زوجي -لا- يحبني

قصة بعنوان : زوجي_لا_يحبني_
#تقول 👇
تزوجت شب كل بنت بتحلم فيه كامل من كل شي بالنسبة الي قلت أجى فارس أحلامي بس كان ناقصه بس الحصان الابيض شب سحرني بحكيه بجماله بطريقة قعدته بوقفته بهيبته كل شي فيه كان كفيل انو اعشقه من اول نظرة رجال بكل ما تعنيه الكلمة بيعرف يلبس بيعرف يحكي جنتل مان حتى اخلاقه الكل شهد فيها و مين ما سمع انو هالشخص بدو يخطبني و يتزوجني يقول اعطو و انتو مغمضين عينكم شب ما اله مثيل حتى في ناس قالت كثير علي مع انو انا حلوة و جذابة..
دامت الخطبة شهرين فقط ما كنا نحكي فيهم كتير او حتى شوفه كتير بحكم انو على طول مشغول و ما في وقت يحكيني وما بهمني قلت ما مشكلة رح نقضي العمر كله سوا تزوجت و اخيرا كان اسعد يوم بحياتي الرجال يلي بحلم فيه صار زوجي فتنا عالبيت يلي كان مش ناقصه اشي هاد البيت يلا رح عيش فيه سعيدة طول عمري .. متل اي عروس فتت غيرت ملابسي و لبست فستان ابيض عرايسي و رحت حط عشا تعشينا وفتت عالغرفة متوترة شوي وخجولة متل اي عروس الليلة ليلة دخلتها و ناطرة عريسها يبادر بس تفاجات انو ما عمل شي كان بارد جدا حط راسه و نام😴😴😐😐قلت ياااا شو مذوق رح يتركني ارتاح اليوم و اجل الموضوع لبكرا 😍 بس اجا بكرا و اجا بعد بكرا و ما فكر ابدا يقرب وانا البس و اتمكيج و اتعطر و قول الليلة رح يبلش و لا حياة لمن تنادي ومستحيل كنت انا بادر او حتى فكر اساله ليش هيك عم تعمل لا كرامتي و لا حيائي كان بسمحولي اعمل هيك.....دقتلي الماما بعد 4 ايام تطمن علي و سالتني مشي الحال و قلتلا طبعا مشي الحال لحمدلله و انا من جوا مخنوقة و عم احترق و عم اتخبط بحالي و اسال شو ناطر ليش لهلا ..

ضليت شهرين على الحالة عايشين متل الاخوات يفيق يروح على شغله يرجع يتعشا يسهر ساعتين عالتلفزيون بعدين يحط راسه و ينام وحكيه جدا قليل يعني كانو حسيت حالي عايشة لوحدي بهالبيت الحزن و الكأبة بلشت تظهر على ملامحي و عيوني ..صرت وقف عالمراية اسال حالي انا يعني ما حلوة معقول فيني شي مقرف كل هالقد انا قبيحة... حتى وقت اقعد مع اهلي او بيت حماي كنت اقعد و اسرح و صير بعالم تاني لدرجة يلي حولي انتبهو علي انو عقلي مشغول و اني حزينة
قلت لا انا حلوة و بشهادة الكل الغلط ما فيني الغلط فيه هو عنده مشكلة هو يلي مو رجال و عنده ضعف اذا ما قد الجيزة ليش ليتزوج و يورط بنات الناس معه قررت الليلة فاتحه بالموضوع قعدت طول نهار حضر الحكي يلي بدي قلو اياه بس يجي و كيف بدي صيغه حتى ما ياخد فكرة عني ما مزبوطة
اجا تعشا و كالعادة متل الروبوت فات يتفرج عالتلفزيون لحقته و قلتله بدي احكي معك قلي تفضلي قلتلو انت شو مشكلتك يا ريت تصارحني النا شهرين عايشين متل الاخوات لازم تشوف دكتور ..

