أخبار_عالريق

#أخبار_عالريق 659 يوم
✅يكتبها/ #سعيد_الطويل

■غزة كلها اليوم معطلة ولابدة تحت الحرامات وحوالين كوانين النار والدفايات .

■ شوية مطرة كشفت عورة المسؤولين المقصرين بتسليك البلاعات والمصارف وخلت الشوارع تغرق بشبر المية .

■صور أولاد المدارس إللي طلعت مبارح هي السبب بعطلة اليوم ،غير هيك كان مفرحوش أولاد أم عماد إللي إلهم من الصبح نازلين بالحارة يلعبوا بنانير.

■وزارة الشؤون بغزة بلشت في إغاثة الأسر المتضررة وإللي أكلت هوا من المنخفض وتوصلت كابونات ولوازم الهم.

■الدفاع المدني اشتغل بقلب رب وشغل نظيف بأيام المنخفض .

■المهم لسة اليوم وبكرة حنشوف سقعة وبرد ومطرة مشفناش زيها بيقلك من عشر خمسطعشر سنة.

■ليبيا طلعت قرار انها تعامل فيه المعلم الفلسطيني زيه زي الليبي بالراتب وبكل حاجة.

■أي حد بده يسافر ع مصر ،مياخذش معاه كميات من طناجر الضغط ولا الكهربة ولا راس العبد ولا حتى جاكيتات النفخ عشان حيتصادروا.

■ خدمات رفح قدح الشباب قونين مرتبات مبارح بمباراة الديربي.

■ناصر أبو حميد بين الحياة والموت ،وضعه صعب عالآخر وشبه غيبوبة دايمة ،وربنا يلطف فيه ادعوله.

■وفد فتح وصل الجزائر مبارح والوفود حتلحقه عشان في جلسات جديدو للمصالحة والحوار.

■الأسـ ـرى الإداريون في سجون الاحـتـ لال بيواصلوا مقاطعتهم للمحاكم لليوم ال13 عالتوالي.

■أهلنا بالنقب لسة منتفضين عشان أرضهم وصار فوق ال100 واحد معتقلينه لحتى الآن.

■الشعيرية إللي بالبلد مضروبة ومعجنة وبطل في الها طعم ولا نكهة ،لو في نوع جربتوه منيح احكولنا يمكن دكانة أبو خالد بتبيع بضاعة مبردة.

#صباح_الخير خص نص لعمال البلدية الشقيانين وإللي اشتغلوا بقلب ورب وشغل مخلص وأداء نظيف بعز البرد وبنص الليل وع وجه الفجر .

#صباح_الخير لأولاد المدرسة اللي منظرهم حرك الدنيا بعد ما طلعتهم الناظرة عالشارع والمطرة شغالة والشوارع غرقانة ومصبرتش شوية حتى تتسلك الأمور .

#صباح_الخير لكل واحد ساب فرشته وحرامه ودفاه وعفاه ونزل من الصبح عشان رزقه ورزق أولاده ولقمة عيشه

الأحد 16-1-2022

ربنا يهدي البال ويصلح الحال ويرزق الجميع
يعطيك العافية الأمير
يسلمو ع المتابعة

افضل خبر اللي بخص ليبيا ..
مشكور ع المتابعة

يسلموو ع المتابعة
ربي يسعدك أخي

يسسلمموو الامميرر
وردهة

السلام عليكم ورحمة الله وبركاته



يسلموووووا ع النشرة الاخبارية المنوعة والمتابعة



يعطيك الف عافية



بانتظار جديدك دائما