قصة الزلزال

الزلزال.....

على الساعة11 ونص خبرنا بابا بإنو صار لازم ننام بعد ليلة كلها ضحك وفرفشة ، قمت أنا وأختي ورتبنا المكان ودخلنا غرفتنا ولساتنا عم نضحك ودخلت كل وحدة مننا بسريرها وسرعان ماغطينا بالنوم العميق ....
على الساعة 4:28 دقيقة بالضبط صحيت مفزوعة وكلشي تحتي عم يهز لدقايق حسيت اني بحلم وحاولت أصحى منه بس اصطدمت بالواقع وانو هالشي مانو حلم من أحلامي قعدت ومسكت بحرامي ولساتني عم اشعر بإنو البيت عم يهز بلش قلبي ينتفض من الخوف وصرت اصرخ: هزة هي هزة ارضيةة هزةة
ثواني وكانت الهزة عم تزيد وتزيد وكل يلي بالبيت فاقو على اثرها ، تجمعنا بزاوية البيت اللي كلشي فيه عم يوقع من اغراض ومقتنيات ، صرخ بابا: اطلعوو لبرااا يلااا البيت رح يتهدم فوق رؤوسناا..
لما أنهى أبي كلامو الكل صارو يركض لبرا والموت قدام عيونو ، أنا كنت عم اركض حافية وتوازني معدوم بسبب الاهتزاز ، انتبهت لأخي الصغير عم يبكي من الخوف مسكت ايدو وكملت ركض وأختي قدامي ، وصلنا باب البناية ونحنا عم نشوف باب النجاة قدامنا بس لما طلعو بابا وماما سمعنا صوت قوي وصرخات ونزلت البناية فوقناا.....
فتحت عيوني ، اتطلعت حوليي مو قادرة اشوف شي ، ظلاام ، صرت اتنفس بخوف والأوكسجين شبه معدوم ومعبوق بروائح غبار الاسمنت ، تذكرت اللي صار وصرت أهز راسي وتنزل دموعي ، صرت اصرخ وأسمع صدى صوتي عم يرجعلي ضعيف ، تذكرت اخواتي ، صرخت بإنهيار: لانااااا حمودةة انتووو هووون عم تسمعونيي؟؟!!
بعد لحظات سمعت صوت أنين ضعيف مو بعيد عني كتير ، صرت أزحف وأبكي من وجع رجلي وأبحث بإيديي حتى اشوف حدا من اخواتي لاني مو شايفة شي وسمعت أنينها كانت عم تتألم وتناديني زحفت بسرعة متل الغريق اللي متعلق بقشة ولقيتها قدامي ضميتها بكل قوتي ولهفتي كان المكان ضيق ومعتم وخالي من الحياة وفي فوقنا جزء من الجدار مو منهار وحولنا كلو ركام ، قلتلها بلهفة وخوف: حمودة وين؟!
لانا بصعوبة ونفس متقطع: ليكو.. جنبي
انحنيت عليه كان وجهو مهشم ومغمض عيونو ، اتطلعت على لانا وبخوف: شبو؟
لانا: مابعرف كاان عم يبكي وناام..
بلعت ريقي وقربت منو ومسكت ايدو وأنا عم أرجف وانصعقت ماكان في نبض..!
حمودةةةةةةةةةة
ومات أخي الصغير قبل ماودعو ، مات عريسناا الصغير ، مات بهجة البيت وضحكتوو مااات ...
لحظات عصيبة عشناها مو عارفين نوقف نحيبنا وانهيارنا رثاءً لموت شقيقنا وحاسين انو هي نهايتناا ونحنا كمان رح نلحقو..
انحنيت ومسكت ايدو المتجمدة واللي مليانة أتربة ودم وصارت تنزل دموعي المتتالية على جثة أخي الباردة المتصلبة !
كنت عم أرجف وأهتز من شدة البكاء وأنا عم قول: لاا تخاف حمودة لاا تخاف أناا ولانا معك ورح نندفن سواا ايي نحناا كمان رح نموت هوون ، حمودة باارد حمودة أنا رح دفيك أناا جنبك🥺
صرت أمسح ايدو وأنفخ عليها وكل ماني عم شد عليها بزيادة وكأني مو بوعيي ، حسيت على لانا مسكتني بضعف وحكت بأنفاس متسارعة: أناا مابدي مووت ماا بدي ضل هون بدي أمي ..
اتطلعت عليها وحضنتها وحسيت بشي لزج على ايدي ماقدرت شوف منيح بسبب العتمة وتحسست جسد اختي ولما وصلت لصدرها حسيت بشي صلب لامس ايدي ، نقزني قلبي وصرخت: لانااا شوفيكي؟
لانا بوجع: في سيخ حديد فايت من ظهري وطالع من صدري ، لما سمعتها جنيت وحسيت اني بالهاوية وماعم اقدر أخلص وصارت لانا تتحرك وتأن وتبكي وتنزف أكثر
ثبتتها بمكانها وقلت: لاناا اسمعيني منيح لاا تتحركي تمام؟
لانا بطفولة: بس أنا لازم طالعو من صدري
قلت : سمعيني اكيد هل رح ينقذونا ابقي هادية
لانا بأمل: يعني مارح نموت متل ماقلتي؟
قلت بقهر: لاا مارح نموت
رجعت أصرخ: ساااعدونااااا بابااااا مامااااا ساعدوناااا
صرخت حتى صوتي ماعاد طلع وحسيت بنهايتي اقتربت!
مسكت ايد لانا وهمست: رح يجو اصبري
لانا بتعب: احكيلي حكاية
أنا: كان في بنت ...
استرسلت بالقصة وكانت لانا عم تلتهي شوي بس كانت كل شوي تسألني اذا رح يساعدنا حدا وأنا أأكدلها انو رح يساعدونا وبعد مدة استغربت انو سكتت وماعاد سألتني
قلت باستغراب: لانااا ، ايي مابدك تعرفي اذا الأمير رجع؟ ، لانااا؟
بلعت ريقي وتحسست وجها بإيدي المرتجفة كانت دقات قلبي عم تزيد والخوف عم ياكل اخر أمل إلي بالحياة ولما عرفت بإنو حتى لانا لحقت حمودة حسيت بأبشع احساس بيحسو الإنسان أحساس بالعجز وبالقهر وبالضعف وبالقسوة وبالوحدة وبالخوف القاتل ، كلشي حوليي كان باللون الأسود وكل مانو الأوكسجين عم يقل ويضيق عليي المكان ، لاناا قومي لاناا حمودةة لاتنااام لك لاا تتركونييي قوموووو..
حسيت بالدوار وبالراحة ظناً مني انو هاي هي لحظة طلوع الروح ورح موت واتخلص من هالعذاب....

