أخبار_عالريق

#أخبار_عالريق 182
✅يكتبها/سعيد الطويل
■بتاني يوم للعيد حنشوف طقوس ونهفات جديدة ،بس بدون مينا وجندي وملاهي ومنتزه وأصداء وحديقة فتحي .
■فوق ال340 ألف بني آدم ماتوا من الكوورنا ع مستوى العالم ،وفي خمسة مليون ونص وصلهم الفايروس لهلحين.
■خالد مشعل اتصل ع أبو مازن وعايد عليه واطمئن ع صحته وسلامته .
■توفى اتنين فلسطينية جداد من المغتربين بالكورونا ،واحد من روسيا والثاني من السعودية .
■فش عينات جديدة اخذوها من المحجورين بغزة ،وكمان فش ولا إصابة جديدة عنا ولا بالضفة.
■قطاع غزة أنتج مبارح نص مليون فرشوحة شاورما نصهم مش مستويات وانباعوا للولاد الصغار.
■فش حد متكركعش بطنه مبارح من "لخبطة الفسيخ والكعك والفستق والفول النابت وهي القوس مفتوح قدامك يخوي ضيف اللي بدك اياه......
■حجم تبادل العيديات مبارح ،صار زي البورصة،انت تعيد ولادي وأنا أعيد أولادك،الأبو بيدفع والأم بتضبهم بالجربانة.
■كمية البواريد البلاستيك اللي شفناهم مبارح مع الصغار زمان ماشفنا قدهم عدد مع تنظيماتنا.
■بأول يوم بالعيد اندهس ولد صغير عمره اربع سنين ،اسمه جواد سالم مراد ،من غزة..ديروا بالكم يا جماعة وتكسروش فرحة العيد.
■بشكل تدريجي حتبلش حركة تصدير الكناين واستيراد البنات المتجوزات من بعد ظهر اليوم ،وحتكتمل العملية بشكل كامل بكرة الظهريات.
■أزمة العيدية الورق بينت مبارح ،وفي ناس اعطوا العشرين شيكل حديد وشواكل ..صدق ملهاش هيبة.
■بأمريكا لحالها 100ألف واحد مات من الكورونا ،وعدد اللي انصابوا مليون وستمييت ألف .
■الجو حيكون اليوم زي مبارح ،بس أدفى نتفة صغيرة ،لكن برضه مش حتشغلوا المراوح.
■اللون الأصفر أكثر لون أواعي مبارح شفته لابسينه بالعيد .
■سعر الدولار اليوم ب3.53 .
■بعد صلاة الجمعة الأخيرة والعيد ،الجوامع رجعت تسكرت ثاني.
■أحلى حاجة شفتها مبارح بالعيد ،صور الولاد الصغار اللي نازلة عالنت بالأواعي الجديدة والنظارات والشنط اللي فيهم العيدية.
■الزيارة الرسمية للنسايب الجداد بتكون تاني يوم العيد،وبكرة كل واحد بيروح يطشش خطيبته وهيا اللي بتعزمه بعديتها.
■تعون التوجيهي بلشوا بالعد التنازلي ،عالسبت الجاي بيكونوا جوا قاعات الامتحان ..الله يوفقهم.

#صباح_الخير للمغتربين والمغتربات ،الطلاب منهم واللي مش طلاب ،اللي نفسهم يحضنوا أهاليهم ويجتمعوا معاهم ع صحن الرنجة والبندورة المقلية بأول يوم بالعيد.
-صباح الخير لأهلنا وطلابنا المحجورين اللي عاشوا تجربة بالحجر مخطرتش ع بال بشر ،بس كله عشان سلامتكم يخوي.
-صباح الخير لكل مريض بيناجي الله يشفيه ويعافيه ؛وقضى عيده بالمستشفى بدون مرافق .
-صباح الخير لكل واحد انكسر خاطره ومقدرش يعيد رحمه ،ودخل عليهم بكيلو فستق ،معلش ربنا حيغير هالحال ي عم.
-صباح الخير للناس الجدعان اللي عندها قناعة بتسد عين الشمس ..للناس اللي مستعدة وقت الشدة تصنع من الفسيخ شربات...
#صباح_الخير وانبسطوا بعيدكم انتوا وأولادكم رغم كل حاجة ..وقولوا الحمد لله 🌹