.قلي اعرفي حالك شو عم تحكي ..انا انفعلت فورا وقلتلو انا يلي اعرف حالي شو عم احكي ولا انت يلي مانك رجال ليش لتتزوج ...و ما كفيت الجملة الا ضربني كف على وجهي (حسيت حالي متل المسلسلات المكسيكية اووه لقد صفعتني ايها الاحمق 😁 )و قلي انا ما بحبك وما بتعجبيني انا انصدمت بالجملة اكتر من الكف يلي لطشني اياه وانخرست ما عاد عرفت شو بدي رد و جاوب و من هول الصدمة قمت ركض على غرفتي ابكي و اتقبل الصدمة على مهلي قلي ما بحبني شو لازم اعمل هلا ضب اغراضي وارجع مطلقة لبيت اهلي بعد شهرين زواج فقط حسيت الفكرة اكبر من انو عقلي يستوعبها قلت هلا بيجي بيعتذر و بتاسف و بقلي انا بحبك وببرر تصرفاته بس ما اجا لااا لا اجا اخد المخدة و الحرام و راح نام بغرفة القعدة
بقيت طول الليل و انا عم ابكي متل يلي كانت فوق طايرة و وقعت عالارض صحيت و لقيت حالي بكابوس بشع نمت و انا عم ابكي و فقت و رجعت ابكي كان ابشع يوم بحياتي .....
الفكرة يلي انحصر عقلي فيها انو هلا انا شو المفروض اعمل فكرت دق لاهلي و احكيلهم كل شي اكيد ما رح يخلوني ثانية عنده و رح يطلقوني بس انا بحبه وما بتخيل حياتي بدونه قررت اسكت و فكر بحل تاني
....................................
غسلت وجهي و قعدت مع حالي وحللت الامور بانو زوجي ما قرب علي لانو ما بحبني زوجي انسان عاطفي جدا كان اي رجال محله بيتصرف طبعا لغريزته ما لقلبه ليش ما حبني لانو ما اخد وقت ليحبني او انا ما بنحب او يمكن بحب حدا تاني يعني كل هاللبس و المكياج و الاغراء على الفاضي ...افكار تاخدني و تجيبني
حطيت ايجابيات زوجي بفترة الشهرين يلي عشتها معه (كريم ما قصر ابدا على بيته اي غرض قلو عليه كان يجيبه فورا ،شخص هادي و رايق ،شخص منظم بوقته،انسان ناجح بمستوى عمله ،بحب اهله و خدوم الن ،محترم مع اهلي و مع اي حدا....)كانت ايجابياته كتيرة بس كان شخص حزين و كئيب و بارد بلا مشاعر و روتيني ممل عاملني ولا كانو موجودة بالبيت بس كل هالشي اهون علي من انو ارجع مطلقة بعد شهرين و تبلش الناس تحكي و تقول ليش طلقت بعد شهرين مدري شو شاف منها حتى ما تحملها شهرين لهيك قررت ابقى عنده و حاول اكسب قلبه و كون اله رفيقة و صديقة قبل ما كون زوجة


