نشرة الاخبار اليوم

#أخبار_عالريق 209
✅يكتبها/سعيد الطويل
■حنبدا يومنا بسيرة الشهد.اء ،أجمل السير وأكرم البشر .
■اليهود مبارح أعدموا بدم بارد شب جنتل اسمه أحمد عريقات بالضفة ،كان رايح على عرس أخته ،فقلبوا الفرح كرح ،الله ينتقم منهم.
■توفت مبارح الحاجة أم محمد مرت الشيخ أحمد يا.سين ،كانت تعبانة الها فترة ونقلوها ع مستشفى الشفا وتوفت هناك ،الله يرحم روحها.
■شب اسمه محمد شعبان مغترب بتركيا غرق بالسيول وربنا أعطاكم عمره.
■شب انقتل بطوشة ازالة تعديات بين السلطة والناس في العيزيرة بالقدس والشرطة بتحقق.
■في الأربعة والعشرين ساعة اللي راحوا بس،لقيوا فوق ال330حالة معهم كوورنا بالضفة معظمهم من الخليل ،الله يهون عليهم.
■بيقلك الخمسين مليون دولار تقريبا جاهزة ،وحيبلشوا يصرفوا مصاري العمادي (ال100$) أول الأسبوع الجاي .
■أي صالة أفراح أو أي جامع بغزة ،بيلتزمش بالتعليمات تبعت الحكومة حيسكروه.
■بالضفة منعوا كل الحفلات بكل المدن والمحافظات والشوارع والحارات.
■بالنسبة لحجاج هذا الموسم واللي ما صار الهم نصيب ،الأوقاف حتجتمع عشان ترجع الهم مصاريهم ،وان شاء الله السنة الجاية بتعوضوها .
■بدهم يعملوا بنك حكومي جديد عنا ؛ويحطوا فيه رصيد ب 100مليون دينار.
■مصر بدهم يبلشوا يلغوا منع التجول شوي شوي بدءا من يوم السبت.
■اجتماع الحكومة واللجنة المركزية والتنفيذية حيكون اليوم الظهريات بمنطقة الأغوار،وبيقولوا حيطلعوا منه بقرارات مهمة.
■كلفوا حمدان رضوان رئيس جديد لبلدية بني سهيلا بشرقية خانيونس.
■دراسة مهمة بتقلك انه الزلام بيرتفع عندهم هرمون السعادة لما تطلع نسواهم من الدار وتروح ع دار أهلها كم يوم هي وأولادها ،(المصدر أبو عدنان راجل طيب متجوز من 12سنة)
■لولا صدر الحبش عالناس بهذه الأزمة كان قضوها عدس ومعكرونة،كيلو الصدر صار ب12شيكل .
■كل اسبوع بيخسر قطاع النقل والمواصلات11مليون دولار ،الله وكيلك.
■عبدو الحلاق بيقلي الشغل نايم خالص الشباب صارت عندها موضة تربي دقونهم من الفلس ،والزلام صارت تجيب ماكينة بالدار وتحلق لأولادها.
■وفد من 7ماس ,.مبارح بقطر التقوا بوفد من الخارجية الروسية،وزي ما كتب الخبر حكوا بمواضيع مهمة.
■برشلونة فاز بزود الرجل على ضيفه أتلتيك بيلباو بقون واحد وحيد ، ورجع لصدارة الليجا من أول وجديد.
■سكروا مخيم الدهيشة 24ساعة عشان يكتشفوا الحالات اللي خالطوا بالعرس.

#صباح_الخير للناس اللي بتصحى زينا من الصبح بدري وبتحبش الكسل وبتضيعش قيلولة الظهريات بعد الغدا.

#صباح_الخير للناس اللي نامت تفكر بكرت الكهرب اللي خلص وكيس الطحين اللي ضل فيه آخر عجنة،ربك بيعين يا معين.

#صباح_الخير لكل واحد بعرفش يبدا يومه الا وفنجان القهوة يلاقيه محطوط جنب راسه وتحتيه الصحن وكباية المية الساقعة ،المهم أنا عمريش شربت القهوة وصحة وعافية.

#صباح_الخير للأب الحنون اللي قدر يفرح أولاده وياخذهم عالبحر وهو مفلس ويحشي الهم سندوتشات فلافل وزعتر وجبنة فيتا وشوية خيار وبندورة وأخذ معاه 10عرانيس ذرة بخمسة شيكل وسلقهم عالحطب وروحوا بالليل بعد أجمل يوم قدر يفرحهم فيه.

#صباح_الخير للأم اللي شايلة هم بناتها المتجوزات ليل نهار وبتقصرش فيهم وبتقطع عن تمها عشان تسعدهم ..الله يسعدك يا حجة.

👈 النشرة اليوم طويلة شوية ،لو لقيت فيها ملل انصحنا على عيني وراسي، ولو لقيت أمورها تمام ادعمنا بلايك وزي ما صبحنا عليك صبح علينا .

#يسعد_صباحك 🌹

يعطيك العافيه ع المتابعه..

يسلموو لنقل والمتابعه

مشكور للمتابعة

	السلام عليكم ورحمة الله وبركاته يسلمووووا ع الخبريات المنوعة والمتابعة يعطيك الف عافية بانتظار جديدك دائما تحيتي