كانو شباب الدفاع المدني عم ينشلو الناس من تحت الركام وطلعوني أنا ولانا وحمودة ..
المنقذ: بس هي الطفلة عايشة
الناس: لاحول ولاقوة الا بالله!
شب من الشباب: يي لك هي نغم بنت جيراننا وأبوها وأمها ماتو من ركام البناية بلحظتها !
الناس: إنا لله وإنا إليه راجعون💔

لا حول ولا قوة الا بالله
قصة مؤلمة
ولكن الرضا بقضاء الله نعمة
والحمد لله على كل حال

الله يكون مع كل حد فقد اهله فقد حد بقربله وغالي عليه
فقد بيته ودفئ العيلة

عوافي يعسل

اقتباس   المشاركة الأصلية كتبت بواسطة آنثى الغرام لا حول ولا قوة الا بالله قصة مؤلمة ولكن الرضا بقضاء الله نعمة والحمد لله على كل حال الله يكون مع كل حد فقد اهله فقد حد بقربله وغالي عليه فقد بيته ودفئ العيلة عوافي يعسل

يا رب
شكراً لحضورك الملكي

قدر الله وماشاء فعل
الله يرحم من مات ويعوضهم بجنات النعيم ويشفي الجرحى
كارثة كبيرة محتاجين دعائنا ومساندتنا لهم بأي شي
أبنية مهدمة لامأوى ومرض وفقد وحزن وبعض الناس لسة تحت الأرض الله أعلم أحياء ولاأموات
الله يصبرهم يارب وينزل رحمته عليهم ويلطف فيهم
أشكرك على الطرح القيم

بكتني قصتهم
بحرقوا القلب
الله يرحم يلي مات منهم بالزلزال ويشفي كل مصاب
مصابهم صعب وبوجع
يسلمو حبيبتي ع القصة المؤلمه

يا الله يا ريتها ماتت معهم ..
القصة مؤلمة لدرجة كبيرة و بكتني و الله ..
كتير توجعت عليهاا ..
الله يكون بالعون ياا رب

يسلمو للقصة

اقتباس   المشاركة الأصلية كتبت بواسطة قطر الندى قدر الله وماشاء فعل الله يرحم من مات ويعوضهم بجنات النعيم ويشفي الجرحى كارثة كبيرة محتاجين دعائنا ومساندتنا لهم بأي شي أبنية مهدمة لامأوى ومرض وفقد وحزن وبعض الناس لسة تحت الأرض الله أعلم أحياء ولاأموات الله يصبرهم يارب وينزل رحمته عليهم ويلطف فيهم أشكرك على الطرح القيم

يا رب
اسعدني جدا حضورك

اقتباس   المشاركة الأصلية كتبت بواسطة lonely heart بكتني قصتهم بحرقوا القلب الله يرحم يلي مات منهم بالزلزال ويشفي كل مصاب مصابهم صعب وبوجع يسلمو حبيبتي ع القصة المؤلمه

وجعت قلوبنا كلنا. والله
اسعدني حضورك

اقتباس   المشاركة الأصلية كتبت بواسطة البريئة ! يا الله يا ريتها ماتت معهم .. القصة مؤلمة لدرجة كبيرة و بكتني و الله .. كتير توجعت عليهاا .. الله يكون بالعون ياا رب يسلمو للقصة

الله لا يحطنا بهيك موقف
جدا صعب
حبيت اطلالتكِ هنا 🌹

يا وجع القلب بعدهُم!
الله يصبرها ويصبر كلّ حدا فقد أشخاص
ويرحم كل يلّي توفوا..
ونسأل الله اللّطف فيهم..

يسلمو حبيبتي.