اخر الاخبار

✅يكتبها/سعيد الطويل
■مبارح قبل الفطرة بشوية غرق ببحر السودانية جارنا الشب الصغير المؤدب رياض عداون الله يرحم روحه ويصبر أهله.
■قبل السحور كمان توفت بنت صغيرة بعد ما وقعت من البلكونة ببيت لاهيا.
■اليوم حيبلشوا صرف بمنحة العمادي تبعت ال100دولار من مكاتب البريد.
■في ناس كثير مطلعلهمش المنحة وهما بيستحقوا زي أبو فريد اللي عنده 12نفر وبياخذش شؤون ومريض وكان يشتغل وقعد من سنة زمان.
■اكتشفوا 10حالات كوورنا جديدة بالضفة .
■الجو اليوم ربيعي ومرتب وفش فيه شوب ولا برد.
■الصحة العالمية بتقول انه فيروس كورونا أصله طبيعي ومش من صُنع البشر زي ما بعض الناس بتطلع اشاعات.
■اللواء محمد شاهين بينفي انه كلفوه محافظ للمنطقة الوسطى ؛ومعندوش علم بالموضوع.
■في عنا صار 350ألف واحد عاطل عن العمل وبيشتغلش لهلحين في قطاع غزة.
■طلاب الماجستير بجامعة الأزهر طلعوا بيان رافضين في الامتحانات وبدهم الجامعة تلتزم بقرار التعليم.
■كيمو الزعيم الكوري الشمالي طلع عالتلفزيون وصحته عال العال ،وحيدبح عجل بعد بكرة.
■جروبات النسوان عالواتس أب صارن أكثر وأهم من جروبات الأخبار وسعر البورصة.
■د.اعش تبنت استهداف مدرعة للجيش المصري في شمال سيناء أمس اللي استشه.د واتصاوب فيها مجموعة من الجيش أول مبارح قبل الفطرة .
■اليوم كل معابر قطاع غزة مسكرة.
■سعره الدولار نازل شوية وصاير ب3.49.
■عدد اللي توفاهم الله من المغتربين الفلسطيين بالعالم من كوورنا 62 ؛وعدد اللي صار معهم الفايروس 1250.
■التصريحات بينا وبين السعودية بدت تتعدل وناس عاقلة بلشت تحتوى القصة.
■جماعة التويتر عندهم طولة بال وتركيز أكثر من العجايز اللي بيقعدوا ع باب الدار.
■الشمام تبع العصير الخمسية بمية.
■ركزوا الفترة الجاية على ريكسونا وريحة الجسم عشان متاكلش مسبات وتلقيح كلام من الناس .
■في ضغط ع أكلات الكرشة والمومبار هالأيام مع الفضاوة.

#صباح_الخير للناس الأصيلة جدا اللي بتحب الخير لغيرها وبتنبسط كثير لما تشوف غيرها بيجيله رزق وبتلاقي فرحتها أكثر منك انت .
-صباح الخير لكل واحد مش مقصر بزيارة رحمه وبيروحش رفعان عتب.
-صباح الخير لأبوي وتاج راسي اللي اليوم عيد ميلاده ..والله يعطيه الصحة والعافية.
-صباح الخير لكل اخت بتحوش من مصروفها عشان تعطي أخوها يلعب بليي ستيشن 🙂.
-صباح الخير لكل أخت كبيرة خففت زياراتها لدار أهلها.
-صباح الخير للناس اللي طولنا عليهم بالنشرة بس للأمانة كل يوم سبت بتكون الأمور ناشفة والأخبار فيها غلبة .

#يسعد_صباحكم 🙏🌹

يعطيك العافيه لاادراجهم
دمت

يسلمو للمتابعة

الله يرحم يلي ماتوا
يعطيك العافيه ع المتابعه

شكرا ع المتابعة والنقل
وردي

مشكور للمتابعة
تحيتي لك

يسسلمووو
يعطيك العافية

شكراً لك
تقديري

اخبار ممتعة ميزتها تختصر الواقع بلهجة قريبة للكل

بتابعها كل يوم وبختصر على حالي تصفح الاخبار


يسلموا ل ادراجها

يعطيك العافية
لادراجك ومتابعتك هالاخبار ..