أخبار_عالريق 302

#أخبار_عالريق 302
✅يكتبها/سعيد الطويل
■ترمب ومرته طلع معاهم كورونا ،وهيهم هلحين معزولين.
■صالح العاروري نائب رئيس 7.ماس برضه طلع معه كورونا بتركيا.
■تعون التوجيهي حيرجعوا عالمدارس مش السبت الي بكرة ..لا اللي بعده، يعني بتاريخ عشرة عشرة بالضبط.
■توفى شب كسيب اسمه موسى تيسير اشتيوي من حي الزتون وقع ع راسه من فوق وهو بيصلح الانترنت .
■توفى كمان شب اسمه محمد الغزالي عمره عشرين سنة بماس كهربة.
■وراجل ثاني عمره 53 سنة اسمه نعمان نبهان برضه توفى بماس كهربة من الشمال .
■توفى بشكل مفاجئ الشب الجدع بلال محمد أبو لحية من خانيونس وهو موجوظ بشغله ،وكان المفروض يعمل عرسه الأسبوع الجاي.
■توفت الصبية دينا منذر الحايك عمرها (19سنة) وأهلها بيحكوا انه القصة فيها اهمال طبي.
■طوشة جديدة برفح الغربية بين عيلتن صار فيها اصابات ومولوتوف وحرق دور.
■الشؤون الاجتماعية بلشت تصرف القسيمة الشرائية لأكثر من تلاتة وعشرين ألف عيلة بغزة.
■الرئيس اعتمد الصيادين محمود وحسن الزعزوع ضمن قوائم الشهد.اء بالسلطة.
■مركزية فتح دعمت على كل الاتفاقيات مع 7ماس وقالت بدنا نكمل القعدات والحوارات معهم.
■ وزارة الصحة استلمت فحوصات جديدة للكورونا من حبايبنا الألمان والصحة العالمية.
■افتتحوا مشروع بدهم يبنوا فيه احدعشر عمارة كبيرة بغزة تكلفته 8مليون دولار بدعم برضه من ألمانيا.
■الصحة العالمية بتقولكم انه فش نهاية قريبة للكورونا بالفترة القريبة لسة طوالة شوية.
■اليهود اعتقلوا الصبيحيات حسن يوسف من رام الله ،،هذا الراجل الغلبان مقعدش بداره قد السجن.
■احصائية الكورونا عنا كانت بالضبط تمنية ماتوا وفي 296 إصابة جديدة بالضفة و127 بغزة وكمان 98 في العاصمة.
■وعدد اللي تعافوا 774 واحد بالضفة و60 بغزة ،و47بالقدس.
■صحة غزة بتقول انه المسحات موجودة بس لكم يوم وبعدها حتخلص.
■لبنان توصلت لاتفاق انها ترسم الحدود البحرية والبرية مع "إسرائيل".
■سوريا صرحت انها بترفض توقيع أي اتفاق لتطبيع العلاقات مع "الاسرائليين".
■موسم البلح الأحمر والرطب بدا عنا بشكل رسمي .
■السلطعونات الها كم يوم مختفية من السوق.
■الكولا كلوب السمرا صرنا بدنا واسطة لما نشتريها من الدكانة ..صاروا يخبوها للعزيز الغالي.

#صباح_الخير للأم اللي ململمة أولادها اليوم حواليها وعاملالهم مقلوبة من اللي يحبها قلبك ووصت بنتها الوسطانية تزبط صنية مبروشة بطلطلي التين وتعصر شافين جوافة كبار الهم وتحطهم بالتلاجة لبعد الغدا.

#صباح_الخير للأبو اللي طلع من الصبح يلقط رزقه ويشتغل عالخط ويطقش هان وهناك ،عشان يقدر يوفر الشغلات اللي طلبوها منه بالدار.

#صباح_الخير للأخت اللي باعت خاتمها الدهب عشان تسد عن أخوها قسط الجامعة وميروحش عليه فصل التخرج.

#صباح_الخير خص نص لأصحابي بجروب الغزوات والقادم أجمل ان شاء الله 🙂

#يسعد_صباحكم بكل الخير🌸
جمعة مباركة 💙
وصلوا عالنبي الحبيب صلى الله عليه وسلم
2/10/2020