أخبار_عالريق

#أخبار_عالريق 1021 يوم
🌨✅يكتبها / #سعيد_الطويل

■أهم شغلة صارت مبارح بالمنخفض حبايبنا بدير البلح حطوا روسهم وناموا بأمان الله ، أجو ناس بالحكسات صوروا فيديوهات انها غرقت الدير وطلبوا من الممول يزبط الوضع ؛وكملنا ليلتنا بالفيديو الترند تبع نصار ابن عريبي وهو بيلعب بالمية وهو بيوزع قمح عالمنطقة

■يا ويلي عليهم أولاد المدارس.. بعز السقعة والشفشفة والشوارع المبهدلة راحوا اليوم عالمدرسة ع أساس انه علماء ذرة و حيفرق معهم هاليوم

■بتذكر بزمن الكورونا سنة ونص كاملات محدش دخل باب المدرسة وهيهم ما شاء الله طلعوا ممريضين قد الدنيا بدقوا ابر وبركبوا محاليل ..عادي يعني

■يوم حافل بالمطرة والسقعة والشعيرية بسكر والبطاطا الحلوة والفلافل والشاي والسحلب وشوية شيبسيات ع بسكوت بفلة وشوكلاطات وقحمشت خبز مع شوربة عدس من الطنجرة وبآخر الليل بيقلك شو بدنا نتعشى

■خبير أرصاد بيقلك هذا المنخفض عميق وشامل وما شفنا زيه من سنين.
عليم الله هذه المطرة ما شفنا زيها بالجنوب يا زلمة من واحنا بالابتدائية مسكتتش يا زلمة ..يارب خير وبركة

■زي اليوم قبل 14 سنة قامت الحرب الأولى على غزة "الفرقان" ، استــ ـشهد فيها في ال1400 فلسطيني من غزة

■وزارة الداخلية تراجعت عن قرار منع الحفلات من الشوارع بس حطت شوية شروط أي حد قبل ما يعمل حفلة لازم يلتزم فيها

■عيلة أبو مغصيب أعفت لوجه الله عن السواق إللي تسبب في وفاة طفلهم عبد العزيز قبل كم يوم بدير البلح

■مفتي سلطنة عمان بيشكر كل واحد بعت رسالة ع صفحته أو علق عالعام وبيقلكم تقلقوش الأمور تمام فهمت كل حاجة

#صباح_الخير للناس إللي صابرين وصامدين ومتحملين المطرة والسقعة في بيوت الزينقو والاسبست الله يعينهم عالمزاريب والبهدلة إللي شافوها وربنا يدفي قلوبهم وأجسامهم وويرح بالهم

#صباح_الخير لكل مريض صابه الفايروس هو أو أولاده ، ولكل واحد نهش المرض جسده ..ربنا يشفيكم ويعافيكم

قوم ولعلك كم فحمة وحط عالكانون براد شاي وقحمشحك كم خبزة مع صحن زعتر وزيت ولو عندك جبنة بيضا وحبتين بندورة مع فلفل أحمر ودوق أزكى فطور يا معلم ..

ويا #صباح_السعادة 🌨🍀
كيف الجو عندكم ؟؟؟
الثلاثاء 27-12-2022