أخبار_عالريق 229

#أخبار_عالريق 229
✅يكتبها/سعيد الطويل
■الله يبعد عنا وعنكم شر الوباء ،الأمور عند أهلنا بالضفة مش تمام وكل يوم صار فوق الأربعمية اصابة جديدة والوفيات برضه صارت يوم يوم من الكورونا.
■خبر حلو وخاص لكل أم فاض فيها الكيل ..المدارس بتاريخ تمنية تمنية بغزة يعني بعد العيد على طول ،وحتكون هذه فترة تحضير ومراجعة قبل الفصل الرسمي.
■مبارح كان الفيس برعاية أغنية ،كلها أي كلام لعدولة.
■مالية غزة حتصرف اليوم المصاري تبعت حقوق الغير من البريد.
■ بيقلك تبعون الأمن "باسرائيل"معتقلين خمسين ناشط شبابي كانوا بمظاهرات قدام دار نتنياهو.
■نتنياهو بده يصرف للعائلات الكبيرة اللي عندهم فوق الخمس تنفار 3000شيكل عشان يمشوا أمورهم بوضع الكورونا
■في أسير اسمه نضال أبو عاهور حالته الصحية بتدهور بالسجن ولو محدش ضغط عشان يتعالج حيلحق اللي قبله ..والله يكونله معين.
■يوم 23من هذا الشهر حتفتح الامارات
طيرانها عشان يرجع الفلسطينية لبيوتهم بسلام.
■تويتر اخترقوه الهكر ودمروا كبشة حسابات لشخصيات كبيرة ومشهورة بأمريكا
■ولد صغير عمره سبع سنين وصل مبارح جثة عالمستشفى بقلقيلية وعليها آثار ضرب من دارهم ، زي قصة آمال اللي عنا بغزة بالضبط .
■ بشار الأسد بعت رسالة لأبو مازن قلوا فيها احنا معكم قلبا وقالبا ضد أمريكا وصفقة القرن والضم.
■أبو مازن قال بتصريح اله انه حتى لو في كوورنا احنا مش حنقصر بالقدس وحندعمها ومش حنسمح لحد يلعب فيها.
■ابو مرزوق قال انه العلاقات مع فتح عال العال وبنتواصل دايما مع بعض.
■المهم مشكلة شواحن الجوالات بتضل من أهم المشاكل اللي بنعاني منها يوم يوم وفش الها حل .
■سندوتشين فلافل وعلبة كولا كلوب باتنين شيكل .
■الله وكيلك الأضاحي السنة فش عليها طلب وسوقها نايم.
■البطيخ الصغير ملوش طعم ،عشان تزبط معك بطيخة زاكية وحمرا بدك فوق العشرة شيكل.
■التعليم بغزة بيقولوا انهم حولوا قضية الطالبة النجار للنيابة عشلن يعرفوا قصة التزوير.
■قاعدين بجهزوا حجر صحي جديد بدير البلح ع مساحة 16دونم بس اللي قبل شكله أحسن من هذا.
■سبع تنفار بالقدس لقيوا معهم كورونا بعد ما لعبوا شدة مع بعض والشريك الثامن فلت منها.
■تشتروش مزيل عرق أبو التلاتة بمية ملوش لا ريحة ولا لون يعني عالفاضي.
■بلدية رفح عاملة معرش كبير عالبحر بتقدر تقعد فيه وتطلب كاسة قهوة أو شاي بشيكل مع الكرسي كمان.

#صباح_الخير للأولاد الصغار اللي فرفطت روحهم وصحيوا من النوم عالستة الصبح يفاقعوا بأهاليهم ويصحوا أمهم عشان تحشيلهم خبزة مرتديلا.

#صباح_الخير لأبو محمد اللي زبط بنته عشان تشتري أواعي الجامعة الجداد ،وتروح تسجل هيا واختها اللي أكبر منها الأسبوع الجاي.

#صباح_الخير لكل مهندس ومهندسة بيضلهم واقفين جنب الطوبرجي بعز الظهر عشان يطلع الشغل مية المية.

#صباح_الخير لسواقين الخط اللي بيسيحوا مع الشمس وهما واقفين عشان يوصلهم الدور ويحملوا نقلتهم .

#صباح_الخير للناس الطيبة
و #هلا_بالخميس 🌹

ييسسلمموو لممتابعةة الامميرر :#
وردهه

يعطيك العافية لادراجك .

شكرا الك كثير
على متابعتك
ونشاطك المستمر
وماننحرم مواضيعك
ودي

الله يفرجها ع الناس
عوافى الامير