أخبار_عالريق

#أخبار_عالريق 660 يوم
✅يكتبها/ #سعيد_الطويل

■سقعة وبرد ومطرة وريح وكهرب قاطعة وشوارع غرقانة ومناشدات واغاثات ولفات نايلون وبيوت بتدلف مية ،هذا وضع الشتا في كثير من شوارع وبيوت غزة والحمد لله.

■اليوم علماء الذرة موعد مدارسهم تأخر ساعة يعني حيكون عالساعة 8 ، وكلها ساعتين زمن وحتلاقوهم بوجوهكم بيتفطفطوا بالحارة.

■ع قولة أبو فؤاد شكلهم حيروحوا يقشطوا الملعب من المطرة بالحصة الأولى .

■عرايس المنخفض عملوا ذكرى حلوة مبارح ،بس ما نقلوهم بسيارات الدفاع المدني الكبيرة من الكوافيرات.

■خروفين ماتوا بماس كهرب برفح .

■بلدية النصيرات بتقول للناس إللي ساكنين جنب الوادي ديروا بالكم ع حالكم ممكن المنطقة تغرق وتفلت بأي وقت.

■اليــ ـهود فتحوا مية المجاري "الله يعزكم" ع أراضي المزارعين عشان يغروقها ويسلكوا المية من طرفهم.

■أي حد مش ماخذ تطعيم كورو نا ،بيقدرش يستفيد ولا خدمة من ديوان الموظفين من اليوم وطالع.

■العمادي طال عمره حيوصل بكرة غزة عشان يشوف قصة المصاري هذا الشهر .

■قطر بعتت مبارح شحنيات مساعدات كبيرة لغزة.

■المهم رئيس بلدية غزة بيقول ،مدينة غزة لحالها بدها عشرين مليون دولار عشان تتصلح البنية التحتية فيها.

■دوام البنوك اليوم للناس إللي بدها تسحب أو تحط مصاري من 9ونص لــ2 ونص

■سامحونا فش ولا خبر عن شيكات الشؤون بالمرة.

■بعد هذا المنخفض عليم الله غزة بدها أسبوع حتى تنشف

■البزيلا صارت بخمسة شيكل الكيلو والفراولة لسة بتنباع بالعلب تبعت التصدير.

#صباح_الخير لكل عيلة ولعت كانون النار وحطت عليه نص بكسة بطاطا حلوة ورشت عليها شوية جوز هند ،وبعدها حطوا براد هالشاي بسكر زيادة وكبشة مرمية من إللي يحبها قلبك وضبت أولادها من السقعة وقعدوا لابدين لنص الليل.

#صباح_الخير للناس إللي ضلت طول الليل سهرانة وهيا بتحط جرادل مية وطناجر تحت خروم المية إللي بتدلف والمزاريب إللي بتنزل بدورهم.

#صباح_الخير للناس إللي بتصحي وكل أملها بوجه الله انه يتغير الحال للأحسن . ربنا يجبر خاطرنا وخاطركم ..

#يسعد_صباحكم 🌹
الاثنين 17-1-2022

واكسبوا ذكر الله عالصبح ..