نطرت على موعد جيته و كنت فاتحة شنتاية عـالتخت و عم ضب كل شي عندي من اللبس اللي بلبسه اله و خليت البجامات العادية و شوية تنانير و شورتات عادية جدا اول ما فات صفن شوي فكرني عم ضب اغراضي و رايحة لبيت اهلي خلصت فورا و قفلتها و رفعتا على الخزانة وساعدني طبعا برفعها لطمن قلبو انو انا بقيانة عندك و قاعدتلك يا حيط 😐 و كانت تقيلة كتير لانو كنت جايبة و ما مقصرة و ما انفتحت هالشنتة مرة تانية الا بعد سنتين عالتمام..
طبعا اكيد بينه و بين حاله انبسط لتصرفي هم و عبأ كبير نزل عن كتافه يعني ما بقا رح البسله هيك شي او طالبه بشي ابدا لانو التياب لغة قبل ما تكون مجرد قماش....
و فتنا عالمطبخ و اكلنا و مشي نهارنا متل كل يوم تاني يوم الصبح و هو عم يلبس و رايح على شغله قلتله اذا في مجال تجبلي على طريقك و انت راجع من شغلك رواية على ذوقك اقراها لانو عم مل كتير لحالي بالبيت بس تكون حلوة شو كان قصدي انا من هالحركة كان بدي يجبلي كتب هو قارئها لافهم اكتر كيف بفكر و لحتى ناقشه فيها لانو الكلام شبه معدوم بينااتنا و فعلا جبلي رواية ويزيرينغ هيتس المترجمة و قلي هاد حلوة و يا لطيف ما اطولها قلت ما بخلصا بشهر بس قديش معناها أنه هو باله طويل و صبور المهم بلشت اقراها و كانت حلوة كتير كان كل فترة يلقي نظرة على الكتاب ليشوف وين وصلت فيه و انا كنت افتحه على طول قدامه و حط قلم فيه لحد ما وصل قراءة و حط خطوط تحت كلام حبيته بالرواية وكل يومين تلاتة افتح سيرتا و اسالو عن احداثها انو حلوة كتير و شو بصير بعدين و من هالحكي ...
علاقتي باهله كانت ممتازة جدا و بيتهم ما كتير بيبعد عن بيتي و على طول روح لعندهم و احيانا اعزم حالي عالغدا و رنله قله اليوم بدي اتغدى عند اهلك مر خدني من عندهم و مرة خطر على بالي اسال اخته قلتلا محمد اكم مرة حب بحياته قبلي ( يعني على اساس هو بحبني😐 ) قلتلي ليش عم تسالي هاد ماضي و راح قلتلا لك فضول بس قلتلي مرة وحدة ما في غيرها بس هلا هي تزوجت و صار يمكن عندا اولاد قلتلا ليش ما ضلو مع بعض قلتلي عندهم عادة البنت مرهونة لابن عمها يعني ما لازم تروح لحدا غريب و هي ما قالتلو هالحكي لاخوي لهيك وقت تزوجت اخوي تعب كتير و اخدناه عالمشفى انهيار عصبي و فات بنوبة اكتئاب كبيرة و حتى كان بدو يقتل حاله و صارت تضحك بس هالحكي قديم كتير صرله 3 سنين و اكتر قلتلا ماشي ما تقولي لحدا انك قلتيلي هالحكي ....
انا انصدمت كتيرررر ومن كتر ما انصدمت و حسيت الدمعة بدا تنزل قلتلا يلا انا لازم روح على بيتي و لحق اعملي طبخة قبل ما يجي اخوكي و طلعت من عندهم و طول الطريق و انا عم ابكي انو ما بس طلع ما بحبني لا و طلع بحب وحدة تانية تزوجت و لهلا ما قادر ينساها كيف بدو يحبني حسيت حالي داخلة على معركة خسرانة فيا.....
ابدا ما فكرت قلو انو سمعت فيها او اسالو عنها و كانت صفحة و طويتا طول العمر....المفروض وحدة بمحلي تكرهه الا انا زاد حبي اله اكتر لانو ما كنت اتخيل في رجال ممكن يحب بجنون لدرجة يقتل حاله كل همي صار انو يصير يحبني بس كيف و اديش الشغلة بدا وقت و صبر و تخطيط..

