28 نصيحة لكِ غاليتي ضعيها نصب عيناكِ..!

طيب ركزي معايا كده الله يكرمك .. دول شوية نصايح ليكي يعني



١- فيه شعراية مابين الثقة بالنفس والغرور , حافظي عليها ..

٢- مش كل اللي هتعاشريهم هيحبوكي , الحقيقة المرة : ))

٣- إوعي تيجي في يوم من الأيام علي خاطرك , إلا كرامتک ..

٤- ممكن جداً تضحي عشان اللي بتحبيهم لكن لو سابوا خلاص سيبي .. مفيش حاجه مستاهلة والله

٥- خليكي عارفة ان شهادتک وتعليمک هما الأولويه وبعد كده أي شئ تاني ..

٦- ما تعيطيش قدام أي حد , العياط بالذات خليه بينک وبين ربنا , البشر هيذلوكي بعياطک ده صدقيني !

٧- ماتفضليش تعاتبي في نفسک ع الفاضي و ع المليان , اتصالحي معاها أحسن بكتير .. حاولي !

٨- انتي لا اختارتي لونک ولا شكلک ولا اهلک , فـ ما تفضليش تدوري إنک تحسنيهم , حسّني اللي فـ إيدک زي اخلاقک و تعليمک .. صدقيني أهم بكتير ..

٩- ماينفعش تكوني مسلمة وخلاص , قدمي حاجة لدينک تعرفي تقوليها لربنا لما يسألک عملتي ايه ؟!

١٠- اقرأي كتير , ثقفي نفسك , إنتي مش كمالة عدد إنتي أهم عنصر في المجتمع ومن غيرک مفيش مجتمع

١١- البنت بطبعها حساسة , والبشر بطبعهم مستفزين , فما تاخديش علي كلامهم و اسمعي من هنا و فوتي من هنا , مش كل الكلام اللي يستحق ننتبه له

١٢- لو حسيتي في اي وقت انک مخنوقة , ماتروحيش لأي حد , روحي لربنا , وإلا تبقي رايحه تدوري علي العلاج في إيد مرضي !!

١٣- لو افتكرتي ذكري مؤلمة مريتي بيها , افتكري بالمرة بعدها ذكري حلوة , أي ذكرى حلوة و اسرحي فيها و في تفاصيلها حتي لو كانت حلم , أيوه حتي لو كنت مجرد حلم و خيال .. اعملي كده كل مرة وصدقيني هتنسي متخآفيش

١٤- محدش صحته تتدهور مكانک لما تقصري في أكلک ونومک وتهملي صحتک لأي سبب , قومي بصي لنفسک اللي انتي بقيتي بتبصي لكل حاجة الا هي , ليها عليكي حق

١٥- هتسهري تعملي حاجة مفيدة كان بها , هتسهري تعيطي أو تقلبي في اللي فات , فنامي أحسن , حتي النوم بدري صحي ومفيد , جداً يعني

١٦- اقرأي قرآن كل يوم ولو نص صفحة , ولو ربع صفحة , المهم مصحفک مايفوتش يوم عليه وهو مركون , في حين إن موبايلک فـ ايدک ليل نهار !

١٧- مِـ الآخر هتقصري في صلاتك , معدل اصابتک بالهم والنكد والكوارث هيزيد , ومعدل فقدانک للحاجات اللي بتحبيها هيزيد جداً , ويبقي ربنا بيحبك وقتها انه بينبهك إنک ماشية غلط , لان عقاب الاخرة أهول , كله إلا الصلاة علشان دي بالذات مفيهآش هزار فبلاش تجازفي

١٨- عاوزة تفرحي حتي من غير سبب , وكل ما حاجة تتقفل في وشک تتفتح ! الزمي الاستغفاااار .. هيشيل عنك اي كرب

١٩- صدقيني قيمتک بتعلي كل ما زاد المستور منک , واللي معجب بـ بنطلونک ده هو هيفضل معجب فعلاً ! لكن يوم ما يفكر يتزوج هيختار اللي صانت نفسها وعلي فكرة هي عندها بنطلون بردو بس مش للشارع

٢٠- بصي لنفسک في المرآية من وقت للتاني و إهتمي بمظهرک بدون اضافات , خلي اللي يشوفک يقول إن لسه فيه بنات ع كوكب الارض عآيشيين زي ما ربنا خلقهم , يعني بلاش تشطيب الشقه اللي بنشوفه ده , ربنا خلقنا كلنا فـ أحسن صورة , و بطبيعتک هتبقي أجمل , خليكي وثيقة م الفوز كده

٢١- مفيش حاجة في الدنيا هتقدر تكسرک الا اذا انتي ادتيها الفرصة لكده .. فإجمدي كده اومال

٢٢- مشكلتك إنک بتنسي انتي حفيدة مين , يا بنتي عياطک وضعفک دول ما يليقوش بحفيدة خديجة اللي وقفت في ضهر النبي

٢٣- محدش هيهتم بمصلحتک قد والدک و والدتک , فـ بريهم و اسمعي لنصيحتهم و حسي بالنعمة اللي غيرک حس بيها متأخر

٢٤- بصي أنا عارفة انه مش كل الناس بتسامح , بس انا هقولك حاجة .. الغل اللي فـ قلبک تجاه اللي ظلمک ده انتي اللي مضرورة بيه مش هو ! صفي قلبک من أي حاجه و سيبي ربنا يبدع في تصفية الحسابات , هيجيبلک حقک والله , بس حاولي تسامحي لقوله تعالى ( فمن عفا و أصلح فأجرهُ علي الله) .. بقولک حاولي بس

٢٥- الزمي ذكر الله في كل وقت وخصوصاً وقت الضيق .. ويا حبذا لو كان جهر .. هينزل علي قلبک طمأنينه من حيث لا تدري .. والله والله

٢٦- ارسمي ولو مابتعرفيش ارسمي بردو .. اللي رسموا قبلک مانزلوش من السما رسامين .. الرسم بيطلع الطاقه السلبية اللي جواكي وبيفرغها في الورق والالوان ❤ .. بصي .. إرسمي أي حاجه فـ أي حاجه .. لو مجرد شخابيط

٢٧- حافظي علي وضوءک واذكارک علشان لا الحسد ولا الشيطآن يقدر يقرب ناحيتک !

٢٨- فرحي نفسك بنفسک و متستنيش حد يفرحک .. لو اتخنقتي !! .. قومي اتوضي و صلي و عيطي براحتک .. فرغي كل حاجه جواكي .. و هتبقي كويسة جداً بعدها ..
فكي شعرك واربطي فيه فيونكات واتهبلي احنا بنعيش مره واحده

نصائح جميلة ومفيدة
شكراً الك

اقتباس   المشاركة الأصلية كتبت بواسطة فجــر نصائح جميلة ومفيدة شكراً الك

العفو منك فجر
نورتِ