كلمة من مواطن بغزة الي حماس

أولاً: حصار غزة سببه وجود حركة حماس على رأس الحكم فيه، أما أن تصنفه عقاب إلها لأنها رأس حربة المشروع الاسلامي المقاوم، أو مؤامرة كونية مليش دعوة المهم في المحصلة غزة محاصرة .
- تسيطر حركة حماس الآن على بلديات قطاع غزة، وإذا فازت حركة حماس بالانتخابات لن يتغير أي شيء، وستبقى الخدمات المتواضعة على حالها، وستبقى الضرائب والجباية على حالها، بل ربما تزيد بحجة (الشعب انتخبنا) يعني مش راح يتغير أي شي، بل رُبما يعاقبك المجتمع الدولي ويفرض عليك حرب جديدة، أو حصار أكثر خنقًا.
أوباا، يعني بدك انسلم للمجتمع الدولي ونبيع القضية يا علماني يا زنديق ؟! لا طبعًا بس بدي تسيبك من الشعارات شوي، إنتا من غير المجتمع الدولي والمساعدات المشروطة مش حتعيش ولا حترصف شارع ولا حتبني مدرسة ولا حتزرع شتلة زراعة .. الشتل بيجيك مساعدات دولية زيه زي الراتب والرز والسكر وحفاظات الولاد .. فدشرك من موال التبعية لأنك عايشها من زمان بس بتستهبل.
- حركة حماس رائعة والشهادة لله قضت على معظم التجاوزات من العائلات، وفيها كل الحاجات الحلوة، وياسيدي تزعلش علّمت الناس الصلاة والصوم ومنعت المنكرات .. أوك، بس عامل الكهرباء مش حيجيب صهريج حسنات ويكبوا في محطة الكهرباء عشان تضوي على أمك العجوز، ومهندس البلدية مش حيجيب شحن حسنات ويرصف فيه شارع البحر، الشارع بده زفتة، والزفتة عند الدول المانحة، والدول المانحة عندها (وثيقة نبذ الإرهاب) والتشييك الأمني، زي قصة الرواتب اللي انصرفت من خلال بنوك العدو الصهيوني قبل كم يوم، يعني قصة بدنا عنب وبدنا نقاتل الناطور هاي بتقولها لما تكون عندك القوة والامكانيات الحقيقية مش الإعلامية، أو في الدار قدام المرة والولاد من باب شوفيني يا بنت خال.
- صحصح معي، غزة بدهاش شغل كايدة العُزال أنا من يومي، ولا بدها حسنات، ولا خطابات، ولا جوامع، ولا مزايدات، هاد كلام بيطعمش خبز ولا بيصرف راتب كامل، غزة بدها تفضل على قيد الحياة "خاوة" ، عشان تشحن بطارية الصمود ولو ضل الأمر على ما هو عليه، راح يفعط فيك الفخ إللي نصبوا الك اللي بتسميهم (الخونة المتآمرين العلمانيين الزنادقة الكفار) إللي هم قاعدين تحت التكييف بيضحكوا عليك وبيلعبوا في أمانات الكهرباء، بعد ما ورطوك وإنت صدقت حالك، وأنت بس بتصرخ وعامل فيها أبو شهاب في باب الحارة، وإنتا ما عندك طبيخ تتطبخه للولاد ولا رواتب للموظفين .. طيب شو الحل ؟! .. الحل إنك تنتخب حماس عشان يفعط الفخ ونغرق كلنا ونفك من أم هالعيشة كلها .. وسلامو عليكو.

محمود جودة

غزة لها الله طول ما حماس حاكمة فيها
10 سنين الوضع بيزداد سوء وخنقة وضيق وفقر وبطالة وازمات وحروب
وهما قاعدين ومستمرين
يا اخي انت شو بتعمل قاعد
موجود على سدة الحكم لهلوقت ليش وانت مش قادر تعمل شئ
يا اخي اضغط على نفسك واتركها عشان هالشعب الي بيعاني وبيموت
يخرب بيتك الناس بتموت ع المعابر وفي المستشفيات
والفقر والبطالة اصبحت شئ لا يُطاق


الله ياخذهم ويريحنا منهم

مش عارفه اذا كان ليا حق أتكلم في موضوع بيخص غزة أو لأ
بس هقول رأيي رغم اني مش قادرة أحكم عليه أو أقيمه
اذا كان صح أو غلط
لفتت نظري العبارة دي

بس بدي تسيبك من الشعارات شوي،

طالما من وجهة نظر حماس انهم لو سابو غزة هتخرب
وغزة على حسب ما بشوف وبسمع إن أوضاعكم الاجتماعية فيها مش كويسة
فيبقى ليه متفكرش حماس انها تسيب غزة طالما هي خربانة خربانة
يمكن الأمور تتصلح شوية
يدوا الشعب الغزاوي فرصة علشان حتى يعرف قيمتهم لو كانوا صح
أو يرتاح منهم لو كانوا غلط
وفي النهاية الدين والإسلام هم مش ولاة عليه
ممكن يدافعوا عن الدين والإسلام بس من منابرهم وقنواتهم الشرعية
كإسلاميين
ووقت الحرب الكل هيكون حاضر أكيد
لأن اسرائيل حجتها في الحصار والقرف اللي غزة فيه
انها بتحارب حماس
طيب ما تشيل ده من ده يمكن يرتاح ده عن ده
مش هتخرب اكتر ما هيا
كل الشكر وطن وأتمنى انك تقبل رأيي بصدر رحب

حسبي الله ونعم الوكيل

الحكي كتير بس مافي حل

ربنا يفرجها علينا

شكرا لنقلك مؤمن

انا برأيي انو قصه الانتخابات كلها لعب بلعب

يعني اسمحولي واحد كان كبيرو ع كاره او بياع او مسجون

فجأه صار ماسك وضعو وغسيل اموال ومصاري عمر اهلو م كانو يحلمو فيها

وصار عندوو حراسات وسلطه بدو يترك هلشي؟
اكيد لا

لهيك بفضل م حدا يتأمل من ورا حماس اي نوع من انواع الخير لانو م بيجي من وراهم الخير

شكرا مؤمن ع النقل

واذا بتعرفو الشب قلوو والله انك زعيم

مببعرف ششو احكي

مشككور للنقل مؤمن

ععوافي

ربنا يصلح الحال
مشكور ع النقل مؤمن

واضح انو صاحب الرساله انسان واعي

كل الاحترام لكلشي انحكى هون

تحياتي ﻻالك مؤمن

ومشكور للنقل

يسسلممو مؤمنن !
لكك اللهه يـآ غغزهه و ششععبههآا ☺ ')
وردهه