سكنات الروح

أوقات لما بكون الوجع أقوى مني ومن المسكنات بصير أتذمر لأنه الألم بكون فوق طاقة احتمالي
لكن الحمد لله بمجرد ما بتذكر قوله تعالى (وبشر الصابرين) بترجعلي السكينه والرضا والسلام الداخلي
وبتذكر انه بعد كل هالوجع رح يكون ربنا مستنيني بمكان افضل
مكان ما فيو لا وجع ولا تعب

عبير الجوري ,قمر الماما ,jr7 معجبون بهذا

مع الوقت رح نكتشف إنه أجمل شي ممكن يكسبه الإنسان بهالدنيا هو إنه يراعي شعور غيره ويكون خلوق في تعامله
ما تأذي حد، ما تكسر قلبه ، ما تجرح مشاعره، ما تظلمه، ما تكسر خاطره، وما تمحي الفرحة من وجهه..
الحياة قصيرة وما تستاهل

قمر الماما ,نقاء ,jr7 معجبون بهذا

أنا حاليا بآخر المشوار ،، مشوار كان مليان تعب ووجع، بين أمل وخوف، بين علاجات وانتكاسات، بين القوة يلي حاولت أتمسك فيها والضعف يلي فرضه المرض علي
نسيت كيف كان الشعور بدون وجع ،،،
الوجع صار جزء مني وما في يوم بمر بدونه وما في لحظة بعيشها بدون الاحساس بالضعف
الوجع بكل مكان بجسمي ،، بضل معي وما بفارقني، حتى وأنا نايمة بحسه بجسمي كله
بحاول ما أطلع صوت لحتى ما أزعج يلي بحبهم بس الوجع أقوى من السكوت ،،
بحط ايدي على صدري يلي بطلع وبنزل بصعوبة كأنه في جبل قاعد عليه وبصير أدعي ربنا يخفف عني
لما بلش السرطان كنت مفكرة اني رح أقدر أقاومه وأنتصر عليه بس المرض بعرف كيف ينهك البني آدم وبعرف كيف يسحب منه كل شي حتى أبسط الأمور
حتى النفس صار معركة ، بحس كأنه حدن بخنقني و الهوا مش راضي يدخل ع صدري، وكأنه كل نفس بدي آخده بده قوة ما عندي إياها
المرض سرق مني قوتي وطاقتي وحياتي شوي شوي وخلاني سجينة بجسد بتحكم هو فيه
كنت من قبل أتحرك بحريتي، أطلع، أمشي وأعمل يلي بدي إياه
هلأ ما بقدر أعمل أي شي بدون مساعده ،، رجليي ما بيقدروا يحملوني ، الكاسة يلي بدي أشرب منها بتكون بترجف بايدي ومرات بتوقع مني
بحاول أقوم من سريري بحس الدنيا بتدور ،،
كل شي كنت بحبه صار حلم بعيد ،، حتى الكلام صعب، صوتي ضعيف، بطلع كلمتين وبعدها بتعب
جلدي صار رقيق كتير ولو أي شي بسيط بلامسه بوجعني
باخد أدوية ومسكنات لتخفف الوجع ولو شوي بس ما بتكفي كأنه الوجع يتحداني وما بده اياني أرتاح
كل عضلة بجسمي بتوجعني، كل عظمي بحسه بتكسر
حتى لما بدي أغير وضعيتي ع سريري ما بكون عندي القوه لحتى أقوم بهادا الشي
لما بطلع ع حالي بالمراية ما بعرف حالي ،، وجهي شاحب وعيوني غايرة وجسمي ضعيف كتير
يا رب خفف عني وأعطيني الصبر والقوة لحتى أقدر اتحمل كل هالاوجاع في يلي باقيلي من حياتي

