أخبار_عالريق 117

#أخبار_عالريق 117
✅يكتبها /سعيد الطويل
■الصحة بتأكد أنه كل الحالات الي انفحصت عشان الكورونا #بغزة سلبية وفش ولا حالة حتى الآن والحمد لله.
■المحجورين الجداد الي جايين من جهة ايرز حيزبطوهم ويتحولوا ع مركز مسقط بين رفح وخانيونس وفي هناك سراير والأمور أحسن من مرمرة بكثير.
■الوكالة شكلها حتغلي هذا الفصل للطلاب وتحط نتائج الفصل الأول لهذا الفصل والسلام ختام.
■اليي عليهم مصاري وذمم مالية وقصص صغيرة ومحبوسين بالنظارة حيروحوهم وياخذوا اجازة أسبوع واحتمال تتمدد شوية.
■الدولار سعره شابط فوق خالص ومولع نار،وشكله حيوصل 4شيكل كمان كم يوم.
■يوم 28 بهذا الشهر حتتغير الساعة ونقدم ستين دقيقة لقدام .
■وزارة الصحة مصرحة ع دنيا الوطن انه الي حيموت من كورونا حيغسلوه بالمستشفى ويدفنوه بطريقة خاصة كمان ،الحمد لله اطمئنينا هيك.
■عيادات الوكالة حتشتغل ابتداء من اليوم للحالات الطارئة بس ،وحكولنا بلغوا النسوان انه فش لا عيادة أسنان ولا مختبرات ولا علاج طبيعي ولا حتى تنظيم حمل.
■بيقلك بدهم يعملوا رحلة مجانية ع أصداء والملاهي للمحجورين بمدرسة مرمرة برفح.
■ادارة مدرسة العقاد مش راضية تنقل المختار أبو حسين عند نسيبه المحجور بالصف الثاني 3 ،والراجل عامل مناشدة بيطالب الإدارة تحله.
■مسكوا واحد بيبيع معقمات مغشوشة وبيبعها للناس ع أساس انها أصلية ،الله لا يكسبك يا بعيد.
■مبارح بالليل خبطت عربية شرطة مسرعة بيافطة بطريق صلاح الدين وتصاوب 3من الدورية وربك ستر.
■الرجل "خافة كثير" من زيارات البنات المتجوزات لبيوت أهاليهم.
■‏بيقلك شركة "حضارة" بدها تزود سرعة الإنترنت للمشتركين بالضفة وغزة مجاناً لـ 30 يوم كاملات ،خلي الشعب يعيش.
■رجل أعمال محترم تبرع مبارح ب50 تخت للمحجورين الي بمرمرة.
■شباب زي الورد حيتحركوا اليوم معنا بمبادرة خاصة ويقدموا سلة صحية متكاملة ومستلزمات ثانية برضه للمحجورين.
■مبارح استلموا فندق جراند باراك الي برام الله عشان يحولوه لحجر صحي ،ناس متعاونة وبتفهم يعمي.
■سكروا مدينة طولكرم بالكامل عشان اكتشفوا فيها حالة وحدة بس.
■الجيزة الي عالسكت كترانة هاليومين ،خذوا بالكن.
■الله يعدي هالكورونا ع خير ،البلد حالها واقف وفش حركة الا عالمكياجات والمكسرات وعروض الشيبسي.
■البرتقان الشموطي الي حبته كبيرة بينباع الثلاثة بمية ،والكلمنتينا والرمان الي بالسوق مش شد ايدك .

#صباح_الخير لسواقين السكودا والباصات الي تغيرت معهم الأمور بعد ما سكروا الجامعات..والله يرزقكم
-صباح الخير لأصحاب المطاعم الي عند رمزون الأزهر وشارع جامعة الأقصى الي كمان تسكرت مصالحهم ..ربنا يجبر عنكم.
-صباح الخير لأصحاب الصيدليات الي بيغشوش الناس بالسعر ،خاصة بالمعقمات.
-صباح الخير خص نص خاصة لأبو مهيب المحجور بالصف السادس 3 بمرمرة.
-صباح الخير للصبية الي عرسها بعد أكم يوم وقاعدة بتدعي ليل نهار ما تتسكر الصالات عشان فرحها يعدي ع خير.
-صباح الخير للناس الي عالمعدية وجايين بطريقهم للحجر .

#يسعد_صباحكم_بكل_الخير 🌹

البرتقان الشموطي الي حبته كبيرة بينباع الثلاثة بمية ،والكلمنتينا والرمان الي بالسوق مش شد ايدك

هاد اهم خبر سيبنا من الكرونا وقرفها هههههه
عوافي

هههههههه والله احنااا ششعب 100 كورونا م بتطلع معنا براس

كتيررر حبيت طريقه عرض الاخبار

معلومات صحيحة بس بطريقه كتير خفيفة دم

يسسعد صصبااحك مراسسلنا مؤمن هههه

بحب طريقة سرده للأخبار
الله يفرجها علينا
يعطيك العافية مؤمن

راسنا ندوشت منه
صارت كل حياتنا وحديثتا عنه
عوافي مؤمن

هههههههه
انا مش متابع ولا بحب اتابع الاخبار
لكن بهيك طريقة عرض
ممكن أتابعهم
تسلم على طرحك

ههههه يسعد قلبك يامؤمن
موتت ضحك ع أخباره رهيب هالزلمة هههه

الله يعافينا ويعدي هالأزمة ع خير
والله الوضع ماهو ناقص الحمدلله ع كل حال

ب انتظار جديدك ان شاء الله
وردي

■الله يعدي هالكورونا ع خير ،البلد حالها واقف وفش حركة الا عالمكياجات والمكسرات وعروض الشيبسي.
ههههه
منغش هالبني ادم
ان شاء الله بتعدي ع خير ي رب
لانه كل حياتنا صارت كورنا ب كورونا
يسلمو للنقل مؤمن

هههههه بحب اسلوب السرد ممتع والله

عسى ربي يكتبلكم الخير ويبعد عنكم الشر

هم بيضحك وهم بيبكى
الله يجيرنا من اللى الجاي
يسسلمو للمتابعة مؤمن