بعد 4 شهور زواج بدقلي ماما لتقلي حجزتلك بكرا عند الدكتورة النسائية حضري حالك بدنا لازم نروح لتفحصك و تشوف ليش لهلا ما حبلت بنت سميرة تزوجت بعدك بكام يوم و هلا هي حامل بالشهر التاني و بكرا زوجك ببلش يضوج ليش لهلا ما حبلتي لو ما حكالك هالشي قلتلا امي حكينا انا وزوجي بهالموضوع و قلي ما بدنا اولاد هلا قلتلي معلش منروح منطمن قلتلا طيب بردلك خبر للمسا ليجي و اسالو اذا بوافق و طبعا انا ابدا ما فتحت هالموضوع معه شوبدي قله امي بدا تاخدني تشوف ليش ما حبلت لهلا ليش انا اصلا تزوجت حتى احبل بس رديت خبر لامي انو زوجي ما قبل و مستحيل اصلا روح لانو رح انعرف انو بعدني بنت
......................................
ضغط نفسي كتير علي بلشو قرايب اهلي و زوجي يسالوني شو العروس ما مخبية شي عالطريق الله يطعمك يارب عن قريب نفرحلك بولد وانا وين و هالناس وين .... لازم حرك حالي بقا و اتصرف...
كل جمعة كنا نقعد بالبيت سوا لانو عطلته انا افتح كتاب اقرا فيه و هو يقضيه عالتلفزيون او عاللاب توب عالنت يعني وضع روتيني و ممل صدفت انو الدنيا عم تمطر برا لمعت الفكرة براسي فورا تركت الكتاب على جنب و قمت لعنده و وقفت عالشباك قلتلو عم تمطر ....انت بتحب المطر؟؟! قلي في حدا ما بحب المطر قلتلو صح انا كتير بحبه و بحب امشي تحت المطر (مين انا ههههه لك اذا كان عندي مشوار و الدنيا عم تمطر الغيه او اطلع و لابسة طاقية و ماسكة شمسية و امشي تحت بلكونات العالم كرمال بس ما تجيني حبة مطر بس اي فكرة مجنونة بتلزمني هلا )قلتلو شو رايك و هزتلوا براسي لبرا؟ قلي ما فهمت رايي بشو قلتلوا تعا نطلع نتمشى تحت المطر... للحظة لمعو عيونه و سكت شوي قلي من كل عقلك عم تحكي ...

طيب ماشي البسي و فعلا قمنا جهزنا حالنا و انا تباطئت باللبس و قلتلو سبقني بنزل وراك و نزل قبلي انا ما لبست جاكيت لانو حطيت عيني على جاكيته يلي لبسه كنت شوف بالافلام كيف البطل بيشلح جاكيته و بلبسه لحبيبته قلت بلكي بتزبط معي و اذا ما زبطت بكون اكلتا مرضة نزلت و سالني ليش ما لابسة جاكيت قلتلو انا ما كتير ببرد متعووودة ( هههه انا يلي بالبرد بلبس 3 جرابات فوق بعضن و بحطهم فوق البنطلون بيطلع شكلي متل بياعين السمك)....انا انسانة عملية جدا يعني شو المشي تحت المطر يعني رح بلل تيابي و امرض بس ما كنت شوف متعة بالقصة ابدا بس

لانو هو انسان عاطفي و رومانسي لازم استغل كل شي لالفتله نظره بس لاااااا لاااااا شي مختلف تماما المشي تحت المطر مع شخص بتعشقه شي ما بيشبه اي شي مشينا و يلي كنت مخططة اله زبط الجنتل شلح جاكيته و لبسني اياه و مرينا اكلنا فول سخن و كانت الفكرة فكرتي و رجعنا عالبيت ركض كان مشوار حلو كتير رجعت مبسوطة و حاسة حالي عاملة انجاز ....
الجمعة يلي بعدها مستحيل كاانت تمر هيك جيت عندو وقلتلو بيتزا .... قلي شوو قلتلو تاكل بيتزا قلي اي باكل قلتلو معناتا رح قوم البس قلي لووووين قلتلو لمطرح على ذوقي طوله 4 امتار عرضه 5 امتار فيه 6 طاولات بس ملبس خشب شكله بيشبه الكوخ اضواءه خافتة موسيقى ل chopin اما ريحة البيتزا لا توصف قلي طيب ...عجبه المحل كتير هالشي كان واضح عليه و هو عم يطلع بديكور المطعم و مستغرب بصغره و جماليته و انا عم اكل بيتزا طلعت فيه و قلتلو بتعرف هلا لوين بدنا نروح بس نطلع من هون قلي لووووين قلتلو بدنا نروح ناكل بوظة قلي شووووو بوظة بهالبرد مجنونة انت (اي مجنونة فيك لو ما مجنونة كنت ببقى معك لهلا )قلتلو اممم مجنونة ما في احلى من الجنان.....صرت حس بعيونه الدهشة و الفضول انو هاي شو ممكن لقدام يطلع معها افكار مجنونة و غريبة كنت ما بس مستعدة اكل بوظة بالبرد و مستعدة اعمل تحدي سطل التلج كمان بس ليحبني قد ما بحبه ....
كل جمعة مشوار شكل و افكار اغرب من يلي قبلها مرة على مدينة الملاهي مرة عالبحر مرة عالحديقة حتى مرة قلي تعي نروح ناكل بوظة ههههه.....

