أخبار_عالريق

#أخبار_عالريق 1022 يوم
✅يكتبها / #سعيد_الطويل

■كرابيج حلب بــ 2 شيكل شوية مهلبية بالعسل باعتاهم حماته مع شعيرية بسكر وبعدهم زرين بطاطا حلوة زايدات من مبارح ،وجايبين كيس بزيلا من أرض نسايبهم الجداد وشوية شيبسي ابنه الصغير جابهم من مصروفه مع براد شاي أكرك عجم معمول عالنار وتداين بزر عين شمس من الدكانة هيك #أبو_فؤاد سهر سهرته بجو الشتا وانبسط مع انه مرفوض وما طلع إله تصريح للشغل بالداخل ..بيقلك #السعادة_قرار

■نص سيارات البلد صافة عند الميكانيكية والكهربجية عالتصليح بعد هالشتوية

■المنخفض الجوي يستودعكم الله الذي لا تضيع ودائعه..والمنخفض الجاي لمين يعيش أول السنة الجاية

■جددوا المنحة القطرية للسنة الجديدة 2023 ..من نصيب الغلابا

■شيكات الشؤون بيقلك بعد نص شهر واحد من السنة الجديدة ..تفضلوا عاد الاستخفاف بالناس

■مقترحين انه يكون في اجازة يوم السبت غير الجمعة لمدارس الوكالة ،وعلى جروبات النسوان رافضات القرار قبل ما يطلع

■شب طالع للقمه عيشه اسمع خالد العجلة وصلني خبر وفاته من زميله وهو شغاب بالداخل المحتل . .الله يرحمه

■اليوم الفصائل بدها تنفذ مناورة الرـ ـكن الشديد 3 بشمال غزة

■في تدخلات وواسطات لانجاز صفقة تبادل الأسـ ـرى بأي وقت ان شاء الله

■الناس مفلسة وعيانة وسقعانة ويا دوب تسلك حالها من هان للرواتب ..الشتا بيسحب أكل ومصاريف يا عمي..

-بدنا جهاز تحكم في جرة أوكسجين ضرروي لجرة بتستخدم صدقة جارية عطل وهو موجود عند راجل مسن وعايش عليه لو حد قادر يوفره ..

#صباح_الخير للناس الأصيلة إللي بتتذكرك بسبب وبدون سبب
للناس إللي بتحب تصبح عليك بدون مصلحة ..

#صباح_الخير لأهل الخير والناس إللي بتجبر الخواطر وبتتفقد غيرها .. للناس الحنونة

الأربعاء 28-12-2022 🌹