لا تعتذر وان رحت عادي ومسموح

لا تعتذر وان رحت عادي ومسموح
لا بشتكي منك ولا بشتكي لك

من عينك مبين تبي تغيب وتروح
وانا بعيني واضحه حاجتي لك

عادك بعد ماقفيت وانازع الروح
وشلون اوصف بالجفاء حالتي لك

يعني طريح فراش والحظ مطروح
باقي علي شوي واصبح قتيلك

مهما خفيت الجرح للناس مفضوح
كلٍ درى بالجرح من نظرتي لك

جره يابن دلان في صوت مبحوح
لكن على قلبي ترفق دخيلك

لا صار مايوصل من أحساسي البوح
صوتك دليلي وانت قافي دليلك

لا يا حمام الدوح لو تترك الدوح
مالك من الاغصان غصنٍ يشيلك

ولا تخلي واحدٍ منك مجروح
خله على حب وكرامه يجي لك

وان كان هذي رغبتك ودك تروح
مسموح لكن اعتبرني قتيلك