ما كنت فوت اي مناسبة او زيارة بتجمعني معه على اني مرته كنت رتب حالي كتير و اطلع بمظهر ناعم و راقي جنبه و عملت علاقات اجتماعية كتير مع اهليته حتى كانو يمدحوني قدامه و كنت افرح كتير
كان كل يوم يسالني شو بدك جبلك اغراض معي للبيت انا و جاي كنت قلو جبلي هيك و هيك الا بفترة البريود كنت اكتبلو اياهن على ورقة و حطلو الفوط النسائية اول غرض براس الورقة مع انو انا قادرة اشتريها بس كان بدو هو يلي يشترين ليعرف خصوصياتي اكتر بتذكر اول مرة مسك الورقة فيها كيف صار وجهه احمر و كيف لما يفوت على الغرفة و انا عم غير تيابي يخجل فورا و انا امسك اي شي و غطي حالي فيه يعني ما انت ما بدك تشوف و انا ما رح فرجيك شي....
مرت سنة على زواجي و ابن بنت سميرة بلش يحكي و امي ابدا ما كانت تفوت فرصة لتحكي عن بنت سميرة وابنها بس انا ما كان يهمني لا سمير و لا سميرة عندي هدف براسي بدي اوصله و بالنسبة الي قطعت شووط كبير و مبسوطة كتير بالشي يلي حققته لهلا
كان كل لبسي بجامات عادية ما فيها اي شي من الاغراء بعد سنة بلشت بالشورتات القصيرة و التنانير وقت اول مرة لبست تنورة فيها كنت خجلانة كيف بدي اطلع فيها قدامه و خاصة الي سنة ما لبست هيك شي من اول شهرين زواج لهلا بس قلت عادي يعني ما رح ياثر فيه شي و اصلا يمكن ما ينتبه .......بس لا انتبه و كتر كمان كنا عم نتفرج عالتلفزيون وقت قلي جيبيلي كاسة مي الله يخليكي قلتلو تكرم قمت لجبلو قبل ما اطلع من الغرفة برمت ضهري وانا عم اساله بدك اياها من البراد الا الحنفية قمت لقيته عم يطلع على رجلي هههه بس شافني انتبهت تلبك قلي شو قلتي ما فهمت قلتلو ولا شي سلامتك و فتت عالمطبخ اضحك ... حسيت قلبي رح يوقف من الفرحة
.........................
بعد يومين اتصلت سلفتي العقربة ام لسانين و بدها تجي عندي زيارة و هاي اول مرة بتجي لحالها فيها و اهلت و سهلت فيها سالتني كيفك انت و محمد قلتلا لحمدلله تمام ما في منه قلتلي منيح الله هداه كنت ماكلة همك كيف رح تكون حياتك معه قلتلا ليش خير انشالله قلتلي ييييي يقطع لساني شو حكيت قلتلا لا ولايهمك خدي راحتك و احكي قلتلي ما تزعلي مني بس زوجك كان على مشاكل مع امه طول فترة خطبتك انو ما بدو يخطب و يتزوج ما المشكلة فيكي المشكلة فيه هو لانو قلبه معلق بهديك يلي ما بتتسمى و امه قلتله اذا ما بتمرق هالخطبة و الجوازة على خير رح اغضب عليك ليوم الدين لا انا امك و لا انت ابني لمتى بدك ضل هيك عايش على ذكرياتها و هي راحت انقبرت تزوجت و صار عندا اولاد حتى يوم العرس كان ما رح يجي عالصالة بس اتصلت امه و بهدلته و بعتتله اخواته يبهدلوه و يجيبوه تفاصيل كتيرة و بشعة حسيت بالاهانة و الذل كتير كنت اسمع البنت بتنجبر عالجوازة اما الشب كنت اسال حالي ليش تزوجني بس ما فكرت ابدا انو هيك صاير

