أخبار اليوم

#أخبار_عالريق 70
✅يكتبها/سعيد الطويل
■للأسف يوم شبه عادي عدى بسلام بالوطن والشتات و مر مرور الكرام بعد تحدي ترمب وقرار تنفيذ الصفقة.
■طلع مبارح صاروخين من عنا واحد وصل جوا والثاني ضلوا برة وما وصل اليهود واشتغلت الصفارات.
■ بعدها اليهود كالعادة شغلوا طياراتهم ونزلوا قصف بخانيونس ودير البلح بكم موقع وأرض فاضية ونزلوا بيانهم وخلص .
■بيحكوا انه احتمال كبير الريس أبو مازن يجي ع غزة بنص شهر 2،والمفروض يسبقه ويزبط الأمور وفد بيرأسه أبو نداء الأحمد، يا مسهل يارب.
■دخل مبارح كميات مش قليلة من الكوشوك لغزة ،بعد ما قرروا اليهود يفرجوا عنهم ؛ لأنه إلهم قريب السنتين ممنوعات عنا.
■في منخفض جوي جديد بس شكله مش من النوع القوي ؛وصل مبارح للبلاد في شوية رشرشة مطر والسقعة أقل من الي راحوا.
■مسكت بلدية رفح والصحة 50كيلو سمك أرنب من الي بيسمم ع طول وطبعا أعدموه.
■مبارح أول مرة شباب من القدس يولعوا بلالين وكنادم ويطيروهم عالمستوطنات.
■الجاج سعره تقريبا ثابت من الأسبوع الي فات من 8.5ل 9شيكل للكيلو.
■بكسة برتقان البلنسيا تاع العصير ب8شيكل ؛وكيلو الليمون ب2شيكل من نصيب المفلوزين.
■هذا بأخبار الكورة يخوي ليفربول مش شايف حد قدامه وزي خدمات رفح بده يحصد الدوري.
■وريال مدريد وفالنسيا طلعوا لربع نهائي كأس ملك أسبانيا و مانشستر سيتي ولعت معه ووصل لنهائي كأس رابطة الإنجليز.
■وفريق باريس سان جيرمان ربنا سهلها معه ووصل كمان لربع نهائي كأس فرنسا والانتر ميلان كمان دحلت معه ووصل لنص كأس ايطاليا.
■ كيلو القرشلة بينباع بخمسة شيكل وزاكية وبتخرش خرش ؛وفي بياعين بيبيعوها ب12شيكل ليش بفهمش؟.
■اكتشفوا مبارح أول حالة بالكورونا بالإمارات ،وارتفع عدد الي ماتوا بمقاطعة هوبي بالصين ل170.
■تصريحات صفقة القرن وصلت لرقم قياسي وفش ولا تصريح عليه العين،الله وكيلك.
■القسماط والقضامة المالحة أكثر شغلتين صرت أشوفهم بصحون الضيافة عند الناس😊.
■اليوم حترجع زيارات الخوات لبيوت أهاليهن ثاني خميس وبيات ليوم الجمعة ،بعد غياب غضب عنهم ،عشان المنخفصات والجو سقعة وهيكا.

#صباح_الخير للناس الطيبة الي بتحب الخير لغيرها ..للناس الفهمانة والي بتسيب الناس بحالها.
-صباح الخير لكل واحد ماشي جنب الحيط وبيقول يارب الستر
-صباح الخير لكل شب بيتشغل بالشتا كم يوم عشان يحوش شوية من رسوم الجامعة.
-لكل شرطي مرور واقف بعز السقعة عشان ينظم السير وبيحبش المخالفات.
-صباح الخير لكل عيلة نامت تحت الزينكو وعالعتمة بدون كهرب.
-صباح الخير للمرضى والزهقانين والعاطلين عن العمل.

ولكل واحد بيحبنا ..احنا كمان بنحبه وبنتمناله كل الخير
ويا #صباح_الخير 🌹