أنا بشبه فيروز لما حِب وإنتا شبه أم كلثوم

أنا بشبه فيروز لما حِب وإنتا شبه أم كلثوم

أنا حنيتي خبز وصلاة ،قلبي قلب أم جابت طفلها بعد سنين علاج طويلة وإنتا حنيتك مغمسة بكبرياء ليل معلق ع جبين ختيار رموه ولادو بمأوى العجزة ،

أنا بوقف حد عمري الطويل لإنطرك طفلة خجولة ما بدها تكبر ، عم تخبر حجارة الطريق والصنوبر العابس عنك ، عن اسمك ، عن الجوري يلي ما بيحمل شوك ، كل يلي ناويين يحبوني بحكيلون عنك ، بعلق ضحكتي ع كل شي بخصك ، أنا يلي لو وطني خذلني بركض ناحو لضمو وازرعني فيه وردة مهما يبست ضلوعو .

أما إنت بتسكر عليك العمر وبتترك نارك تاكلك وحدك ، بتخبيني متل جمرة بكبدك ولو صرخت بصوت واضح بتحيّر حتى الوجع بمكان وجعك ، إنتا يلي بحارب ليحمي وطنو مهما خذلو ، بيعطيه روحو بدون ماينطق قدامو كلمة حلوة .!

أنا هَنا بيشبه أول الشتوية وإنتا ليلة كانونية قاسية وعنيدة ،عنيدة كتير!