتك الطيبة
ويعطيك الف عافية
ودي

كل الشكر و التقدير