قوانين العزومة للخطيبة المظلومة ، عمر زوربا

نصائح للخاطبه لما تعزم خطيبها عالغدى!

الله يكون بعون البنت الخاطبة ، اللي عندها اب ، و ام و ٤ خوات ، + الاخ الحمش + الاخ اللي بوكل كتير + الاخ الصغير الزنخ ،، الله يكون بعونها لما تعزم خطيبها عالغدى !!

ويكون خطيبها اصلا من النوع اللي بستحي!
ويلها الاخ الحمش اللي اصلا بدوش ياها تخطب ، وبدوش العزومه كلها اصلا قبل كتب الكتاب ، وبدوش ياها اصلا تطلع بالعزومه ، وبدوش اصلا خطيبها يعرف اسمها ، وبدوش تضحك قدامو ، وبدوش تتمنكر ، وبدوش توكل ، وبدوش تقعد جنبو او قبالو ، وبدوش يطول عندهم ، وبدوش اصلا اشي!
( هاد الحل مشان يكفيكي شره ، قبل العزومه بساعه ، احكيلو عفكره صاحبتي بتضل تجيب سيرتك وتحكي عن شخصيتك انها كتير حلوه ، رح يصير اكثر شب منفتح بالحياه ، وعادي لو تمسكي ايد خطيبك وتقعدو عالبرنده وتشربو شاي بنعنع وترمو حجار صغيره ع ولاد الجيران )

الاخ اللي بوكل كتير ما بهمو اشي الا انو يوكل ، بتعزم خطيبها ، بتعزم هتلر ، بتعزم فريق فالنسيا ، المهم يوكل!
( هاد الحل معو ، امنيلو خبز ع يمينو ، وضلي صبيلو بيبسي ، وخلي صحنو قدامو مليان )

الاخ الصغير الزنخ هاد ما بتاخد ع مكان ، ولا بتصاحب ، ولا بنمزح معو ، بس اعطيه مصاري ، وتحكيش معو ولا كلمه ، وتسألوش كيف دراستك ، وتسالوش ليش هيك حالق ، وتسالوش ليش لابس نص كم بعدها الدنيا برد ، وتسلوش اشي ، لانك اذا سألتو ، رح يعيد السؤال بصوت زنخ مع مدة لسان وينكسك قدام خطيبتك والعيله!
( هاد الحل معو اسلخيه ١٠ ليرات خمستين قبل العزومه ، بصير اطيب من قلب محمد فؤاد )

اما خواتك ، تخليش ولا وحده تشارك بالطبيخ معك ، او تعمل اي اشي ، او تتعب حتى بحط معلقه عالطاوله ، لانها مش رح تختصر ، لو تموت لازم تحكي عن الانجاز اللي عملتو انها فرمت السلطه ، وانو هي اللي حطت الملح عليها ، ولولاها كان العزومة خربت!

وتخليش وحده تسشورلك ، او تلبسك بلوزتها ، او تعيرك اي اكسسوار ، وحاولي اختاري اخت من خواتك اللي ابدا مش مزاجيه ، اتفقي معها عموضوع الجلي ، وحاولي تتأكدي انو هي اللي رح تجلي ، بلاش تخدعك بالعزومه !

اما امك فهي بدها مصلحتك ، وبالعزومه اتركيها توصفك لخطيبك ، تعارضيهاش ، يعني لو سمعتيها بتقول بنتي بتلف دوالي ، وبتلعب شطرنج ، وبترقص باليه ، وبطلة المنتخب بالطبخ ، وانك ممن الاوائل دايما وعندك شهادات تقدير بالخزانه ، تعارضيش !
بس حاولي اقنعي امك ما تفوت عغرفتها وتطول البومات الصور القديمه ، لانو امك الوحيدة اللي بتشوفك حلوه ، حتى بصورتك وانتي ماسكة سماعة التلفون الارضي وحاطيتها ع دانك وبتتفرجي عالكاميرا ولابسه جرابات كشكش لون ابيض وحاطه اجر ع اجر !

اما ابوكي ، بما انو امك راضيه ، ف هو راضي ، وبدو يشتري راحة راسو!

وشكرا



ههههههه رهيب عمر زوربا

هههخههههههه
الله يكون بالعون
ههههه
يسلمو

ههههههه
منجد كل هالأنواع عنا وحصل أكتر من هيك بخطوبة أختي وكل ما بتزكرها بضحك عليها
يسلمو حنين ، يعطيك ألف عافية ..

هههههه معقول هيك بيصير
مهو بعد كتب لكتاب احنا بنتركهم لحالهم مافى لاكبير ولاصغير
بحس بطلو الاهل يقعدو مع بنتهم وخطيبها بنفس الغرفة
صار فى انفتاح ووعى اكتر عند الناس
كلامه مبالغ فيه حاسسته
مشكورة حنو

هههههه
خواتي خطبووو
ما صار هيككك عنا
يمكن مش كل الناس ههه
يسسلموو سوار