اعرف انا شو بالنسبة اله متمسك فيني أو لا) قلتلو منطلع بالمعروف متل ما فتنا بالمعروف و مين ما سالك ما انسجمنا و ما تفاهمنا مع بعض كرمال سمعتي و سمعتك و خلصت حديثي و قمت فورا لاتركه يقعد مع حاله شوي منظره انقلب من فوق لتحت وجهه انخطف لونه بين عليه الصدمة فورا بعد نص ساعة لبس و طلع من البيت ما بعرف لوين ما رجع لساعة 3 الصبح و مع هيك حسيت عليه اانو ما نام ابدا و اول ما طلع الصبح رجع لبس و طلع ما عرفت لوين الا بعد ساعتين اتصلت ماما و قالتلي ليش خبيتي علي انا تلبكت و ما عرفت كيف جاوب قلتلا شو خبيت عليكي قالتلي زوجك اجا الصبح و من شوي لراح من عندي حكالي كل شي قلتلا شو حكى ( انا خفت انو فعلا يكون حكى كل شي لانو هيك نها قصتنا )قالتلي ليش ما قلتيلي انكن رحتو عند دكتورة و فحصتك و ما فيكي شي و انو المشكلة عند زوجك و عم ياخد ادوية و يتعالج قلتلا ما بدي اشغلك فكرك .......

فرحت كتير انو زوجي عمل هالشغلة لانو بدو اياني ابقى عنده و متمسك فيني معناتا بحبني او بلش يحبني نطرته ليرجع بفارغ الصبر لاساله ليش هيك عملت و نحن ما اتفقنا هيك و بعد ساعة عالتمام اجا لانو ما راح على شغله هداك اليوم و اول ما فات بين عليه التعب و وقت جيت حكيه قلي ما الي نفس احكي و لا كلمة تعباااان بدي نام لفيق منحكي ......
و بس فاق لقاني جنبه صافنة فيه و بملامح وجهه و ناطرته ليفيق قلي صباح الخير قلتلو قول مسالخير قلي لا صباح الخير لانو هلا بلش نهاري و اتصبحت بالوجه الحلو الناعم ( oh my God😁😲😍😍😍قلي وجهي حلو اول جملة مفيدة بيحكيها من اول ما تزوجنا لهلا تغزل فيني كنت رح قوم نط عالتخت من الفرحة متل اولاد صغار بس قلت اتقل حالي شوي بلاش يقول عني هبلة 😊 ) قام و قلي ااااخ ضهري عم يجعني من القعدة مبارح عالبحر قومي جيبيلي مرهم ادهنيلي ضهري (فكرت حالي عم بحلم كانو نام و فاق واحد تاني ) و فعلا نطيت هديك النطة قلت قبل ما يغير رايه هاي فرصة لا تعوض و كانت هديك الليلة اول ليلة زواج فعلية الي ما بس حبر و ورق كانت ليلة بالف ليلة و الشنتة يلي رفعتا فوق الخزانة من سنتين نزلتا بعد شهرين من زواجي الفعلي بناءا على طلبه قلي حاجتها اكلتها الغبرة ... ما سالته ابدا عن قصته مع حبيبته الاولى حتى ما يرجع يتذكرها و يتذكر تفاصيلها و كيف كانت مشاعره اتجاها
زوجي هلا بحبني كتير و بقلي انا محظوظ فيكي لو اي وحدة تانية كانت ما تحملت هالشي كله و تركت و مشيت بس انت صبرتي كتير علي و رجعتيلي الحياة و الضحكة قد ما حبيتك ما بكون اعطيتك حقك و كلمالو الحب عم يكبر و يكبر و خاصة بعدما صار عنا صبي وبنوته
انتهت.


رايكم