جبال الصمت ,نقاء ,jr7 ,قمر الماما معجبون بهذا

بكره احساسي بالعجز، بكره أشوف أهلي وهم بحاولوا يخبوا وجعهم وحزنهم ،بحس الوجع بعيونهم وبحركة ايديهم لما بيمسكوا ايدي بحذر، كأنهم خايفين يوجعوني
بتعرفوا شو الوجع الحقيقي؟ مش المرض، مش التعب، ولا حتى الاختناق اللي بحسه كل ليلة… الوجع الحقيقي هو دمعة ماما يلي بتحاول تخبيها عني، الوجع هو نظرات أخوي يلي بتحكي أشياء كتير، لما بحاول يبين قوي قدامي، بس عيونه بتحكي غير هيك
بحس بحزنهم، وبحس بالعجز يلي جواتهم، وهذا أصعب من أي وجع
الوجع لما يزوروني صحباتي ويحاولوا يكونوا أقوياء عشاني ولما يحاولوا يغيروا الموضوع لما يشوفوني تعبانه ويحاولوا يضحكوا ويضحكوني ، بس ضحكتهم مش متل قبل عيونهم بتفضحهم
أحيانا ببكي مش بس من الوجع كمان من الشوق لأيامي الحلوه لما كنت أضحك وبكامل صحتي وأعمل كل شي بحبه
في بداية مرضي كنت أتمسك بأي بصيص أمل، بأي دواء، وبأي علاج جديد ،، بأي كلمة منيحة من يلي حواليي لحتى أكمل بحياتي
هلأ مش خايفه من الموت بالعكس، صرت أحس إنه الموت رحمة وراحة من هالتعب ونهاية لكل الوجع يلي مريت فيه
هو باب رح أفتحه وأدخل منه بسلام ،، عندي إيمان انه بعد كل هالألم في راحة
عندي إيمان قوي إنه الله رحيم، وإنه مستنيني بمكان أحسن، مكان ما فيه وجع ولا تعب
وانه ربنا رح يستقبلني برحمة وحب، وإنه كل دمعة نزلتها كانت تحسب الي حسنات
الغريب انه رغم كل التعب، صرت أشوف الحياة بوضوح أكتر
صرت أقدر أبسط الأشياء،،،ضحكة طفل، نسمة هوا باردة، بلشت أشوف الجمال بأشياء ما كنت أنتبه إلها،، ضو الشمس وهو داخل من الشباك، ،،ابتسامة ممرضة، كلمة حنونة من أي حدا بحبني
الحياة مش بعدد الأيام، الحياة بلحظاتها الحقيقية،،، كل لحظة بتمر علي صارت غالية، حتى لو كانت مليانة وجع
وأهم شي صرت حاسه بسلام داخلي غريب ، كل ما ضعف جسمي، كل ما قويت روحي أكتر وكل ما قربت النهاية، كل ما حسيت انه الله أقرب مني، وانه مستنيني برحمة كبيرة، رحمة أكبر من أي وجع حسيته

جبال الصمت ,سارة المصرية ,سكون وانين ,قمر الماما معجبون بهذا

ربنا يعوضك كل خير عن أي ألم حسيتي بيه،
ربنا كبير وهو بس اللي حاسس بيكي
انا بادعيلك من كل قلبي وامس دعيتلك كتيرو لكل مريض بيتألم ربنا يشفيه ،
قاومي واستمري ف مقاومتك وماتستسلميش ابدا
وقولي يارب مفيش حاجه مستحيله عند ربنا
ربنا يسعدك حبيبتي ويتم شفاكي ع خير وكل عام وانتي بخير

lonely heart معجب بهذا

الله ينعم عليك صحة العافيه يارب
ما تشوفي شر

lonely heart معجب بهذا

اقتباس   المشاركة الأصلية كتبت بواسطة سارة المصرية ربنا يعوضك كل خير عن أي ألم حسيتي بيه، ربنا كبير وهو بس اللي حاسس بيكي انا بادعيلك من كل قلبي وامس دعيتلك كتيرو لكل مريض بيتألم ربنا يشفيه ، قاومي واستمري ف مقاومتك وماتستسلميش ابدا وقولي يارب مفيش حاجه مستحيله عند ربنا ربنا يسعدك حبيبتي ويتم شفاكي ع خير وكل عام وانتي بخير

شكرا حبيبتي ساره ع كلامك الحلو ودعمك الدائم لالي
وعلى دعواتك الغاليه ومشاعرك الصادقه
الله يسعدك يا رب ويخليكي لاهلك وكل يلي بحبوكي

اقتباس   المشاركة الأصلية كتبت بواسطة عبير الجوري الله ينعم عليك صحة العافيه يارب ما تشوفي شر

الله يسعدك حبيبتي عبير
وما يحرمني من طيبة قلبك ودعواتك الحلوه

سارة المصرية ,عبير الجوري معجبون بهذا

السلام عليكم حبيبتي لونلي
يارب تكوني بخير
طمنينا عنك لو سمحتي