منذ 5 يوم
|
|
|
💬 لكل أم وأب بيقرأوا الكلام …
السلام عليكم ورحمة الله وبركاته
💬 لكل أم وأب بيقرأوا الكلام …
في حاجات لازم ناخدلها وقفة ونفكر شوية 
إحنا بقينا مركزين على الإعاشة أكتر من التربية!
يعني غسيل  ، طبخ  ، لانش بوكس  ، بامبرز  ، لبس 
وتعليم في أعلى المدارس وكورسات  …
كل ده مهم طبعاً، وفعلاً الحياة ضاغطة على الكل
وبقينا في سباق   علشان نقدر نكفي الحياة للأولاد
بس ده مش “تربية”، دي رعاية فقط 
 التربية يعني أبني إنسان سليم نفسيًا، ناجح، عارف يختار الصح  ،
ويحترم نفسه واللي حواليه 
وده مش بيحصل بالدلع المبالغ فيه 
ولا إن كل حاجة تبقى “ماشي يا حبيبي” 
لأ، الحزم مش قسوة، بالعكس… ده أمان 
الطفل محتاج أم حازمة وقت الجد 
وأب متواجد  مش بس فلوس وشغل 
لأن دور الأب كبير جدًا للأم وللأولاد،
وحقيقي البيت اللي فيه أب فاهم دوره كويس وقايم بيه مختلف تمامًا
عن بيت الأب فيه مجرد لقب وزعيق وخوف 
أو على النقيض بيدلع ويطبطب وسايب الحمل كله للأم 
 مينفعش تبقي أم وتقولي:
“أصلهم صعبين ومش عارفة أسيطر عليهم ولا أرفض الغلط” 
ولا نقول ممنوع موبايل  وتردي “ما بقدرش أمنعه”
ولا نقول شيبسي ومواد حافظة وأكل شارع   ،
وتردي “هو بيزعل وعاوز زي صحابه”
ولا الطفل يغلط ويتطاول  ، وتقولي “ما يقصدش”
ولا نقول يلتزموا ويصلوا ،
وتقولي “لسه صغير والصلاة تقيلة عليهم دلوقتي”
ولا نقول أصحاب سوء، وتقولي “ما بقدرش عليه وبيحبهم”
اصل دي مش أكلة رافضها ولا لبس مش عاجبه شكله
ده دورك وتقويمك ومهمتك 
الأطفال عجينة بتتشكل بالإصرار والحزم 
والصبر  واللين وقت الاحتياج 
مش بعدم صبر وزهق  واستخدام أسرع طريقة تجيب نتيجة فورية:
إما أعمل لهم اللي عاوزينه  أو أضرب 
لا دا مطلوب ولا دا مطلوب
هو كده عمره ما هيتربى، ولا هيعرف إن لكل تصرف نتيجة 
 خلّي بيتك فيه قواعد واضحة:
 وقت الجد جد، ووقت اللعب لعب 
اللي يعمل الصح يتكافئ 
واللي يغلط يتعاقب — والعقاب يتنفّذ فعلاً، مش تهديد والسلام 
التربية مش سهلة، بس هي أثمن استثمار في الدنيا 
علشان نطلّع جيل عارف يعني إيه احترام والتزام 
فربنا يسترها ويهدينا كلنا للطريق الصح 
واتمنى لكم حياة سعيدة مع اولادكم
دمتم بحفظ الله ورعايته
تحيتي
ريمــــــــــــــــــــــــــــــــــــــــااااس
|
آخر 10 مواضيع
العرض العادي
